दिल्ली विमानतळावर स्पाइसजेट आणि आकासा एअर विमानांच्या पंखाची ऐकमेकांना धडक

दिल्लीतील इंदिरा गांधी आंतरराष्ट्रीय विमानतळ येथे गुरुवारी (१६ एप्रिल २०२६) दोन प्रवासी विमानांमध्ये धडक होण्याची घटना घडली. स्पाइसजेटचे विमान टॅक्सींग करत असताना आकासा एअरच्या स्थिर उभ्या असलेल्या विमानाला धडकले. या घटनेत दोन्ही विमानांचे नुकसान झाले असले तरी सुदैवाने कोणतीही जीवितहानी झालेली नाही.

मिळालेल्या माहितीनुसार, ही घटना दुपारी सुमारे २.१५ वाजण्याच्या सुमारास घडली. आकासा एअरचे विमान दिल्लीहून हैदराबादकडे जाण्यासाठी (फ्लाइट क्यूपी-१४०६) तयार होते आणि ते त्या वेळी स्थिर स्थितीत होते. त्याच वेळी स्पाइसजेटचे बोईंग ७३७-७०० विमान टॅक्सींग करत असताना या विमानाला धडकले.
हे ही वाचा:
आरक्षणातून महिलांना काहीतरी देत आहोत हा भ्रम नको; तो त्यांचा हक्क!

“मूल हवे असल्यास पत्नीला पाठव” नाशिक कॉर्पोरेट जिहाद प्रकरणातून धक्कादायक खुलासे

या धडकेत स्पाइसजेट विमानाच्या उजव्या विंगलेटला नुकसान झाले, तर आकासा एअर विमानाच्या डाव्या बाजूच्या ‘आडवा स्थिरक’ (हॉरिझॉन्टल स्टॅबिलायझर) भागाला फटका बसला. घटनेनंतर दोन्ही विमानांना तात्काळ ग्राउंड करण्यात आले असून त्यांची तपासणी सुरू करण्यात आली आहे.

आकासा एअरने अधिकृत निवेदनात सांगितले की, त्यांच्या विमानातील सर्व प्रवासी आणि कर्मचाऱ्यांना सुरक्षितपणे खाली उतरवण्यात आले असून त्यांच्यासाठी पर्यायी प्रवासाची व्यवस्था करण्यात येत आहे. दुसरीकडे, स्पाइसजेटनेही ही घटना मान्य केली असून संबंधित विमान दिल्ली विमानतळावरच तपासणीसाठी थांबवण्यात आले आहे.

या घटनेमुळे काही वेळ विमानतळावरील उड्डाणे आणि हालचालींवर परिणाम झाला. मात्र, मोठा अपघात टळल्यामुळे प्रशासनाने दिलासा व्यक्त केला आहे. प्राथमिक माहितीनुसार, ही धडक किरकोळ स्वरूपाची असली तरी सुरक्षेच्या दृष्टीने ती गंभीर मानली जात आहे.

विमानतळ प्रशासन आणि नागरी उड्डाण महासंचालनालय (डीजीसीए) या घटनेची सखोल चौकशी करणार असून टॅक्सींगदरम्यान सुरक्षा नियमांचे पालन झाले का, याचा तपास केला जाणार आहे. भविष्यात अशा घटना टाळण्यासाठी आवश्यक उपाययोजना केल्या जाण्याची शक्यता आहे.

ही घटना पुन्हा एकदा विमानतळावरील ग्राउंड ऑपरेशन्स आणि समन्वयातील सुरक्षेचे महत्त्व अधोरेखित करते. व्यस्त विमानतळांवर अशा प्रकारच्या चुका गंभीर परिणाम घडवू शकतात, त्यामुळे याकडे गांभीर्याने पाहिले जात आहे.