पंतप्रधान मोदी यांना उझबेकिस्तानचा सर्वोच्च नागरी सन्मान

पंतप्रधान मोदी यांना ताश्कंदमध्ये राष्ट्राध्यक्ष शौकत मिर्झियोयेव यांच्या हस्ते उझबेकिस्तानचा सर्वोच्च राज्य सन्मान ‘ओली दर्जाली दोस्तलिक’ प्रदान करण्यात आला.

पंतप्रधान नरेंद्र मोदी यांना त्यांच्या ताश्कंद दौऱ्यादरम्यान उझबेकिस्तानचे राष्ट्राध्यक्ष शवकत मिर्झियोयेव यांच्या हस्ते उझबेकिस्तानचा सर्वोच्च राज्य सन्मान असलेला ‘ऑर्डर ऑफ ओली दर्जाली दोस्तलिक’ प्रदान करण्यात आला. हा सन्मान मोदी यांचा ३६वा आंतरराष्ट्रीय पुरस्कार आहे.

पंतप्रधान मोदी यांनी सांगितले की, उझबेकिस्तानचा सर्वोच्च पुरस्कार स्वीकारताना त्यांना अभिमान वाटत असून, त्यांनी हा सन्मान भारत आणि उझबेकिस्तान यांच्यातील चिरस्थायी मैत्रीला समर्पित केला.

“उझबेकिस्तानच्या सर्वोच्च पुरस्काराने सन्मानित होणे हा माझ्यासाठी अत्यंत अभिमानाचा क्षण आहे,” असे मोदी म्हणाले.

त्यांनी ‘दोस्तलिक’ या शब्दाचा अर्थ अधोरेखित केला, ज्याचा अर्थ मैत्री असा होतो आणि भारतीय लोक ‘दोस्त’, म्हणजेच मित्र, या शब्दाशीही परिचित असल्याचे त्यांनी नमूद केले.

मोदी म्हणाले की, ‘दोस्तलिक’ हा शब्द भारत आणि उझबेकिस्तानमधील संबंधांच्या पायाशी असलेली मूळ भावना अचूकपणे व्यक्त करतो. हा सन्मान एखाद्या एका व्यक्तीसाठी नसून सर्व १.४ अब्ज भारतीयांसाठी आहे, असेही त्यांनी सांगितले. आपल्या देशबांधवांच्या वतीने त्यांनी उझबेकिस्तानचे नागरिक, सरकार आणि आपले मित्र राष्ट्राध्यक्ष मिर्झियोयेव यांचे मनापासून आभार मानले.

प्रतिनिधीमंडळ स्तरावरील चर्चेदरम्यान मिर्झियोयेव यांनी मोदी यांच्या नेतृत्वाखाली भारताने केलेल्या प्रगतीचे कौतुक केले. भारत सर्व क्षेत्रांमध्ये उल्लेखनीय परिणाम साधत आहे, आर्थिक विकासाचा उच्च दर कायम ठेवत आहे आणि मोठे प्रकल्प राबवत आहे, असे ते म्हणाले.

हे ही वाचा:

विकसित भारत – ‘यांगी उझबेकिस्तान’ची समान वाटचाल

जिओ प्लॅटफॉर्म्सचा विक्रमी आयपीओ

शाळेची इमारत वाहून गेली; पण मुख्याध्यापकांनी वाचवले १६०० विद्यार्थ्यांचे प्राण

नशामुक्त युवा, ड्रग्जमुक्त भारत हाच आपला संकल्प!

उझबेकिस्तानच्या राष्ट्राध्यक्षांनी डिजिटलायझेशन, माहिती तंत्रज्ञान, कृत्रिम बुद्धिमत्ता आणि अंतराळ संशोधनासह इतर क्षेत्रांतील भारताच्या प्रगतीचाही उल्लेख केला. जागतिक घडामोडींमध्ये नवी दिल्लीचा आवाज आणि प्रभाव अधिक मजबूत झाला आहे, असे ते म्हणाले आणि जवळचा मित्र म्हणून उझबेकिस्तानला भारताच्या या कामगिरीचा आनंद होत असल्याचेही त्यांनी सांगितले.

पंतप्रधान मोदी यांनी सांगितले की, भारत आणि उझबेकिस्तान युरेनियमच्या पुरवठ्यासाठी दीर्घकालीन व्यवस्था स्थापन करतील. दोन्ही देश तीन भगिनी-शहर आणि भगिनी-राज्य व्यवस्थांना औपचारिक स्वरूप देत आहेत आणि त्यांची संपूर्ण क्षमता साकार करण्यासाठी एक आराखडा तयार केला पाहिजे, असेही त्यांनी म्हटले.

पंतप्रधानांनी उझबेकिस्तानमधील ‘न्यू ताश्कंद’ आणि भारतातील गुजरातमधील गिफ्ट सिटी (GIFT City) यांसारख्या महत्त्वाकांक्षी प्रकल्पांचा उल्लेख केला. या विकास प्रकल्पांमधील सर्वोत्तम पद्धती आणि तंत्रज्ञानाच्या वापराचा अभ्यास करण्यासाठी उझबेकिस्तानच्या प्रतिनिधीमंडळाचे भारतात स्वागत करण्यास भारताला आनंद होईल, असे ते म्हणाले.

मोदी यांनी मिर्झियोयेव यांच्या एका पुस्तकाचाही उल्लेख केला. या पुस्तकात उझबेकिस्तानच्या राष्ट्राध्यक्षांनी द्विपक्षीय आर्थिक भागीदारी पुढे नेण्यासाठी महत्त्वाच्या क्षेत्रांमधील प्रकल्प ओळखले असून, पुढील वाटचालीसाठी कालमर्यादाही निश्चित केली आहे. मोदी यांनी या उपक्रमाचे कौतुक केले आणि एकत्रितपणे काम करून दोन्ही बाजू वेगाने प्रगती करतील, असा विश्वास व्यक्त केला.

पंतप्रधान मोदी म्हणाले की, दोन्ही नेत्यांमध्ये आदल्या रात्रीच्या जेवणादरम्यान फलदायी चर्चा झाली आणि अनेक महत्त्वाचे निर्णय घेण्यात आले. या मुद्द्यांवर दोन्ही देशांची पथकेही एकमताने काम करत असल्याचे त्यांनी सांगितले.

दोन्ही देश परराष्ट्रमंत्री स्तरावर एक समन्वय परिषद (Coordination Council) स्थापन करतील. जवळच्या समन्वयातून दोन्ही देशांमधील सहकार्याच्या सर्व पैलूंना दिशा देण्याचे काम ही परिषद करेल. तसेच, दोन्ही देशांची संयुक्त आयोगाची पातळी सचिव स्तरावरून मंत्री स्तरावर उंचावली जाईल.