१८ दिवसांत साखर तब्बल १८ रुपयांनी महागली

सणासुदीचा हंगाम सुरू होण्याआधीच साखरेच्या दरांनी देशभरातील ग्राहकांना मोठा धक्का दिला आहे. अवघ्या १८ दिवसांत साखरेच्या किरकोळ दरात तब्बल १८ रुपयांपर्यंत वाढ झाली असून, आगामी काळात दर आणखी वाढण्याची शक्यता व्यक्त केली जात आहे. त्यामुळे गणेशोत्सव, दसरा आणि दिवाळीच्या पार्श्वभूमीवर मिठाई, बेकरी उत्पादने तसेच साखरेचा वापर असलेल्या खाद्यपदार्थांच्या किमतीवरही त्याचा परिणाम होण्याची शक्यता आहे.

साखरेच्या दरातील या तेजीमागे देशांतर्गत पुरवठ्यावर निर्माण झालेला दबाव हे प्रमुख कारण मानले जात आहे. बाजारात उपलब्ध साठा तुलनेने कमी होत असताना सणासुदीच्या काळात मागणी मोठ्या प्रमाणात वाढण्याची शक्यता आहे. विशेषतः ऑगस्ट ते नोव्हेंबरदरम्यान गणेशोत्सव, दसरा आणि दिवाळीमुळे साखरेची मागणी वाढते. त्यामुळे व्यापारी आणि उद्योग क्षेत्राकडून दर आणखी वाढण्याची शक्यता व्यक्त केली जात आहे.
हे ही वाचा:
सिंधूच्या कठीण काळात विराट ठरला ‘गेमचेंजर’

९ महिन्यांनंतर इम्रान खान कुटुंबियांना भेटले

घाऊक बाजारातही साखरेच्या किमतींनी विक्रमी पातळी गाठली आहे. महाराष्ट्रातील महत्त्वाचे साखर बाजार असलेल्या कोल्हापूरमध्ये दर १०० किलोमागे सुमारे ५,३५० रुपयांपर्यंत पोहोचले आहेत. उत्तर प्रदेशात एम-ग्रेड साखरेचा एक्स-फॅक्टरी दर १०० किलोमागे ५,४०० रुपयांवर पोहोचला असून, घाऊक दर ५,८०० रुपयांपर्यंत गेल्याचे अहवालात नमूद करण्यात आले आहे. महाराष्ट्रात एक्स-फॅक्टरी दर सुमारे ५,३०० रुपये प्रति क्विंटल असून, जीएसटीसह हा दर ५,५५० ते ५,६०० रुपयांच्या आसपास पोहोचत आहे.

दरम्यान, साखरेच्या वाढत्या किमतीवर नियंत्रण मिळवण्यासाठी केंद्र सरकारकडून विविध पर्यायांचा विचार सुरू आहे. मर्यादित प्रमाणात शुल्कमुक्त साखर आयात करण्यास परवानगी देणे, मोठ्या व्यापाऱ्यांच्या साठ्यावर मर्यादा आणणे, आयात शुल्कात कपात करणे तसेच साखर कारखान्यांच्या मासिक विक्री कोट्यात बदल करणे अशा उपाययोजनांचा विचार केला जात आहे. साखरेचा देशांतर्गत पुरवठा वाढवून बाजारातील दबाव कमी करणे हा यामागचा उद्देश आहे.

साखरेच्या किमतीतील वाढीचा थेट परिणाम ग्राहकांच्या बजेटवर होण्याबरोबरच मिठाई उत्पादक, बेकरी उद्योग, हॉटेल-रेस्टॉरंट क्षेत्र आणि खाद्यपदार्थ उत्पादक कंपन्यांवरही होऊ शकतो. त्यामुळे सणासुदीच्या काळात मिठाई आणि इतर गोड पदार्थांच्या किमती वाढण्याची शक्यता आहे. सध्या सरकारकडून पुरवठा वाढवण्यासाठी कोणते निर्णय घेतले जातात आणि बाजारातील साखरेचा साठा कितपत उपलब्ध होतो, यावर पुढील दरवाढ मोठ्या प्रमाणात अवलंबून राहणार आहे.