साखरेचे मिल भाव २५ टक्क्यांनी घसरून सुद्धा ग्राहकांना दिलासा नाही

- Advertisement -

सणासुदीच्या काळात साखरेच्या दराबाबत ग्राहकांना दिलासा देणारी बातमी समोर आली आहे. गेल्या काही आठवड्यांत वाढलेल्या साखरेच्या किमती आता घसरू लागल्या असून, किरकोळ बाजारात साखरेच्या दरात सुमारे १० टक्क्यांची घट झाली आहे. मात्र, याच काळात साखर कारखान्यांकडून विक्री होणाऱ्या मिल स्तरावरील दरात तब्बल २५ टक्क्यांची घसरण झाल्याने, या दरकपातीचा पूर्ण फायदा ग्राहकांपर्यंत पोहोचत नसल्याचे चित्र आहे. केंद्र सरकारने ही बाब लक्षात घेत व्यापारी, घाऊक विक्रेते आणि किरकोळ विक्रेत्यांना कमी झालेल्या दराचा लाभ ग्राहकांना तातडीने देण्याचे आवाहन केले आहे.

सणासुदीच्या काळात मिठाई, फराळ आणि विविध गोड पदार्थांची मागणी वाढते. त्यामुळे साखरेच्या किमती पुन्हा वाढू नयेत आणि बाजारात पुरेसा साठा उपलब्ध राहावा, यासाठी केंद्र सरकारने साखरेच्या साठवणुकीच्या नियमांमध्येही बदल केला आहे. यापूर्वी मोठ्या प्रमाणात साखर वापरणाऱ्या कंपन्यांना १५ दिवसांच्या वापराइतकाच साठा ठेवण्याची परवानगी होती. आता ही मर्यादा ३० दिवसांपर्यंत वाढवण्यात आली आहे. मात्र, अतिरिक्त १५ दिवसांचा साठा आयात केलेल्या साखरेतूनच करावा लागणार आहे. देशांतर्गत बाजारातून खरेदी केलेल्या साखरेचा साठा १५ दिवसांच्या वापरापुरताच ठेवता येणार आहे.
हे ही वाचा:
कोकण रेल्वेच्या विशेष गाड्या १२ तास उशिराने

दोन हजारांपेक्षा जास्त रेल्वे तिकीट बुकिंगवर यूपीआयचा नवा नियम

दरम्यान, केंद्र सरकारने साखरेच्या उपलब्धतेवर आणि बाजारातील दरांवर बारकाईने लक्ष ठेवले आहे. ऑगस्टमध्ये किरकोळ साखरेचा दर सुमारे ६५ रुपये किलोपर्यंत पोहोचला होता. त्यानंतर तो सुमारे ५८.५० रुपयांपर्यंत खाली आला आहे. म्हणजेच किरकोळ दरात जवळपास १० टक्क्यांची घट झाली असली, तरी मिल स्तरावरील २५ टक्के घसरणीच्या तुलनेत ही घट कमी आहे. त्यामुळे साखरेच्या पुरवठा साखळीतील व्यापारी आणि विक्रेत्यांनी दरकपातीचा लाभ ग्राहकांपर्यंत पोहोचवावा, अशी सरकारची भूमिका आहे. आगामी सणांच्या पार्श्वभूमीवर साखरेचा पुरवठा सुरळीत ठेवणे आणि ग्राहकांना वाजवी दरात साखर उपलब्ध करून देणे, हे सरकारसमोरील महत्त्वाचे उद्दिष्ट आहे.