मणिपूरमध्ये दहशतवाद्यांविरोधात सैन्याची मोठी कारवाई

मणिपूरमध्ये शांतता प्रस्थापित करण्याच्या दिशेने भारतीय सैन्याने आणखी एक मोठे यश मिळवत दहशतवादी संघटना युनायटेड कुकी नॅशनल आर्मी (UKNA) विरुद्ध जोरदार कारवाई केली आहे. चुराचांदपूर जिल्ह्यात भारतीय सैन्य आणि आसाम रायफल्स यांनी संयुक्तपणे राबविलेल्या विशेष मोहिमेत दहशतवाद्यांचे अनेक तळ, बंकर आणि आश्रयस्थाने उद्ध्वस्त करण्यात आली. या कारवाईदरम्यान झालेल्या चकमकीत एका दहशतवाद्याचा खात्मा करण्यात आला, तर मोठ्या प्रमाणात शस्त्रसाठा आणि दारुगोळाही जप्त करण्यात आला आहे.

सुरक्षा यंत्रणांना हेंगलेप उपविभागातील डोंगराळ आणि घनदाट जंगल परिसरात UKNA चे दहशतवादी सक्रिय असल्याची विश्वसनीय गुप्त माहिती मिळाल्यानंतर ही मोहीम हाती घेण्यात आली. अत्यंत कठीण भौगोलिक परिस्थिती, खराब हवामान आणि आव्हानात्मक वातावरण असूनही जवानांनी अचूक नियोजन करत संशयित ठिकाणांना घेराव घातला. सुरक्षा दल जवळ पोहोचताच दहशतवाद्यांनी गोळीबार सुरू केला. जवानांनीही चोख प्रत्युत्तर देत दहशतवाद्यांचे मनसुबे उधळून लावले. काही काळ चाललेल्या चकमकीनंतर एका दहशतवाद्याचा मृत्यू झाला, तर इतर साथीदार जंगलाचा फायदा घेत फरार झाले.
हे ही वाचा:
योग दिनासाठी कोलकाता सज्ज; मोदी करणार नेतृत्व

डीआर काँगोविरुद्धच्या बरोबरीनंतर रोनाल्डोचा संघाला पाठिंबा

चकमकीनंतर सुरक्षा दलांनी संपूर्ण परिसरात व्यापक शोधमोहीम राबवली. या वेळी दहशतवाद्यांनी उभारलेले बंकर, तात्पुरते तळ आणि लपण्याची ठिकाणे नष्ट करण्यात आली. तसेच मोठ्या प्रमाणात शस्त्रे, दारुगोळा आणि युद्धसामग्री जप्त करण्यात आली. जप्त करण्यात आलेल्या साहित्यामुळे दहशतवादी नेटवर्क, त्यांच्या हालचाली आणि भविष्यातील कारवायांबाबत महत्त्वाची माहिती मिळण्याची शक्यता व्यक्त केली जात आहे.

संरक्षण मंत्रालयाने या कारवाईला मणिपूरमधील दहशतवादविरोधी मोहिमेतील महत्त्वपूर्ण यश असे संबोधले आहे. गेल्या काही महिन्यांपासून ईशान्य भारतात सक्रिय असलेल्या दहशतवादी संघटनांविरोधात सुरक्षा दलांनी आक्रमक भूमिका घेतली असून, त्यांच्या आर्थिक आणि लष्करी क्षमतेवर सातत्याने प्रहार केला जात आहे. चुराचांदपूरसारख्या संवेदनशील भागात झालेल्या या यशस्वी कारवाईमुळे UKNA च्या कारवायांना मोठा धक्का बसल्याचे मानले जात आहे.

मणिपूरमध्ये शांतता, स्थैर्य आणि सामान्य जनजीवन सुरळीत ठेवण्यासाठी सुरक्षा दलांची मोहीम भविष्यातही अधिक वेगाने सुरू राहणार असल्याचे संकेत देण्यात आले आहेत. दहशतवाद्यांना कोणतीही पळवाट न देता त्यांच्या प्रत्येक हालचालीवर लक्ष ठेवले जात असून, देशाच्या सुरक्षेविरोधातील कोणतेही षड्यंत्र हाणून पाडण्यासाठी भारतीय सैन्य सज्ज असल्याचे या कारवाईतून पुन्हा एकदा स्पष्ट झाले आहे.