जागतिक बाजारात कच्च्या तेलाच्या किमतींमध्ये झालेल्या घसरणीचा फायदा लवकरच भारतीय ग्राहकांना मिळू शकतो. पेट्रोल आणि डिझेलच्या दरांमध्ये आगामी काळात कपात होण्याची शक्यता असल्याचे संकेत केंद्रीय पेट्रोलियम आणि नैसर्गिक वायू मंत्री हरदीप सिंह पुरी यांनी दिले आहेत. सध्या तेल विपणन कंपन्यांकडे महागड्या दराने खरेदी केलेल्या कच्च्या तेलाचा साठा असल्याने त्यावर प्रक्रिया सुरू आहे. मात्र, अलीकडे कमी दरात आयात करण्यात आलेले कच्चे तेल रिफायनऱ्यांपर्यंत पोहोचल्यानंतर त्याचा थेट परिणाम इंधनाच्या किरकोळ दरांवर दिसून येऊ शकतो, असे त्यांनी स्पष्ट केले.
हरदीप सिंह पुरी यांनी सांगितले की, आंतरराष्ट्रीय बाजारात कच्च्या तेलाच्या किमतींमध्ये मोठी चढ-उतार झाली असली तरी भारतात पेट्रोल आणि डिझेलच्या किमतींमध्ये तुलनेने मर्यादित वाढ झाली आहे. सरकारने यापूर्वी उत्पादन शुल्कात कपात करून ग्राहकांवरील आर्थिक भार कमी करण्याचा प्रयत्न केला होता. त्यामुळे जागतिक परिस्थितीचा पूर्ण परिणाम भारतीय ग्राहकांवर होऊ दिलेला नाही, असा दावा त्यांनी केला.
हे ही वाचा:
वैभवला संधी मिळावी, पण कोणालाही वगळून नाही!
हॅरी केनची दुहेरी गोलांची कमाल
विंबल्डनमध्ये जोकोविचची दणदणीत आगेकूच; सित्सिपासवर सरळ सेटमध्ये मात
भारताच्या पहिल्या ऑलिम्पिक हिरोची गाथा
मंत्र्यांच्या मते, भारताने कमी किमतीत खरेदी केलेले कच्चे तेल देशातील रिफायनऱ्यांमध्ये प्रक्रिया झाल्यानंतर इंधनाच्या दरांमध्ये कपात करण्याची संधी निर्माण होईल. त्यामुळे आगामी काही आठवड्यांत पेट्रोल आणि डिझेलच्या किमतींबाबत सकारात्मक निर्णय होण्याची शक्यता व्यक्त केली जात आहे.
गेल्या काही आठवड्यांत पश्चिम आशियातील भू-राजकीय तणावामुळे जागतिक तेलपुरवठ्यावर परिणाम झाला होता. त्याचा परिणाम म्हणून भारतात पेट्रोल आणि डिझेलच्या किमतींमध्ये प्रति लिटर सुमारे ₹७.५० ते ₹७.६० इतकी वाढ झाली होती. मात्र, आता कच्च्या तेलाच्या दरांमध्ये नरमाई आल्याने इंधन दर कमी होण्याची अपेक्षा व्यक्त केली जात आहे.
दरम्यान, हरदीप सिंह पुरी यांनी भारताकडे सध्या ७६ ते ८० दिवस पुरेल इतका तेलसाठा उपलब्ध असल्याचेही सांगितले. त्यामुळे पुरवठ्याबाबत कोणतीही तातडीची चिंता नसून जागतिक परिस्थितीवर सरकार सातत्याने लक्ष ठेवून असल्याचे त्यांनी नमूद केले. वाहनचालकांसाठी ही बातमी दिलासादायक मानली जात असून, कच्च्या तेलाच्या स्वस्त आयातीचा लाभ प्रत्यक्षात पेट्रोल-डिझेलच्या दरात कितपत आणि केव्हा मिळतो, याकडे आता सर्वांचे लक्ष लागले आहे.
