पंतप्रधान नरेंद्र मोदी हे गयाना देशाच्या दौऱ्यावर असताना भारत आणि गयाना यांनी १० सामंजस्य करारांवर स्वाक्षरी केली आहे. या करारांमध्ये कृषी, औषध निर्मिती आणि कॅरिबियन राष्ट्रात युपीआयचा वापर यासारख्या महत्त्वाच्या क्षेत्रांचा समावेश आहे.
प्रमुख करारांमध्ये हायड्रोकार्बन्स क्षेत्रातील सहकार्यावर सामंजस्य करार, क्रूड सोर्सिंगमध्ये संयुक्त प्रयत्न, नैसर्गिक वायू सहयोग आणि पायाभूत सुविधांच्या विकासासाठी संयुक्त प्रयत्नांवर लक्ष केंद्रित करणे समाविष्ट आहे. हायड्रोकार्बन मूल्य शृंखलामध्ये क्षमता वाढवणे आणि कौशल्याची देवाणघेवाण करणे हे देखील या भागीदारीचे उद्दिष्ट आहे.
परराष्ट्र व्यवहार मंत्रालयाच्या अधिकृत प्रेस रिलीझनुसार, कृषी आणि संबंधित क्षेत्रांमधील द्विपक्षीय सहकार्यावरील सामंजस्य करार कृषी विकासाला पुढे नेण्यासाठी संयुक्त क्रिया, वैज्ञानिक सामग्री आणि तज्ञांची देवाणघेवाण वाढवण्याचा प्रयत्न करणार आहे.
सांस्कृतिक वारसा साजरा करण्यासाठी आणि जतन करण्यासाठी, सांस्कृतिक देवाणघेवाण कार्यक्रमावर (२०२४-२०२७) स्वाक्षरी करण्यात आली. यामध्ये नाट्य, संगीत, ललित कला, साहित्य, ग्रंथालये आणि संग्रहालयांमधील सहकार्यावर भर देण्यात आली आहे. वैद्यकीय नियमन सुधारण्यासाठी भारतीय फार्माकोपिया रेग्युलेशनच्या मान्यतेवर सामंजस्य करार आणि CARICOM देशांना परवडणारी औषधे पुरवण्यासाठी जनऔषधी योजना (PMBJP) लागू करण्याच्या करारांसह आरोग्य क्षेत्रातही महत्त्वाचे करार झाले. फार्मास्युटिकल आणि वैद्यकीय क्षेत्रात कच्चा माल, जैविक उत्पादने, वैद्यकीय उपकरणे आणि सौंदर्यप्रसाधने यांचे नियमन करण्यासाठी स्वतंत्र सामंजस्य करार करण्यात आला, ज्यामुळे दोन्ही राष्ट्रांमधील संवादासाठी एक मजबूत फ्रेमवर्क तयार करण्यात आले.
डिजिटल आघाडीवर, INDIA STACK सामंजस्य करार हा प्रशिक्षण कार्यक्रम आणि पायलट प्रकल्पांद्वारे डिजिटल परिवर्तनामध्ये सहकार्यासाठी पाया घालण्याचे काम करणार आहे. शिवाय, NPCI इंटरनॅशनल पेमेंट्स लिमिटेड आणि गयानाच्या परराष्ट्र व्यवहार मंत्रालय यांच्यातील कराराचा उद्देश या देशात डिजिटल व्यवहारांचे रूपांतर करून UPI सारखी रिअल- टाइम पेमेंट प्रणाली चालू करणे आहे.
हे ही वाचा:
गौतम अदानी यांच्यावर अमेरिकेत २६५ दशलक्ष डॉलर्सची लाच दिल्याचा आरोप
सिंधमधून १० वर्षीय हिंदू मुलीचे अपहरण आणि धर्मांतर करून केला निकाह
लोकांच्या जीवाशी खेळणाऱ्या सुजित पाटकरांचा जामीन फेटाळला
वांगी ते बिटकॉईन एक चित्तथरारक प्रवास…
प्रसार भारती आणि गयानाचे राष्ट्रीय संप्रेषण नेटवर्क यांच्यात संस्कृती, शिक्षण, विज्ञान आणि क्रीडा क्षेत्रातील कार्यक्रमांची देवाणघेवाण करण्यासाठी करार झाला. याव्यतिरिक्त, गयानाची राष्ट्रीय संरक्षण संस्था (NDI) आणि भारताचे राष्ट्रीय रक्षा विद्यापीठ (RRU) यांच्यातील संरक्षण- केंद्रित सामंजस्य करार हा राष्ट्रीय सुरक्षा आणि संरक्षण अभ्यासांमध्ये शिक्षण, संशोधन आणि प्रशिक्षण वाढविण्याचा प्रयत्न करणार आहे.
