अमेरिका-इराण शांतता करारावर स्वाक्षऱ्या झाल्यानंतर जगभरात त्याची चर्चा सुरू असतानाच अमेरिकेचे संरक्षणमंत्री पीथ हेगसेथ यांनी इराणला कठोर इशारा दिला आहे. करारातील अटींचे पालन न केल्यास अमेरिका पुन्हा लष्करी कारवाई करू शकते आणि आर्थिक तसेच नौदल नाकेबंदीही पुन्हा लागू करू शकते, असे त्यांनी स्पष्ट केले.
नाटो संरक्षणमंत्र्यांच्या बैठकीदरम्यान बोलताना हेगसेथ यांनी अमेरिकेची भूमिका स्पष्ट केली. अमेरिकेच्या संरक्षण विभागाने प्रसिद्ध केलेल्या व्हिडिओ संदेशात त्यांनी म्हटले की, “इराणने करारातील अटींचे पालन केले नाही, तर अमेरिका पुन्हा लष्करी कारवाई सुरू करण्यास तयार आहे. तसेच आवश्यक असल्यास नाकेबंदीही पुन्हा लागू केली जाऊ शकते.” बैठकीनंतर पत्रकारांशी बोलताना त्यांनी सांगितले की, अमेरिकेचे राष्ट्राध्यक्ष डोनाल्ड ट्रम्प यांनी याबाबत स्पष्ट भूमिका घेतली आहे. ठरवून दिलेल्या कालमर्यादेत इराणने आपली आश्वासने पूर्ण केली नाहीत, तर अमेरिका पुढील कठोर पावले उचलण्यास मागे हटणार नाही, असे त्यांनी नमूद केले.
हेगसेथ म्हणाले, “इराणने नियमांचे पालन केले नाही तर आम्ही पुन्हा एकदा कठोर आणि पूर्णपणे प्रभावी नाकेबंदी लागू करण्यास सक्षम आहोत.” यावेळी त्यांनी नाटोमधील काही युरोपीय देशांवरही टीका केली. इराण संघर्षाच्या काळात काही सहयोगी देशांनी अमेरिकेला अपेक्षित सहकार्य दिले नाही, असा आरोप त्यांनी केला. अमेरिका अनेक दशकांपासून युरोपच्या सुरक्षेसाठी मोठी भूमिका बजावत आली आहे, मात्र अलीकडील परिस्थितीत काही मित्रदेशांचा प्रतिसाद निराशाजनक असल्याचे त्यांनी म्हटले.
त्यांच्या म्हणण्यानुसार, राष्ट्राध्यक्ष ट्रम्प यांनी आधीच स्पष्ट केले होते की, अमेरिकन लढाऊ विमाने युरोपमधील तळांवरून उड्डाण करून किंवा अमेरिकन नौदलाची जहाजे बंदरांमधून रवाना होऊन मध्य पूर्वेतील अशा इराणी ठिकाणांवर कारवाई करू शकतात, जे युरोपीय हितांसाठीही धोका मानले जातात. मात्र, काही सहयोगी देशांनी या कारवाईला संमती दिली नाही किंवा विविध कायदेशीर मुद्दे उपस्थित करून प्रक्रिया गुंतागुंतीची केली, असा आरोप हेगसेथ यांनी केला. काही देशांनी सार्वजनिकरित्या अमेरिकेवर टीका केली, पण स्वतः मात्र अशा कारवाईसाठी ना सक्षम होते ना तयार, असेही त्यांनी म्हटले. “अशा भूमिकेमुळे अमेरिकन सैनिकांच्या जीवाला धोका निर्माण होतो. आवश्यक हवाई मार्ग आणि लष्करी प्रवेश सुविधा देण्यास नकार दिल्यामुळे मोहिमांमध्ये अडथळे निर्माण होतात. ही प्रक्रिया अधिक सुलभ असायला हवी होती,” असेही त्यांनी नमूद केले.
हे ही वाचा:
घुसखोरीमुळे स्थानिक लोकसंख्या रचनेत होतोय बदल
फाल्टा पोलीस ठाण्यावर हल्ला प्रकरणी सात जण अटकेत
पाकिस्तानातील गुरुद्वारात वृद्ध शीख दाम्पत्याची गोळ्या झाडून हत्या
पोस्ट केली, नंतर एडिट केली! अमेरिका-इराण कराराबाबत घोषणेची पाकिस्तानची घाई
अमेरिका-इराण शांतता करारानंतर तणाव कमी होण्याची अपेक्षा व्यक्त केली जात असली, तरी अमेरिकेच्या संरक्षणमंत्र्यांच्या या वक्तव्यामुळे वॉशिंग्टन इराणच्या हालचालींवर बारकाईने लक्ष ठेवून असल्याचे स्पष्ट झाले आहे. तसेच कराराचे उल्लंघन झाल्यास कठोर लष्करी आणि आर्थिक कारवाईचा पर्याय अमेरिका खुला ठेवणार असल्याचा संदेशही या वक्तव्यातून देण्यात आला आहे.