अमेरिकेतील ‘तो’ मूर्ख कोण? मार्को रुबियो यांच्या वक्तव्यानंतर चर्चांना उधाण

अमेरिकेचे परराष्ट्र सचिव मार्को रुबियो हे चार दिवसांच्या भारत दौऱ्यावर होते. रुबियो हे काहीसे राजकीय दबावाखाली असल्याच्या चर्चा सुरू आहेत. याचे कारण म्हणजे त्यांचे नेते अमेरिकेचे राष्ट्राध्यक्ष डोनाल्ड ट्रम्प यांनी भारतासंबंधी केलेले वादग्रस्त वक्तव्य. ‘नरक’ या टीकेवरून एका पत्रकाराने रुबियो यांना घेरल्यानंतर, ट्रम्प यांनी पूर्वी केलेल्या आणि आता रुबियो यांच्या व्हायरल झालेल्या ‘अमेरिकेतील मूर्ख लोक’ या वक्तव्यावरून राजकीय वर्तुळात नव्या चर्चांना उधाण आले आहे. सोशल मीडियावर यासंबंधी चर्चा सुरू होताच अमेरिकेच्या परराष्ट्र खात्याने ती पोस्ट गुपचूप काढून टाकली आहे. सोशल मीडियावर एक प्रश्न आधीच विचारला जात आहे की, रुबियो नेमके कोणाला ‘मूर्ख लोक’ म्हणाले? त्यांनी आपल्याच बॉसविषयी असे भाष्य केले होते का? असे प्रश्न उपस्थित केले जात आहेत.

२४ मे रोजी झालेल्या पत्रकार परिषदेत रुबियो यांना अमेरिकेकडून येणाऱ्या भारतविरोधी आणि वंशद्वेषी वक्तव्यांना कथित पाठिंबा दिल्याबद्दल विचारण्यात आले. हा संदर्भ, भारताला ‘नरक’ संबोधणाऱ्या एका अमेरिकन पॉडकास्टरच्या वक्तव्याला ट्रम्प यांनी दिलेल्या पाठिंब्याशी संबंधित होता. यावेळी रुबियो यांनी विचारले की, त्या टिप्पण्या कोणी केल्या? तेव्हा पत्रकाराने ट्रम्प यांचे थेट नाव न घेता उत्तर देणे टाळले. त्यांनी सांगितले की, टिप्पण्या “बऱ्यापैकी ज्ञात” होत्या आणि त्यांना पाठिंबाही होता. त्यानंतर रुबियो यांना पत्रकाराचा इशारा समजला होता की नाही हे सांगता येत नाही. कारण, पुढे रुबियो म्हणाले की, “मला खात्री आहे की ऑनलाइन आणि इतर ठिकाणीही लोकांनी टीका-टिप्पणी केली असेल, कारण जगातल्या प्रत्येक देशात मूर्ख लोक असतात.” पत्रकाराने नंतर स्पष्ट केले की त्याचा प्रश्न ट्रम्प यांच्या ‘हेलहोल’ (नरक) पोस्टसंदर्भात होता.

गेल्या महिन्यात, ट्रम्प यांनी एका उजव्या विचारसरणीच्या पॉडकास्टचे प्रतिलेखन पोस्ट केले, ज्यामध्ये सूत्रसंचालक मायकल सॅव्हेज यांनी देशात जन्मलेल्या प्रत्येकाला मिळणाऱ्या अमेरिकेच्या नागरिकत्वाच्या घटनात्मक अधिकारावर टीका केली होती. भारत आणि चीनवर विशेषाधिकाराचा गैरवापर केल्याचा आरोप करत, त्या देशांना ‘नरक’ म्हटले.

रुबियो हे कोणाला ‘मूर्ख’ म्हणत होते हे जरी अज्ञात असले तरी, टीकाकारांनी लगेचच हे निदर्शनास आणून दिले की, अमेरिकेच्या या सर्वोच्च अधिकाऱ्याने नकळतपणे किंवा अजाणतेपणे ट्रम्प यांच्या वक्तव्यांना अप्रत्यक्षपणे ‘मूर्खपणा’ असे संबोधले होते. परंतु रुबियो आणि ट्रम्प यांच्यातील पूर्वीचा तणाव लक्षात घेता, हा अमेरिकेच्या राष्ट्राध्यक्षांवर केलेला एक अनपेक्षित हल्ला होता, अशाही चर्चा सुरू आहेत.

हे ही वाचा:

मालदा येथे न्यायिक अधिकाऱ्यांना ओलीस ठेवल्याप्रकरणी १५ जणांना अटक

पश्चिम बंगालच्या नव्या मुख्य निवडणूक अधिकारीपदी नीलम मीणा

राजस्थानमधील सरकारी रुग्णालयांत पाच गर्भवती महिलांचा मृत्यू

१५० कोटींच्या कर्ज घोटाळ्यात अनिल अंबानी समूहावर फसवणुकीचा नवा गुन्हा

अमेरिकेच्या परराष्ट्र खात्यानेही एक्सवर रुबियो यांची टिप्पणी शेअर केली होती. मात्र, वाद वाढत गेल्यावर त्यांनी ती पोस्ट गुपचूप काढून टाकली. “परराष्ट्र विभागाने सुरुवातीला हा संवाद ऑनलाइन प्रसिद्ध केला होता, परंतु रुबियो यांच्या उत्तरातून अप्रत्यक्षपणे ट्रम्प यांच्या वक्तव्यांना मूर्खपणाचे ठरवले जात आहे, असे लोकांनी निदर्शनास आणून दिल्यानंतर तो नंतर काढून टाकला,” असे अमेरिकन राजकीय भाष्यकार एड क्रासेनस्टाईन यांनी ट्विट केले.