ऑर्डर उशिरा आली म्हणून डिलिव्हरी बॉयला घरात घेऊन मारहाण

मेरठमध्ये डिलिव्हरी बॉयसोबत अमानुष वागणूक केल्याची धक्कादायक घटना समोर आली आहे. गंगा हाइट्स इमारतीत डिलिव्हरी देण्यासाठी गेलेल्या ब्लिंकिटच्या डिलिव्हरी बॉयला ऑर्डर उशिरा पोहोचल्याच्या कारणावरून एका दाम्पत्याने घरात नेऊन बेदम मारहाण केल्याचा आरोप आहे. या घटनेचा साडेतीन मिनिटांचा सीसीटीव्ही व्हिडीओ समोर आल्यानंतर संतापाची लाट उसळली आहे.

मिळालेल्या माहितीनुसार, शुक्रवारी रात्री साडेनऊच्या सुमारास अमित यादव हा डिलिव्हरी बॉय गंगा हाइट्समधील फ्लॅट क्रमांक ११० येथे ऑर्डर देण्यासाठी पोहोचला. ऑर्डर काही मिनिटे उशिरा पोहोचल्याने ग्राहक आणि अमित यांच्यात वाद झाला. हा वाद वाढताच संबंधित व्यक्तीने अमितला मारहाण करण्यास सुरुवात केली. त्यावेळी त्याची पत्नीही घटनास्थळी उपस्थित होती. आरोपानुसार, दोघांनी अमितला जबरदस्तीने घरात नेले आणि त्याच्यावर मारहाण केली. एवढेच नव्हे तर त्याला जीवे मारण्याची धमकीही देण्यात आली.

या संपूर्ण प्रकाराचे इमारतीच्या पॅसेजमधील सीसीटीव्ही फुटेज समोर आले आहे. व्हिडीओमध्ये डिलिव्हरी बॉय दरवाजापाशी आल्यानंतर त्याच्याशी वाद घालताना संबंधित व्यक्ती दिसतो. त्यानंतर त्याला अनेक वेळा कानशिलात मारण्यात येते आणि बुक्क्यांनीही मारहाण केली जाते. पुढे त्याला घरात नेण्यात येते आणि काही वेळाने तो रडत घराबाहेर पडताना दिसतो. हा व्हिडीओ सोशल मीडियावर मोठ्या प्रमाणात व्हायरल झाला असून, घटनेवर नागरिकांकडून तीव्र संताप व्यक्त केला जात आहे.
हे ही वाचा:
आयफोन १८ प्रो मॅक्समध्ये असणार ५४००mAh बॅटरी, ४८MP कॅमेरा?

भिंत फोडताच कामगारांना सापडला ९९ कोटींचा सोन्याचा खजिना

पीडित अमित यादवने सांगितले की, तो गेल्या जवळपास वर्षभरापासून डिलिव्हरी बॉय म्हणून काम करत असून त्यासोबत बारावीचे शिक्षणही घेत आहे. ऑर्डर सुमारे पाच मिनिटे उशिरा होत असल्याचे त्याने ग्राहकाला सांगितले होते. मात्र, ग्राहकाने त्याला घरी बोलावून घेतल्यानंतर परिस्थिती बिघडली. अमितच्या म्हणण्यानुसार, त्याचा फोनही हिसकावून घेण्यात आला आणि त्याच्यावर गंभीर आरोप करण्याची धमकी देण्यात आली.

या घटनेनंतर पीडित डिलिव्हरी बॉयने कसाबसा दाम्पत्याच्या तावडीतून सुटका करून पोलिसांकडे धाव घेतली. पोलिसांनी प्रकरणाची गंभीर दखल घेत दाम्पत्याविरोधात गुन्हा दाखल केला आहे. संबंधित आरोपी घराला टाळे लावून फरार झाल्याची माहिती समोर आली आहे. आरोपींपैकी मारहाण करणारा व्यक्ती एका खासगी बँकेत व्यवस्थापक असल्याचेही वृत्त आहे.

दरम्यान, या घटनेमुळे मेरठमधील डिलिव्हरी कर्मचाऱ्यांमध्ये संतापाचे वातावरण निर्माण झाले आहे. २० हून अधिक डिलिव्हरी बॉय भावनपूर पोलीस ठाण्याबाहेर आंदोलनासाठी एकत्र आले. आरोपींना अटक होईपर्यंत आंदोलन सुरू ठेवण्याची भूमिका त्यांनी घेतली. ऑर्डर पोहोचवण्यासाठी ऊन-पाऊस झेलणाऱ्या डिलिव्हरी कर्मचाऱ्यांच्या सुरक्षिततेचा आणि त्यांच्या सन्मानाचा प्रश्न या घटनेमुळे पुन्हा ऐरणीवर आला आहे.

ऑर्डर काही मिनिटे उशिरा पोहोचणे हा वादाचा विषय असू शकतो; मात्र त्यासाठी एखाद्या कामगाराला घरात नेऊन मारहाण करणे आणि धमकावणे ही बाब अत्यंत गंभीर आहे. या प्रकरणात पोलिसांच्या तपासातून नेमकी वस्तुस्थिती स्पष्ट होणार असली, तरी सीसीटीव्ही फुटेजमुळे या घटनेने डिलिव्हरी क्षेत्रात काम करणाऱ्या हजारो तरुणांच्या सुरक्षेबाबत गंभीर प्रश्न उपस्थित केले आहेत.