इराणच्या परराष्ट्र मंत्रालयाचे प्रवक्ते इस्माईल बाघेई यांनी सांगितले की, इराण आणि अमेरिका यांच्यात पाकिस्तानमार्फत संदेशांची देवाणघेवाण सुरू असून तेहरान सध्या अमेरिकेच्या ताज्या भूमिकेचा आढावा घेत आहे. सरकारी वाहिनी आयआरआयबी टीव्हीला दिलेल्या मुलाखतीत बाघेई म्हणाले की, दोन्ही देशांदरम्यान अनेक वेळा संदेश पाठवले आणि प्राप्त झाले आहेत. लेबनॉनसह सर्व स्तरांवर युद्ध थांबवण्यावर इराणचा भर आहे. यासाठी इराणने काही स्पष्ट मागण्या केल्या आहेत. त्यात इराणची गोठवलेली मालमत्ता मुक्त करणे आणि इराणी जहाजांविरोधातील अमेरिकेची ‘समुद्री लूट’ तसेच शत्रुत्वपूर्ण कारवाया थांबवणे यांचा समावेश आहे.
इराणने कूटनीतिक प्रक्रियेत प्रामाणिकपणे आणि गांभीर्याने सहभाग घेतला असला, तरी गेल्या १८ महिन्यांतील अत्यंत खराब अनुभवांमुळे वॉशिंग्टनवर त्यांचा विश्वास उरलेला नाही, असेही त्यांनी स्पष्ट केले. बाघेई म्हणाले की, होर्मुज सामुद्रधुनीत कायमस्वरूपी सुरक्षितता सुनिश्चित करण्यासाठी इराण ओमानसोबत संयुक्त व्यवस्था उभारण्याचा प्रयत्न करत आहे. तसेच या महत्त्वाच्या समुद्री मार्गावर जहाजांची सुरक्षित वाहतूक सुनिश्चित करण्यासाठी इतर किनारी देशांसोबत नियम आणि प्रोटोकॉल तयार करण्यासही इराण तयार आहे.
इराणी चर्चापथकाशी संबंधित सूत्रांच्या हवाल्याने अर्ध-सरकारी तस्नीम वृत्तसंस्थेने म्हटले आहे की, इराणने तीन दिवसांपूर्वी १४ सूत्रीय प्रस्ताव दिल्यानंतर अमेरिकेने तेहरानला नवा मसुदा प्रस्ताव पाठवला आहे. वृत्तसंस्था सिन्हुआनुसार, मध्यस्थ सध्या तेहरानमध्ये उपस्थित असून दोन्ही बाजूंच्या मसुद्यांमध्ये सामंजस्य निर्माण करण्याचा प्रयत्न सुरू आहे. मात्र अद्याप कोणताही अंतिम निर्णय झालेला नाही.
बुधवारी इराणचे राष्ट्राध्यक्ष मसूद पेजेशकियन यांनी ‘एक्स’वर पोस्ट करत म्हटले की, इराणने नेहमीच आपल्या आश्वासनांचे पालन केले असून युद्ध टाळण्याचा प्रयत्न केला आहे. “आमच्याकडून सर्व मार्ग अद्याप खुले आहेत. दबाव टाकून इराणला झुकवण्याचा प्रयत्न हा केवळ भ्रम आहे,” असे त्यांनी म्हटले. इराण, अमेरिका आणि इस्रायल यांच्यात ८ एप्रिल रोजी युद्धविराम झाला होता. त्याआधी ४० दिवस संघर्ष सुरू होता. २८ फेब्रुवारी रोजी तेहरान आणि इराणमधील इतर शहरांवर अमेरिका आणि इस्रायलने संयुक्त हल्ले केल्यानंतर या संघर्षाची सुरुवात झाली होती.
हे ही वाचा
अभिषेक बॅनर्जींच्या मालमत्तांना नोटिसा आणि तृणमूल नगरसेवकाचा अध्यक्षपदाचा राजीनामा
“नरसंहाराचा इतिहास असलेल्या राष्ट्राने काश्मीरवर व्याख्यान देणे हा विरोधाभास”
पासपोर्ट पडताळणीसाठी लाचेची मागणी
जनादेश बुलडोझरसाठीच होता, माय लॉर्ड
युद्धविरामानंतर ११ आणि १२ एप्रिल रोजी पाकिस्तानची राजधानी इस्लामाबाद येथे इराण आणि अमेरिकेच्या प्रतिनिधींमध्ये चर्चा झाली होती. मात्र त्या चर्चेत कोणताही तोडगा निघाला नव्हता. युद्ध सुरू झाल्यानंतर इराणने होर्मुज सामुद्रधुनीवरील नियंत्रण अधिक मजबूत केले होते आणि अमेरिका व इस्रायलशी संबंधित जहाजांच्या वाहतुकीवर निर्बंध घातले होते. इस्लामाबादमधील चर्चा अपयशी ठरल्यानंतर अमेरिकेने या जलमार्गावर नौदल नाकेबंदी केली, त्यामुळे इराणी बंदरांकडे ये-जा करणाऱ्या जहाजांची वाहतूक ठप्प झाली.
