संरक्षण मंत्रालयाचा भारत डायनॅमिक्सशी ८११ कोटींचा करार

- Advertisement -

भारतीय वायुसेनेची लांब पल्ल्याची अचूक हल्ला करण्याची क्षमता अधिक मजबूत करण्यासाठी संरक्षण मंत्रालयाने भारत डायनॅमिक्स लिमिटेडसोबत ८१०.७९ कोटी रुपयांचा महत्त्वपूर्ण करार केला आहे. या कराराअंतर्गत भारतीय वायुसेनेसाठी १६० सॅटेलाइट स्मार्ट अँटी-एअरफिल्ड वेपन्स आणि संबंधित उपकरणे खरेदी केली जाणार आहेत.

संरक्षण मंत्रालयाच्या अधिकृत निवेदनानुसार, ही खरेदी ‘बाय इंडियन-इंडिजिनसली डिझाइन्ड, डेव्हलप्ड अँड मॅन्युफॅक्चर्ड’ या श्रेणीअंतर्गत केली जात आहे. संरक्षण सचिव राजेश कुमार सिंह यांच्या उपस्थितीत या करारावर स्वाक्षऱ्या करण्यात आल्या. सॅटेलाइट स्मार्ट अँटी-एअरफिल्ड वेपन अर्थात एसएटी-एसएएडब्ल्यू हे हवेतून जमिनीवर मारा करणारे अचूक मार्गदर्शित ग्लाइड बॉम्ब आहेत. जॅग्वार, हॉक आणि सुखोई-३० एमकेआय यांसारख्या लढाऊ विमानांमधून त्यांचा वापर करता येतो.

या शस्त्राची महत्त्वाची वैशिष्ट्ये म्हणजे ते लांब अंतरावरून शत्रूच्या विमानतळांना लक्ष्य करू शकते. त्यामुळे लढाऊ विमानांना शत्रूच्या हवाई संरक्षण यंत्रणेच्या प्रभावी क्षेत्रात प्रवेश न करता हल्ला करण्याची क्षमता मिळते.

हे ही वाचा:

साहिलचा शेवटचा मेसेज…माझ्याकडून चूक झाली!

भाजपची नवी मोर्चेबांधणी; महाराष्ट्रातील नेत्यांना महत्त्वाची जबाबदारी

दोन दिवसांत दुष्काळ जाहीर करणार

सिंधू जल करार प्रकरणात पाकिस्तानचा लवादच बेकायदेशीर

ही प्रणाली संरक्षण संशोधन आणि विकास संस्था अर्थात डीआरडीओने स्वदेशी पद्धतीने विकसित आणि डिझाइन केली आहे. संरक्षण मंत्रालयाच्या म्हणण्यानुसार, या शस्त्रात सुमारे ६० टक्के स्वदेशी सामग्री वापरण्यात आली आहे. याशिवाय इनिशियल मेजरमेंट युनिट, लॉन्ग इम्पॅक्ट डिले फ्यूज आणि ट्विन स्टोअर कॅरियर यांसारख्या उपप्रणालींचेही स्वदेशीकरण करण्यात आले आहे. त्यामुळे देशाच्या संरक्षण क्षेत्रातील आत्मनिर्भरतेला आणखी चालना मिळणार आहे.

संरक्षण मंत्रालयाने दिलेल्या माहितीनुसार, एसएटी-एसएएडब्ल्यूची २०२७-२८ आणि २०२८-२९ या आर्थिक वर्षांमध्ये भारतीय वायुसेनेला पुरवठा केला जाणार आहे. या शस्त्र प्रणालीचा वायुसेनेत समावेश झाल्यानंतर तिच्या परिचालन क्षमतेत महत्त्वपूर्ण वाढ होण्याची अपेक्षा आहे. कोणत्याही संघर्षाच्या परिस्थितीत सातत्यपूर्ण आणि प्रभावी हवाई मोहिमा राबवण्याची भारतीय वायुसेनेची क्षमता यामुळे अधिक मजबूत होऊ शकते.

हे स्मार्ट ग्लाइड बॉम्ब विशेषतः धावपट्टी, टॅक्सी ट्रॅक, मजबूत बंकर, विमानांचे हँगर, रडार केंद्रे, इंधन साठवणूक केंद्रे आणि संपर्क सुविधा यांसारख्या महत्त्वाच्या लष्करी पायाभूत सुविधांना लक्ष्य करण्यासाठी तयार करण्यात आले आहेत. संघर्षाच्या सुरुवातीच्या टप्प्यात शत्रूच्या हवाई तळांना नुकसान पोहोचवून त्याची हवाई क्षमता कमकुवत करणे, हा या शस्त्र प्रणालीच्या वापरामागील प्रमुख उद्देश आहे.