दुर्गम बेटावर हँटाव्हायरसचा संशयित रुग्ण

दक्षिण अटलांटिक महासागरातील जगातील सर्वात दुर्गम वसाहतींपैकी एक मानल्या जाणाऱ्या ट्रिस्टन दा कुन्हा बेटावर हँटाव्हायरसचा संशयित रुग्ण आढळल्याने जागतिक आरोग्य यंत्रणांची चिंता वाढली आहे. हा रुग्ण ‘एमव्ही होंडियस’ या लक्झरी क्रूझ जहाजाशी संबंधित असल्याची माहिती समोर आली आहे. या जहाजावर आधीच हँटाव्हायरसचा उद्रेक झाल्याने तीन प्रवाशांचा मृत्यू झाला असून अनेक प्रवासी उपचार घेत आहेत.
‘एमव्ही होंडियस’ हे जहाज एप्रिल महिन्यात अर्जेंटिनातून निघाले होते. प्रवासादरम्यान काही प्रवाशांमध्ये गंभीर श्वसनासंबंधी लक्षणे दिसू लागली. सुरुवातीला ही सामान्य वैद्यकीय समस्या असल्याचे मानले गेले, मात्र नंतर तपासात हँटाव्हायरसचा संसर्ग असल्याचे स्पष्ट झाले. या जहाजाने १३ ते १५ एप्रिलदरम्यान ट्रिस्टन दा कुन्हा बेटावर थांबा घेतला होता. याच दरम्यान काही प्रवासी बेटावर उतरल्याची माहिती समोर आली आहे.
हे ही वाचा:
पार्किंग करताना मुलाने घेतला वडिलांचा जीव

हाफिज सईदचा निकटवर्तीय दहशतवादी इस्माईल अहमद आढळला मृतावस्थेत
ब्रिटनमधील आरोग्य अधिकाऱ्यांनी सांगितले की, संशयित रुग्ण हा ब्रिटिश नागरिक असून तो सध्या बेटावर वैद्यकीय देखरेखीखाली आहे. बेटावरील आणखी एका व्यक्तीला रुग्णालयात दाखल करण्यात आले आहे, तर काहींना स्वतःला विलगीकरणात ठेवण्याचा सल्ला देण्यात आला आहे. बेटाची लोकसंख्या अवघी २०० च्या आसपास असल्याने स्थानिक प्रशासन अधिक सतर्क झाले आहे.
जागतिक आरोग्य संघटनेने या प्रकरणावर बारकाईने लक्ष ठेवले असून आणखी रुग्ण समोर येण्याची शक्यता नाकारलेली नाही. मात्र सध्या सर्वसामान्य नागरिकांसाठी धोका कमी असल्याचे सांगण्यात आले आहे. अमेरिकेच्या ‘सीडीसी’ने या उद्रेकाला ‘लेव्हल-३’ आपत्कालीन प्रतिसाद श्रेणीत वर्गीकृत केले आहे. ही सर्वात कमी गंभीर श्रेणी असली तरी आंतरराष्ट्रीय पातळीवर संपर्क शोध मोहीम वेगाने सुरू आहे.
हँटाव्हायरस हा प्रामुख्याने उंदरांच्या संपर्कातून पसरणारा विषाणू मानला जातो. मात्र ‘अँडीज’ प्रकारातील हँटाव्हायरस माणसांमधूनही पसरण्याची शक्यता असल्याने अधिक चिंता व्यक्त केली जात आहे. जहाजावरील संसर्ग याच प्रकाराशी संबंधित असल्याचे सांगितले जात आहे.
दरम्यान, हे जहाज स्पेनच्या टेनेरिफ बेटाकडे रवाना झाले असून तेथे प्रवाशांना उतरवण्याची तयारी सुरू आहे. विविध देशांतील आरोग्य यंत्रणा संभाव्य संक्रमित प्रवाशांचा शोध घेत आहेत. ब्रिटन, दक्षिण आफ्रिका, नेदरलँड्स, जर्मनी आणि स्वित्झर्लंडमध्ये काही प्रवाशांवर उपचार सुरू असल्याची माहिती आहे.