पंजाबच्या कायदा सुव्यवस्थेचे धिंडवडे; महिला इन्फ्लुएन्सरला झाडाला बांधून पेटवले

पंजाबी सोशल मीडिया इन्फ्लुएन्सर मनजीत कौर यांचे बुधवारी, २६ ऑगस्ट रोजी, चंदीगडमधील पीजीआयएमईआर रुग्णालयात निधन झाले. चंदीगडमधून त्यांचे अपहरण करून मोरिंडाजवळ झाडाला बांधून जाळण्यात आल्याच्या कथित घटनेनंतर जवळपास दोन महिने त्या मृत्यूशी झुंज देत होत्या.

मनजीत कौर यांची सोशल मीडियावर मोठी लोकप्रियता होती. त्यांच्या इन्स्टाग्रामवर सुमारे १.४६ लाख फॉलोअर्स होते. त्या नियमितपणे रील्स, लाइफस्टाइलविषयक सामग्री आणि विविध उत्पादनांच्या प्रचाराचे व्हिडिओ पोस्ट करत असत.

त्यांचे यूट्यूब चॅनेलही होते, ज्यावर सुमारे ३,९३० सबस्क्राइबर्स होते. या चॅनेलवर त्या कौटुंबिक व्लॉग पोस्ट करत होत्या. त्यांच्या इन्स्टाग्राम अकाउंटवर प्रामुख्याने छोटे व्हिडिओ, सौंदर्यप्रसाधनांच्या जाहिराती तसेच लोकप्रिय पंजाबी आणि हरियाणवी गाण्यांवरील रील्स पाहायला मिळत होत्या. त्यामुळे सोशल मीडियावरील त्यांच्या फॉलोअर्समध्ये त्या एक परिचित चेहरा बनल्या होत्या.

नेमके काय घडले?

त्यांची आई कांता देवी यांनी दाखल केलेल्या तक्रारीनुसार, ३ आणि ४ जुलैच्या मध्यरात्री, मनजीत यांना शुभी आणि पिंडा नावाच्या दोन ओळखीच्या व्यक्तींनी चंदीगडमधील सेक्टर ३४ येथे बोलावले होते.

आरोप आहे की, या दोघांनी मनजीत यांच्यावर हल्ला केला आणि त्यानंतर त्यांना जबरदस्तीने एका वाहनात बसवून मोरिंडाजवळील जंगल परिसरात नेले. पोलिसांच्या माहितीनुसार, आरोपींनी मनजीत यांना झाडाला बांधून आग लावली आणि तेथून पळ काढला. काही वेळानंतर त्यांचा आणखी एक परिचित व्यक्ती घटनास्थळी पोहोचला आणि ब्लँकेटच्या मदतीने आग विझवण्यात यशस्वी झाला.

या घटनेत मनजीत गंभीर भाजल्या होत्या. सुरुवातीला त्यांना मोरिंडामधील रुग्णालयात दाखल करण्यात आले. त्यानंतर त्यांना मोहालीतील मॅक्स हॉस्पिटलमध्ये हलवण्यात आले आणि नंतर चंदीगडमधील पीजीआयएमईआरमध्ये उपचारासाठी दाखल करण्यात आले.

हे ही वाचा:

रंजक इतिहास मांडणाऱ्या मुंबईकर कृष्णा शेषाद्रींशी मोदींनी केली ‘बात’

कर्मभूमीशी निष्ठा, जन्मभूमीशी नातं!; मोहन भागवतांचा संदेश

एचडीएफसी बँकेला धक्का; सीईओ जगदीशन पदावरून पायउतार

दारिद्र्याचे लक्षण |

तपास सुरू असतानाच मनजीत यांच्या वैयक्तिक आयुष्याबाबत सोशल मीडियावर अनेक दावे आणि अफवा पसरू लागल्या. २८ जुलै रोजी त्यांच्या इन्स्टाग्राम प्रोफाइलवरून करण्यात आलेल्या एका पोस्टमध्ये लोकांना अप्रमाणित माहिती पसरवू नये, असे आवाहन करण्यात आले होते. या अफवांमुळे कुटुंब आधीच गंभीर मानसिक तणावाखाली असल्याचेही पोस्टमध्ये म्हटले होते.

या पोस्टमध्ये मनजीत गर्भवती असल्याच्या दाव्यांवर आणि त्यांचा बॉयफ्रेंड रिंकू गिल या हल्ल्यासाठी जबाबदार असल्याच्या आरोपांवरही प्रतिक्रिया देण्यात आली होती. संपूर्ण सत्य समोर येण्यापूर्वी कोणाबाबतही खोटे दावे किंवा अफवा पसरवू नयेत, असे आवाहन करण्यात आले होते.

पोस्टमध्ये रिंकू गिल यांचा बचाव करताना असा सवाल करण्यात आला होता की, एखाद्या व्यक्तीला इजा पोहोचवायची असेल तर तोच व्यक्ती तिला वाचवण्याचा प्रयत्न करेल का? मनजीत यांच्या उपचाराचा खर्च गिल करत असल्याचाही दावा करण्यात आला होता.

या प्रकरणात मनजीत यांचा जबाब नोंदवण्यात झालेल्या कथित विलंबावरही प्रश्न उपस्थित झाले आहेत. सूत्रांच्या माहितीनुसार, पीजीआयएमईआरमध्ये उपचार सुरू असताना त्यांना शुद्ध आली होती आणि त्यांना पोलिसांना जबाब द्यायचा होता.