स्वतंत्र भारद्वाजला तीन आठवड्यांची अंतरिम जामीन मंजूर

जंतर-मंतर येथे झालेल्या कथित मारहाण प्रकरणात स्वतंत्र भारद्वाज यांना दिल्लीतील पटियाला हाउस कोर्टाने मोठा दिलासा दिला आहे. न्यायालयाने त्यांना तीन आठवड्यांची अंतरिम जामीन मंजूर केली आहे. अतिरिक्त सत्र न्यायाधीश सौरभ प्रताप सिंह ललर यांनी मंगळवारी हा आदेश दिला. भारद्वाज यांच्यावर सीजेपीच्या आंदोलनादरम्यान एका विद्यार्थी कार्यकर्त्याच्या वडिलांवर कथितपणे मारहाण केल्याचा आरोप आहे. या प्रकरणात ते न्यायालयीन कोठडीत होते.

या प्रकरणाला जुलैमध्ये जंतर-मंतर येथे झालेल्या आंदोलनाच्या पार्श्वभूमीवर सुरुवात झाली. भारद्वाज यांच्यावर आंदोलनादरम्यान तक्रारदारावर हल्ला केल्याचा आरोप करण्यात आला होता. या प्रकरणात दिल्ली पोलिसांनी त्यांच्याविरोधात गुन्हा दाखल केला असून पुढील तपासादरम्यान अनुसूचित जाती-जमाती अत्याचार प्रतिबंधक कायद्यासह अन्य कलमे जोडण्यात आली. याशिवाय पॉक्सो कायद्यांतर्गत स्वतंत्र प्रकरणही दाखल झाल्याची माहिती न्यायालयात देण्यात आली. पॉक्सोशी संबंधित बाबी असल्याने मागील सुनावणीदरम्यान न्यायालयाने प्रकरणाची सुनावणी बंद दाराआड घेण्याचा निर्णय घेतला होता.
हे ही वाचा:
“भारताच्या परराष्ट्र धोरणाला इतर देशांच्या प्रमाणपत्राची गरज नाही”

ओयो रूम बुकिंगवर पोलिसांची करडी नजर

स्वतंत्र भारद्वाज यांना सप्टेंबरच्या सुरुवातीला उत्तर प्रदेशातील बुलंदशहर येथून अटक करण्यात आली होती. त्यानंतर त्यांना न्यायालयीन कोठडीत पाठवण्यात आले. जामीन अर्जावरील सुनावणीदरम्यान बचाव पक्षाने ही अटक राजकीय दबावातून झाल्याचा दावा केला, तसेच प्रत्यक्ष मारहाण तक्रारदारानेच सुरू केल्याचा युक्तिवाद केला. दुसरीकडे, तक्रारदाराच्या वकिलांनी भारद्वाज यांच्यावर गंभीर आरोप करत व्हिडिओ पुराव्यांचा उल्लेख केला. दिल्ली पोलिसांनीही सुरुवातीच्या तक्रारीत जातिवाचक शिवीगाळीचा उल्लेख नसल्याचे, मात्र नंतरच्या पूरक जबाबात असा आरोप करण्यात आल्याचे न्यायालयाला सांगितले.