होर्मुझमध्ये व्यापारी जहाजावर हल्ला; ११ भारतीय जखमी

होर्मुझच्या सामुद्रधुनीतून जात असलेल्या पनामा-ध्वजांकित व्यापारी जहाजावर हल्ला झाल्याची माहिती समोर आली आहे. जहाजावर प्रोजेक्टाइल आदळल्याने १२ जण जखमी झाले असून, त्यापैकी ११ जण भारतीय आहेत. ‘एमटी ऑन पीस’ या जहाजावर एकूण १९ कर्मचारी होते, त्यापैकी १७ भारतीय नागरिक असल्याची माहिती परराष्ट्र मंत्रालयाने दिली आहे.

ओमानच्या किनाऱ्याजवळून होर्मुझच्या सामुद्रधुनीतून जहाज जात असताना मंगळवारी ही घटना घडली. प्रोजेक्टाइल आदळल्यानंतर जहाजावरील १२ कर्मचारी जखमी झाले. ओमानी प्रशासनाच्या मदतीने जखमी कर्मचाऱ्यांना जहाजातून बाहेर काढून ओमानमधील खासाब येथे उपचारासाठी दाखल करण्यात आले आहे.

होर्मुझच्या सामुद्रधुनीत व्यापारी जहाजांच्या सुरक्षेचा प्रश्न पुन्हा गंभीर बनला आहे. ऑक्टोबरच्या पहिल्या आठवड्यात या परिसरात अनेक टँकरना प्रोजेक्टाइल हल्ल्यांना सामोरे जावे लागल्याचे वृत्त आहे. यापूर्वी एमटी काझीमाह- III या कुवेत-ध्वजांकित टँकरवरही प्रोजेक्टाइल आदळले होते. या जहाजावरील पाच भारतीय नागरिकांची ओमानी प्रशासनाच्या मदतीने सुटका करण्यात आली होती.

होर्मुझची सामुद्रधुनी ही जागतिक ऊर्जा वाहतुकीसाठी अत्यंत महत्त्वाचा जलमार्ग आहे. त्यामुळे या भागातील व्यापारी जहाजांवरील हल्ल्यांमुळे केवळ खलाशांच्या सुरक्षेचा प्रश्न निर्माण होत नाही, तर आंतरराष्ट्रीय व्यापार आणि ऊर्जा पुरवठ्यावरही परिणाम होण्याची चिंता वाढली आहे.

हे ही वाचा:

न्यूट्रिनो कणांच्या शोधासाठी फ्रान्सिस हॅल्झेन यांना भौतिकशास्त्राचा नोबेल

डॉक्टरची पदवी नाही, तरी थाटात दवाखाने

इटलीची क्वार्टर फायनलच्या शर्यतीत दमदार झेप

भारत-कझाकिस्तानचा ‘काजिंद-२०२६’ युद्धसराव

भारताकडून हल्ल्याचा निषेध

या घटनेचा भारताने तीव्र निषेध केला आहे. पश्चिम आशियातील व्यापारी जहाजांवर सुरू असलेल्या हल्ल्यांबाबत भारताने गंभीर चिंता व्यक्त केली असून, अशा घटना तातडीने थांबवण्याचे आवाहन केले आहे. व्यापारी जहाजे, खलाशी आणि नागरी पायाभूत सुविधांना लक्ष्य करणे थांबले पाहिजे. तसेच आंतरराष्ट्रीय जलमार्गांवरील नौवहन आणि व्यापार लवकरात लवकर सुरळीत होणे आवश्यक असल्याचे परराष्ट्र मंत्रालयाने म्हटले आहे. भारताने जखमी भारतीय खलाशांना सुरक्षितपणे बाहेर काढण्यासाठी मदत केल्याबद्दल ओमानच्या प्रशासनाचे आभार मानले आहेत.