तामिळनाडूतील ५२ मंदिरांमध्ये स्मार्टफोनला बंदी

तामिळनाडू सरकारने राज्यातील ५२ प्रमुख मंदिरांमध्ये स्मार्टफोन नेण्यास आणि वापरण्यास बंदी घातली आहे. नव्या नियमांची अंमलबजावणी १ सप्टेंबरपासून सुरू झाली असून, मंदिरात प्रवेश करण्यापूर्वी भाविकांना आपले स्मार्टफोन निश्चित करण्यात आलेल्या काउंटरवर जमा करावे लागणार आहेत. मात्र, कॅमेरा नसलेल्या मोबाइल फोनना या बंदीतून सूट देण्यात आली आहे.

तामिळनाडूच्या हिंदू धार्मिक आणि धर्मादाय निधी (HR&CE) विभागाने हा निर्णय घेतला आहे. मद्रास उच्च न्यायालयाच्या यापूर्वीच्या निर्देशांनुसार ही कारवाई करण्यात आली असल्याचे सांगण्यात आले. मंदिर परिसरात फोटो काढणे, व्हिडिओ शूट करणे, सेल्फी घेणे आणि सोशल मीडियासाठी रिल्स बनवण्याच्या वाढत्या प्रकारांमुळे हा निर्णय घेण्यात आला आहे.

हे ही वाचा:

५.५ टन औषधांसह बचाव पथक घेऊन पाचवे विमान नेपाळकडे रवाना

होर्मुझवर अमेरिकेचे जवळपास पूर्ण नियंत्रण!

अमेरिकेकडून इराणमधील लग्नघरावर क्षेपणास्त्र हल्ला

धावत्या ट्रेनमध्ये दिवा लावून देवाची पूजा

मंदिरात येणाऱ्या भाविकांसाठी प्रवेशद्वाराजवळ विशेष मोबाइल डिपॉझिट काउंटर उभारण्यात आले आहेत. स्मार्टफोन जमा करताना प्रत्येक फोनसाठी ५ रुपये शुल्क आकारले जाणार आहे. दर्शनानंतर पावतीच्या आधारे भाविकांना त्यांचा मोबाइल परत दिला जाईल. मंदिर प्रशासनाने फोन सुरक्षित ठेवण्यासाठी विशेष व्यवस्था केल्याचेही सांगण्यात आले आहे. तामिळनाडूचे HR&CE मंत्री रमेश यांनी या निर्णयाची घोषणा केली. मंदिरांचे पावित्र्य आणि शांततापूर्ण वातावरण कायम राखणे हा या निर्णयामागील मुख्य उद्देश असल्याचे सरकारने स्पष्ट केले आहे.