आयपीएल २०२६ चा हंगाम संपला असला, तरी त्यातील चमकदार कामगिरींची चर्चा अजूनही रंगत आहे. अनेक युवा आणि अनुभवी खेळाडूंनी आपल्या खेळाने चाहत्यांना भुरळ घातली. आता भारताचा माजी क्रिकेटपटू आणि समालोचक आकाश चोप्रा यांनी या हंगामातील विविध श्रेणींतील सर्वोत्तम खेळाडूंची निवड केली आहे.
सोशल मीडिया प्लॅटफॉर्म ‘एक्स’ वर शेअर केलेल्या व्हिडिओमध्ये आकाश चोप्रांनी आपल्या पसंतीचे खेळाडू आणि संस्मरणीय कामगिरी जाहीर केली.
केएल राहुलची १५२ धावांची खेळी ठरली हंगामातील सर्वोत्तम खेळी
आकाश चोप्रांच्या मते, आयपीएल २०२६ मधील सर्वोत्कृष्ट वैयक्तिक खेळी म्हणजे केएल राहुलची नाबाद १५२ धावांची वादळी खेळी.
पंजाब किंग्सविरुद्ध राहुलने अवघ्या ६७ चेंडूंमध्ये १५२ धावा फटकावत गोलंदाजांची अक्षरशः धुलाई केली होती. या खेळीत त्याने १६ चौकार आणि ९ षटकार ठोकले होते.
राहुलच्या या विस्फोटक खेळीच्या जोरावर दिल्ली कॅपिटल्सने २० षटकांत २ बाद २६४ धावा उभारल्या होत्या, जो संघाचा आयपीएल इतिहासातील सर्वोच्च स्कोअर ठरला.
वैभव सूर्यवंशी : ‘IPL २०२६’चा सर्वोत्तम सलामीवीर
राजस्थान रॉयल्सचा युवा स्टार वैभव सूर्यवंशी हा आकाश चोप्रांच्या मते या हंगामातील सर्वोत्तम सलामीवीर ठरला.
अवघ्या १५ वर्षांच्या वैभवने संपूर्ण स्पर्धा गाजवली. त्याने १६ सामन्यांत ७७६ धावा करताना तब्बल २३७ चा स्ट्राइक रेट राखला.
आकाश चोप्रांनी म्हटले की, “वैभवच्या आसपासही दुसरा कोणताही सलामीवीर दिसत नाही. त्याने या हंगामात वेगळ्याच स्तराची फलंदाजी केली.”
विक्रमांवर विक्रम करणारा वैभव
वैभव सूर्यवंशीने आयपीएल २०२६ मध्ये अनेक ऐतिहासिक विक्रम आपल्या नावावर केले.
- एका हंगामात सर्वाधिक ७२ षटकार
- ख्रिस गेलचा ५९ षटकारांचा विक्रम मोडला
- ऑरेंज कॅप जिंकणारा सर्वात युवा फलंदाज
- एका हंगामात सर्वाधिक धावा करणारा अनकॅप्ड खेळाडू
त्यामुळे हा हंगाम वैभवच्या नावानेच ओळखला जाईल, असे म्हटले तर वावगे ठरणार नाही.
हेनरिक क्लासेन ठरला सर्वोत्तम मधल्या फळीतील फलंदाज
सनरायझर्स हैदराबादचा धडाकेबाज फलंदाज हेनरिक क्लासेन याला आकाश चोप्रांनी हंगामातील सर्वोत्तम मिडल-ऑर्डर फलंदाज म्हणून निवडले.
क्लासेनने १५ सामन्यांत ६२४ धावा करताना १६० चा स्ट्राइक रेट राखला. तो स्पर्धेतील सर्वाधिक धावा करणाऱ्या पहिल्या पाच फलंदाजांमध्येही होता.
डोनोव्हन फरेरा ठरला सर्वोत्तम फिनिशर
सामन्याच्या शेवटच्या षटकांत आक्रमक फलंदाजी करून संघाला मोठी धावसंख्या उभारून देणाऱ्या डोनोव्हन फरेराला आकाश चोप्रांनी हंगामातील सर्वोत्तम फिनिशरचा मान दिला.
त्याच्या आक्रमक फलंदाजीमुळे अनेक सामने निर्णायक टप्प्यावर वळले.
भुवनेश्वर कुमार : हंगामातील सर्वोत्तम वेगवान गोलंदाज
रॉयल चॅलेंजर्स बंगळुरूचा अनुभवी गोलंदाज भुवनेश्वर कुमार याने या हंगामात आपल्या गोलंदाजीची जादू पुन्हा दाखवून दिली.
भुवनेश्वरने १६ सामन्यांत २८ विकेट्स घेत स्पर्धेतील दुसऱ्या क्रमांकाचा सर्वाधिक बळी घेणारा गोलंदाज होण्याचा मान मिळवला.
त्याच्या अचूक स्विंग, अनुभव आणि सातत्यपूर्ण कामगिरीमुळे आकाश चोप्रांनी त्याची हंगामातील सर्वोत्तम वेगवान गोलंदाज म्हणून निवड केली.
