भुलेश्वरला गणेशमूर्ती कोसळली, २ मृत्युमुखी

दक्षिण मुंबईतील भुलेश्वर परिसरात शनिवारी रात्री गणेशमूर्ती आगमन सोहळ्यादरम्यान मूर्ती कोसळल्याने दोन जणांचा मृत्यू झाला, तर पाच जण जखमी झाले, अशी माहिती अधिकाऱ्यांनी दिली.

अधिकाऱ्यांच्या माहितीनुसार, रात्री सुमारे ९.५१ वाजता भुलेश्वरमधील कबुतरखान्याजवळील बाळाराम मर्चंट रोडवरील जय अंबे चौकात ही घटना घडली.

प्राथमिक माहितीनुसार, गणेशमूर्ती आगमन सोहळ्याचा भाग म्हणून परिसरात आणली जात असताना अचानक खाली कोसळली. मूर्ती नेमकी कोणत्या कारणामुळे कोसळली, हे अद्याप स्पष्ट झालेले नाही.

हॉस्पिटलनिहाय मिळालेल्या माहितीनुसार, या दुर्घटनेत एकूण सात जण जखमी झाले. त्यापैकी दोन जणांचा मृत्यू झाला असून पाच जण जखमी झाले आहेत.

जी.टी. रुग्णालयात तीन जणांना आणण्यात आले. त्यापैकी एका व्यक्तीला डॉक्टरांनी मृत घोषित केले.

हे ही वाचा:

छात्रो की गुंज… हे प्रकरण समजून घ्या!

‘वंदे मातरम’बाबत काँग्रेसच्या निर्णयाचा भाजपाकडून निषेध ठराव

पुराच्या तडाख्यातून वाचली हत्तीणी ‘जॉयमोती’; उपचारांसाठी वनतारात दाखल

राष्ट्रभक्तीचे आवरण घालून काँग्रेस स्वतःला किती लपवणार?

रिलायन्स रुग्णालयात एका व्यक्तीचा मृत्यू झाला. सैफी रुग्णालयात एका जखमी व्यक्तीला दाखल करण्यात आले. जे.जे. रुग्णालयात दोन जखमींना दाखल करण्यात आले.

मृत आणि जखमींची ओळख तसेच त्यांची प्रकृती याबाबत अधिक माहिती मिळणे बाकी आहे.

आपत्कालीन यंत्रणा घटनास्थळी दाखल

घटनेची माहिती मिळताच विविध यंत्रणांना घटनास्थळी पाचारण करण्यात आले. त्यामध्ये मुंबई महापालिकेचा मुंबई अग्निशमन दल, मुंबई पोलीस, वाहतूक पोलीस, १०८ रुग्णवाहिका सेवा आणि बीएमसीच्या वॉर्ड कर्मचाऱ्यांचा समावेश होता.

अधिकारी घटनास्थळी पोहोचले असून परिस्थिती नियंत्रणात आणण्याबरोबरच जखमींना तातडीची मदत उपलब्ध करून देण्यात आली. गणेशमूर्ती नेमकी कशामुळे कोसळली आणि या दुर्घटनेला कोणते कारण कारणीभूत ठरले, याचा तपास सुरू आहे.