आज केंद्रीय अर्थसंकल्प २०२६-२७ सादर होत असताना भारतीय शेअर बाजारात सकाळच्या सत्रात मोठ्या चढउतारांचा अनुभव आला. बजेटचा थेट परिणाम शेअर बाजारावर होत असल्याने आज रविवारीही विशेष ट्रेडिंग सत्राचे आयोजन करण्यात आले होते. या विशेष सत्रात बीएसई आणि एनएसई या दोन्ही शेअर बाजारांमध्ये व्यवहार सुरू होते.
सकाळच्या सत्रात गुंतवणूकदारांनी सावध भूमिका घेतल्याने सेन्सेक्स आणि निफ्टी ५० हे प्रमुख निर्देशांक मिश्र स्थितीत उघडले. सुरुवातीला सेन्सेक्समध्ये सुमारे ३०० अंकांची वाढ दिसून आली. मात्र काही वेळातच नफावसुलीमुळे बाजारात घसरण झाली. दुपारी १२ वाजण्याच्या सुमारास सेन्सेक्स ८ अंकांच्या किरकोळ वाढीसह ३२,२७० अंकांवर व्यवहार करत होता, तर निफ्टी ५० हा १८ अंकांच्या घसरणीसह २५,३१२ अंकांवर स्थिरावला होता.
हे ही वाचा:
कर्तव्य भवनात तयार करण्यात आलेला ‘तीन’ कर्तव्यांवर आधारित अर्थसंकल्प!
भारताला बायोफार्मास्युटिकल हबमध्ये रूपांतरित करण्यासाठी ‘बायोफार्म शक्ती’
भारत इराण ऐवजी व्हेनेझुएलाकडून कच्चे तेल आयात करेल!
अर्थसंकल्प सादर केल्यानंतर अर्थमंत्री सीतारमण विद्यार्थ्यांशी साधणार संवाद
बजेट भाषण सुरू होण्यापूर्वी बाजारात अनिश्चिततेचे वातावरण होते. कररचनेत होणारे संभाव्य बदल, पायाभूत सुविधांवरील सरकारी खर्च, उद्योगांना दिल्या जाणाऱ्या सवलती आणि गुंतवणुकीला चालना देणाऱ्या घोषणांकडे गुंतवणूकदारांचे लक्ष लागले होते. त्यामुळे सुरुवातीच्या काही मिनिटांत बाजारात मर्यादित चढउतार पाहायला मिळाले.
अर्थमंत्री निर्मला सीतारमण यांनी बजेट भाषण सुरू करताच बाजारातील वातावरण काही प्रमाणात सकारात्मक झाले. काही वेळातच सेन्सेक्समध्ये ३०० ते ४०० अंकांची वाढ नोंदवली गेली, तर निफ्टी ५० सुमारे ०.३ ते ०.५ टक्क्यांनी मजबूत झाला. सार्वजनिक क्षेत्रातील बँका, ऑटोमोबाईल आणि संरक्षण क्षेत्रातील शेअर्समध्ये खरेदी वाढल्याचे दिसून आले. मात्र आयटी आणि मेटल क्षेत्रातील काही शेअर्सवर दबाव कायम राहिला. यानंतर पुन्हा नफावसुली झाल्याने बाजारात सुमारे २०० अंकांची घसरण झाली.
दरम्यान, अर्थसंकल्पात शेअर बाजाराशी संबंधित काही महत्त्वाचे संकेत देण्यात आले. सरकारने भांडवली खर्चावर विशेष भर देत पायाभूत सुविधा, उत्पादन क्षेत्र आणि ‘मेक इन इंडिया’शी संबंधित योजनांसाठी मोठ्या तरतुदी जाहीर केल्या. या घोषणांचा थेट फायदा सूचीबद्ध कंपन्यांना होण्याची शक्यता व्यक्त केली जात आहे. तसेच भांडवली नफा कर आणि सिक्युरिटीज व्यवहार करामध्ये कोणताही मोठा बदल न केल्यामुळे गुंतवणूकदारांना दिलासा मिळाला.
