कोलकाता येथे राहणाऱ्या एका व्यक्तीला पाकिस्तानसाठी हेरगिरी केल्याच्या आरोपावरून नॅशनल इन्व्हेस्टिगेशन एजन्सी अर्थात एनआयएने अटक केली आहे. झफर रियाझ उर्फ रिजवी असे या आरोपीचे नाव असून, तो पाकिस्तानच्या गुप्तचर अधिकाऱ्यांना संवेदनशील माहिती पुरवत असल्याचा आरोप तपास यंत्रणेकडून करण्यात आला आहे. या प्रकरणामुळे देशातील सुरक्षा यंत्रणा पुन्हा एकदा सतर्क झाल्या आहेत.
एनआयएच्या माहितीनुसार, झफर रियाझ हा मूळचा कोलकात्याचा रहिवासी असून त्याचे पाकिस्तानशी जुने संबंध आहेत. त्याने एका पाकिस्तानी महिलेबरोबर विवाह केला असून त्याची मुलेही पाकिस्तानचे नागरिक असल्याचे तपासात समोर आले आहे. २००५ पासून तो वारंवार भारत आणि पाकिस्तानदरम्यान प्रवास करत होता. याच काळात पाकिस्तानच्या गुप्तचर अधिकाऱ्यांनी त्याच्याशी संपर्क साधून त्याला हेरगिरीसाठी तयार केल्याचा दावा एनआयएने केला आहे.
हे ही वाचा:
अमेरिकेवर विश्वास ठेवणे कठीण!
अभिषेक बॅनर्जींच्या मालमत्तांना नोटिसा आणि तृणमूल नगरसेवकाचा अध्यक्षपदाचा राजीनामा
चीन-रशियाची अमेरिकेविरोधात संयुक्त आघाडी
“नरसंहाराचा इतिहास असलेल्या राष्ट्राने काश्मीरवर व्याख्यान देणे हा विरोधाभास”
तपास यंत्रणेनुसार, झफर रियाझने आर्थिक लाभ आणि पाकिस्तानी नागरिकत्वाच्या आश्वासनाच्या बदल्यात भारतातील काही संवेदनशील माहिती पाकिस्तानपर्यंत पोहोचवली. त्याने भारतीय मोबाईल क्रमांकांशी संबंधित वन-टाइम पासवर्ड म्हणजेच ओटीपी पाकिस्तानातील अधिकाऱ्यांना दिल्याचा आरोप आहे. या ओटीपीच्या मदतीने व्हॉट्सअॅप खाती सक्रिय करण्यात आली आणि त्यांचा वापर भारतातील इतर संशयितांशी गुप्त संपर्कासाठी करण्यात आला.
एनआयएने या आरोपीविरोधात भारतीय न्याय संहिता, अधिकृत गोपनीयता कायदा आणि बेकायदेशीर कारवाया प्रतिबंधक कायदा म्हणजेच यूएपीए अंतर्गत गुन्हे दाखल केले आहेत. विशेष म्हणजे, यापूर्वीही झफर रियाझ एका हेरगिरी प्रकरणात दोषी ठरला होता. त्यामुळे त्याच्यावर सुरक्षा यंत्रणांचे आधीपासून लक्ष असल्याचे सांगितले जात आहे. आरोपीविरोधात लूक आउट सर्क्युलर जारी करण्यात आले होते आणि त्याला ‘घोषित फरार आरोपी’ घोषित करण्याची प्रक्रिया सुरू असतानाच त्याला अटक करण्यात आली.
या प्रकरणामागे मोठे हेरगिरीचे जाळे असण्याची शक्यता एनआयएने व्यक्त केली आहे. आरोपीचे इतर देशांतर्गत आणि विदेशी संपर्क शोधण्यासाठी तपास अधिक तीव्र करण्यात आला आहे. पाकिस्तानशी संबंधित गुप्त नेटवर्क भारतात सक्रिय असल्याचा संशय असून, त्यादृष्टीने अनेक डिजिटल पुरावे आणि संवादांची चौकशी केली जात आहे. देशविरोधी कारवायांमध्ये सहभागी असलेल्या इतर व्यक्तींचाही शोध सुरू असल्याची माहिती अधिकाऱ्यांनी दिली.