पंतप्रधान नरेंद्र मोदी आपल्या तीन देशांच्या दौऱ्याच्या अखेरच्या टप्प्यात न्यूझीलंडमध्ये दाखल झाले आहेत. न्यूझीलंडचे पंतप्रधान ख्रिस्तोफर लक्सन यांनी ऑकलंड विमानतळावर पंतप्रधान मोदी यांचे मिठी मारून स्वागत केले. यावेळी न्यूझीलंडमधील भारताच्या उच्चायुक्त मुआनपुई सैयावी यांच्यासह न्यूझीलंड सरकारचे अनेक वरिष्ठ अधिकारी उपस्थित होते.
पंतप्रधान ख्रिस्तोफर लक्सन यांनी स्वागताचा व्हिडीओ सोशल मीडिया प्लॅटफॉर्म ‘एक्स’वर शेअर करत, “पंतप्रधान नरेंद्र मोदी, न्यूझीलंडमध्ये आपले स्वागत आहे,” असे लिहिले. दरम्यान, न्यूझीलंडमध्ये वास्तव्यास असलेल्या भारतीय समुदायाने पारंपरिक सांस्कृतिक नृत्य सादर करून पंतप्रधान मोदी यांचे जल्लोषात स्वागत केले. पंतप्रधान मोदी यांनीही ‘एक्स’वर पोस्ट करत उबदार स्वागताबद्दल पंतप्रधान लक्सन यांचे आभार मानले.
मोदी यांनी आपल्या पोस्टमध्ये म्हटले, “काही वेळापूर्वीच मी ऑकलंडमध्ये दाखल झालो. विमानतळावर स्वागत केल्याबद्दल पंतप्रधान लक्सन यांचे मनःपूर्वक आभार. हा दौरा ऐतिहासिक आहे. गेल्या चार दशकांतील भारतीय पंतप्रधानांचा हा पहिलाच न्यूझीलंड दौरा आहे. पंतप्रधान लक्सन यांच्यासोबत चर्चा करण्यास आणि भारत-न्यूझीलंड मैत्रीला आणखी बळकटी देण्यासाठी सर्वसमावेशक संवाद साधण्यास मी उत्सुक आहे. तसेच उद्या (शनिवारी) ऑकलंड येथे आयोजित भारतीय समुदायाच्या कार्यक्रमालाही मी संबोधित करणार आहे.”
पंतप्रधान मोदी यांच्या आगमनापूर्वीच न्यूझीलंडमधील भारतीय समुदायामध्ये मोठा उत्साह पाहायला मिळाला. अनेकांनी त्यांचे स्वागत करण्यासाठी आतुरतेने वाट पाहत असल्याचे सांगितले. आयएएनएसशी बोलताना भारतीय समुदायातील सदस्यांनी या दौऱ्याला ऐतिहासिक आणि महत्त्वाचा टप्पा असल्याचे म्हटले. गेल्या ४० वर्षांत भारतीय पंतप्रधानांचा हा पहिलाच न्यूझीलंड दौरा असल्यामुळे हा क्षण संस्मरणीय असल्याचे त्यांनी नमूद केले.
हे ही वाचा:
“अटक झाली तरी चालेल” डिसेंबरमध्ये बांगलादेशात परतणार शेख हसीना
बीएचयूमध्ये झाडांची बेकायदा तोड महागात; २.६५ कोटींची भरपाई
‘फिलिप्स’च्या आरोग्यसेवा AI सोल्युशनसाठी भारताला पसंती
वन्यजीव तस्कर अडकले जाळ्यात; सीबीआय, डीआरआयची कारवाई
पंतप्रधान मोदी यांच्या स्वागतासाठी सांस्कृतिक कार्यक्रम सादर करणाऱ्या एका सदस्याने सांगितले, “पंतप्रधान मोदींसमोर सादरीकरण करण्यासाठी आम्ही अत्यंत उत्साहित आहोत. ते ४० वर्षांनंतर न्यूझीलंडमध्ये येत आहेत. याशिवाय ‘वंदे मातरम्’च्या १५० व्या वर्धापनदिनाचेही औचित्य असल्याने हा क्षण आमच्यासाठी अधिक खास आहे. हा कार्यक्रम संस्मरणीय करण्यासाठी आमचा संपूर्ण समूह उत्सुक आहे.” दुसऱ्या एका सहभागीने सांगितले, “पंतप्रधान नरेंद्र मोदी यांच्यासमोर भारतीय संस्कृती आणि आपला समृद्ध सांस्कृतिक वारसा सादर करण्याची संधी आयुष्यात एकदाच मिळते. त्यामुळे मी अत्यंत आनंदी आणि उत्साही आहे. या ऐतिहासिक क्षणाचा भाग बनणे ही माझ्यासाठी अभिमानाची बाब आहे.”
