मध्य प्रदेशच्या सागरमध्ये विषारी दारूमुळे ११ जणांचा मृत्यू

- Advertisement -

मध्य प्रदेशातील सागर जिल्ह्यातील बंडा परिसरात विषारी दारू प्यायल्याने मोठी दुर्घटना घडली आहे. विविध गावांतील अनेकांनी शनिवारी रात्री दारूचे सेवन केल्यानंतर अचानक त्यांची प्रकृती बिघडू लागली. आतापर्यंत ११ जणांचा मृत्यू झाल्याची माहिती समोर आली असून, २५ हून अधिक जणांना उपचारासाठी रुग्णालयात दाखल करण्यात आले आहे. यातील काहींची प्रकृती गंभीर असल्याने मृतांचा आकडा वाढण्याची भीती व्यक्त केली जात आहे.

घटनेची माहिती मिळताच पोलीस आणि प्रशासनाची पथके तातडीने घटनास्थळी दाखल झाली. सागरच्या जिल्हाधिकारी प्रतिभा पाल आणि पोलीस अधीक्षक अनुराग सुजानिया यांनी प्रभावित भागाची पाहणी करून रुग्णालयातील व्यवस्थेचा आढावा घेतला. सुरुवातीला बंडा येथील रुग्णालयात बाधितांना दाखल करण्यात आले. त्यानंतर गंभीर रुग्णांना सागर येथील रुग्णालयात उपचारासाठी हलवण्यात आले. पाटन, नौराज, डिलौना, बमूरा, हिनौती आणि गूगराखुर्द यांसह अनेक गावांतील नागरिक या दुर्घटनेमुळे प्रभावित झाल्याचे समोर आले आहे.
हे ही वाचा:
मुंबईत दहीहंडी उत्सवादरम्यान ३७६ गोविंदा जखमी

दिल्लीत आता जाती धर्मावरून काड्या

दरम्यान, या घटनेनंतर अवैध आणि बनावट दारूच्या विक्रीचा मुद्दा पुन्हा ऐरणीवर आला आहे. काही दिवसांपूर्वीच सागरमध्ये ‘बाम्बे व्हिस्की’ नावाने कथित बनावट दारू विकली जात असल्याची तक्रार आबकारी विभागाकडे करण्यात आली होती. तसेच परवानाधारक दारू विक्रेत्यांनीही परिसरातील अवैध दारूच्या व्यवसायाबाबत विभागाच्या बैठकीत चिंता व्यक्त केली होती. या तक्रारींनंतरही अपेक्षित कारवाई झाली का, याबाबत आता प्रश्न उपस्थित होत आहेत.

घटनेनंतर प्रशासनाने खबरदारी म्हणून परिसरातील काही दारूची दुकाने सील केली असून, दारूचे नमुने तपासणीसाठी घेण्यात येत आहेत. पोलिस आणि आबकारी विभागाकडून दारूचा स्रोत, ती कुठून आणली गेली आणि या प्रकरणामागे कोणाचा हात आहे, याचा तपास सुरू आहे. मृत्यू नेमके विषारी दारूमुळेच झाले आहेत का, याची अंतिम पुष्टी तपासणी आणि वैद्यकीय अहवालानंतर होणार आहे. मात्र, एकाच वेळी एवढ्या मोठ्या संख्येने नागरिकांचा मृत्यू झाल्याने सागर जिल्ह्यात शोक आणि भीतीचे वातावरण निर्माण झाले आहे.