अमेरिका आणि इराण यांच्यातील उच्चस्तरीय चर्चेची पहिली फेरी रविवारी तणावपूर्ण वातावरणात पार पडली. अमेरिकेचे राष्ट्राध्यक्ष डोनाल्ड ट्रम्प यांनी इराणविरोधात नव्या लष्करी कारवाईचा इशारा दिल्यानंतर संतप्त झालेल्या इराणी शिष्टमंडळाने अमेरिकी अधिकाऱ्यांसोबत नियोजित संयुक्त छायाचित्रणास नकार देत चर्चास्थळाचा तात्पुरता त्याग केला.
स्वित्झर्लंडमधील बर्गेनस्टॉक रिसॉर्ट येथे इस्लामाबाद सामंजस्य कराराअंतर्गत अमेरिका, इराण, पाकिस्तान आणि कतार यांच्या सहभागाने चर्चेची पहिली फेरी आयोजित करण्यात आली होती. बैठकीपूर्वी दोन्ही देशांच्या प्रतिनिधींमध्ये हस्तांदोलन आणि संयुक्त छायाचित्रणाचे आयोजन करण्यात आले होते. मात्र, इराणचे मुख्य वाटाघाटीकार मोहम्मद बागेर गालिबाफ आणि परराष्ट्र मंत्री अब्बास अराघची यांनी या कार्यक्रमात सहभागी होण्यास नकार दिला.
समोर आलेल्या एका व्हिडिओमध्ये अब्बास अराघची यांनी पाकिस्तानी पंतप्रधान शहबाज शरीफ यांना काही संदेश दिल्यानंतर अचानक इराणी शिष्टमंडळासह सभागृहातून बाहेर पडल्याचे दिसून आले. या घटनेमुळे उपस्थितांमध्ये काही काळ गोंधळाचे वातावरण निर्माण झाले. त्यानंतर शरीफ आणि पाकिस्तानचे लष्करप्रमुख असिम मुनीर यांच्यात चर्चा झाल्याचेही व्हिडिओमध्ये दिसून आले. इराणी अधिकाऱ्यांनी या फोटोसेशनला अमेरिकेचा “मीडिया शो” संबोधत त्याविरोधात आक्षेप घेतल्याची माहिती तसनीम वृत्तसंस्थेने दिली. मात्र, तणाव असूनही काही काळासाठी इराणी आणि अमेरिकी प्रतिनिधी एकाच सभागृहात उपस्थित होते. या वेळी अराघची यांनी शहबाज शरीफ यांची भेट घेतली, तर अमेरिकेचे उपराष्ट्रपती जेडी व्हान्सही तेथे उपस्थित होते.
दरम्यान, चर्चेदरम्यानच ट्रम्प यांनी सोशल मीडियावर इराणला कठोर इशारा दिला. लेबनॉनमधील हिजबुल्लाहला पाठिंबा थांबवावा, अन्यथा इराणवर पुन्हा अधिक तीव्र हल्ले केले जातील, असे त्यांनी म्हटले. या वक्तव्याच्या निषेधार्थ इराणी शिष्टमंडळाने चर्चास्थळ सोडल्याचे इराणी माध्यमांनी वृत्त दिले.
हे ही वाचा:
पाणी अडवल्यास युद्ध! पाकिस्तानच्या संरक्षण मंत्र्यांची भारताला धमकी
अमेरिका-इराण ६० दिवसांच्या शांतता आराखड्यावर सहमत
वाराणशीतील मशिदीबाबत पाकिस्तानला कळवळा, भारताने सुनावले
‘सत्तेशिवाय विकासकामे होत नाहीत’
सुमारे ८० मिनिटे चाललेल्या पहिल्या फेरीत युद्ध समाप्ती, आर्थिक निर्बंधांमध्ये सवलत आणि इराणचा गोठवलेला निधी मुक्त करणे या मुद्द्यांवर चर्चा झाली. अमेरिकेच्या शिष्टमंडळाचे नेतृत्व उपराष्ट्रपती जेडी व्हान्स यांनी केले, तर पाकिस्तानचे पंतप्रधान शहबाज शरीफ आणि कतारचे पंतप्रधान शेख मोहम्मद बिन अब्दुल रहमान अल थानी यांनी मध्यस्थीची भूमिका पार पाडली. तणावपूर्ण सुरुवात असूनही चर्चेत काही सकारात्मक संकेत दिसून आले आहेत. अंतिम शांतता करारासाठी ६० दिवसांच्या कृती आराखड्याला दोन्ही देशांची संमती मिळाल्याचे कतार आणि पाकिस्तान यांनी स्पष्ट केले.
