केंद्रीय अर्थसंकल्प २०२६-२७ सादर होण्याच्या अवघ्या एक दिवस आधी देशातील सराफ बाजारात मोठी हालचाल पाहायला मिळाली. सोनं आणि चांदी या दोन्ही मौल्यवान धातूंच्या किमतींमध्ये अचानक आणि लक्षणीय घसरण नोंदवली गेली आहे. गेल्या काही दिवसांपासून सातत्याने वाढत असलेल्या किमती एकाएकी खाली आल्यामुळे गुंतवणूकदारांसह सामान्य खरेदीदारांचेही लक्ष या घडामोडीकडे वेधले गेले आहे.
सराफ बाजारातील माहितीनुसार, चांदीच्या दरात एका दिवसात तब्बल ७२ हजार रुपयांची घसरण झाली आहे. गुरुवारी चांदीचा दर सुमारे ४ लाख ४० हजार रुपये प्रति किलो इतका होता. मात्र शुक्रवारी आणि शनिवारी झालेल्या व्यवहारात चांदी थेट ३ लाख १२ हजार रुपये प्रति किलोपर्यंत खाली आली. म्हणजेच चांदीच्या किमतीत जवळपास १९ टक्क्यांची मोठी घसरण झाली आहे. मल्टी कमॉडिटी एक्सचेंजवरही चांदीच्या दरात सुमारे ९ टक्क्यांची घसरण नोंदवली गेली आहे, ज्यामुळे बाजारात चांगलीच खळबळ उडाली आहे.
हे ही वाचा:
शेअर बाजारात सुरुवात उत्साहाने, नंतर घसरण
कर्तव्य भवनात तयार करण्यात आलेला ‘तीन’ कर्तव्यांवर आधारित अर्थसंकल्प!
भारताला बायोफार्मास्युटिकल हबमध्ये रूपांतरित करण्यासाठी ‘बायोफार्म शक्ती’
अर्थसंकल्प सादर केल्यानंतर अर्थमंत्री सीतारमण विद्यार्थ्यांशी साधणार संवाद
सोन्याच्या किमतीतही घट झाली असून १० ग्रॅम सोन्याचा दर सराफ बाजारात सुमारे ३,००० ते ३,५०० रुपयांनी घसरला आहे. काही प्रमुख बाजारपेठांमध्ये १० ग्रॅम सोन्याचा दर १ लाख ६५ हजार ते १ लाख ६६ हजार रुपयांच्या आसपास व्यवहारात होता. काही दिवसांपूर्वी हाच दर १ लाख ८० हजार रुपयांच्या पुढे गेलेला होता. त्यामुळे सोन्यात गुंतवणूक करणाऱ्या अल्पकालीन गुंतवणूकदारांनी सध्या सावध भूमिका घेतलेली दिसते.
तज्ज्ञांच्या मते, या घसरणीमागे अनेक कारणे आहेत. आंतरराष्ट्रीय बाजारात डॉलर मजबूत झाल्यामुळे सोनं आणि चांदीवर दबाव निर्माण झाला आहे. तसेच, मागील काही आठवड्यांत मोठ्या प्रमाणावर झालेल्या दरवाढीनंतर अनेक गुंतवणूकदारांनी नफा वसूल करण्यासाठी विक्रीचा मार्ग निवडला. याशिवाय, अर्थसंकल्पात आयात शुल्क, कररचना किंवा गुंतवणुकीसंबंधी कोणत्या घोषणा होणार, याबाबतची उत्सुकता आणि अनिश्चितता देखील बाजारावर परिणाम करत आहे.
बाजार विश्लेषकांच्या मते, अर्थसंकल्प सादर झाल्यानंतर सोनं-चांदीच्या किमतींमध्ये पुन्हा चढ-उतार दिसू शकतो. सरकारकडून आयात शुल्कात बदल किंवा आर्थिक धोरणांबाबत महत्त्वाचे निर्णय जाहीर झाल्यास त्याचा थेट परिणाम या किमतींवर होण्याची शक्यता आहे. सध्या झालेली घसरण दीर्घकालीन गुंतवणूकदारांसाठी संधी ठरू शकते, मात्र बाजारातील अस्थिरता लक्षात घेता गुंतवणूक करताना सावधगिरी बाळगण्याचा सल्ला तज्ज्ञ देत आहेत.
