संयुक्त अरब अमिराती (UAE)ने वाढत्या सुरक्षेच्या धोक्याच्या पार्श्वभूमीवर ४ मे ते ११ मे दरम्यान आपले हवाई क्षेत्र अंशतः बंद केले आहे. ‘नोटिस टू एअरमेन’ (NOTAM A1722/26) अंतर्गत एमिरेट्स फ्लाइट इन्फॉर्मेशन क्षेत्रात व्यावसायिक उड्डाणांना मर्यादित मार्गांपुरते निर्बंध घालण्यात आले आहेत. मात्र, अमेरिकन आणि सहयोगी दलांची उपस्थिती असलेले अल धफरा एअर बेस मर्यादित ऑपरेशनसह सुरू ठेवण्यात आले आहे. दरम्यान, सोमवारी (४ मे) झालेल्या हवाई हल्ल्यात तीन भारतीय जखमी झाल्याची माहिती समोर आली आहे.
यूएईच्या संरक्षण मंत्रालयानुसार, ४ मे २०२६ रोजी इराणकडून १२ बॅलिस्टिक क्षेपणास्त्रे, ३ क्रूझ क्षेपणास्त्रे आणि ४ ड्रोन डागण्यात आले. यापैकी बहुतेक हल्ले हवाई संरक्षण यंत्रणांनी निष्प्रभ केले, तर एक क्रूझ क्षेपणास्त्र समुद्रात कोसळले. या हल्ल्यात तीन जण जखमी झाल्याची पुष्टी करण्यात आली आहे.
मंत्रालयाने पुढे सांगितले की, या संघर्षाच्या सुरुवातीपासून आतापर्यंत यूएईच्या हवाई संरक्षण यंत्रणांनी एकूण ५४९ बॅलिस्टिक क्षेपणास्त्रे, २९ क्रूझ क्षेपणास्त्रे आणि २,२६० ड्रोन रोखले आहेत. या काळात २२७ जण जखमी झाले असून, त्यामध्ये अनेक देशांच्या नागरिकांचा समावेश आहे. आतापर्यंत १० नागरिकांनी आपला जीव गमावला आहे, ज्यात भारतीय नागरिकांचाही समावेश आहे.
सोमवारी झालेल्या ताज्या हल्ल्यात फुजैरा ऑइल इंडस्ट्री झोनला लक्ष्य करण्यात आले, जो यूएईसाठी एक महत्त्वाचा ऊर्जा केंद्र आहे. या हल्ल्यात ड्रोनच्या माध्यमातून आग लागली, जी नियंत्रणात आणण्यासाठी बचाव पथके तैनात करण्यात आली. या घटनेत तीन भारतीय नागरिक जखमी झाले आहेत. अबू धाबी येथील भारतीय दूतावासाने याची पुष्टी केली असून, ते स्थानिक प्रशासनाच्या संपर्कात आहेत आणि जखमींना आवश्यक वैद्यकीय मदत दिली जात आहे. दूतावासाने सांगितले, “फुजैरामध्ये झालेल्या हल्ल्यात तीन भारतीय नागरिक जखमी झाले आहेत. त्यांच्या उपचारासाठी आम्ही स्थानिक अधिकाऱ्यांसोबत समन्वय साधत आहोत.”
हे ही वाचा:
टागोर यांच्या जयंतीदिनी, पश्चिम बंगालमध्ये नवे सरकार घेणार शपथ
आरजी कर प्रकरणाचा तृणमूलला दणका; पानीहाटीमध्ये भाजपच्या रत्ना देबनाथ यांचा विजय
युक्रेनला कठोर इशारा देत रशियाकडून एकतर्फी युद्धविराम
चीनच्या हुनान प्रांतात फटाका कारखान्यात स्फोट; २१ जणांचा मृत्यू
हल्ल्यादरम्यान दुबई आणि अबू धाबीतील रहिवाशांना संभाव्य क्षेपणास्त्र धोक्याबाबत सतर्कतेचे इशारे देण्यात आले. दरम्यान, इराणी माध्यमांच्या अहवालानुसार, इराणच्या नौदलाने होर्मुज सामुद्रधुनीजवळ आपल्या कारवायांचा विस्तार केला आहे. यूएईच्या परराष्ट्र मंत्रालयाने या हल्ल्यांना विश्वासघातकी ठरवत म्हटले आहे की, देश आपल्या सार्वभौमत्व आणि सुरक्षेच्या रक्षणासाठी योग्य ती कारवाई करण्याचा अधिकार राखून ठेवतो. हा इशारा संभाव्य प्रत्युत्तरात्मक कारवाईचे संकेत म्हणून पाहिला जात आहे.
