भारतीय संघाचा कर्णधार रोहित शर्माच्या शरीराच्या वजनावरून काँग्रेसच्या प्रवक्त्या शमा मोहम्मद यांनी केलेल्या टिप्पणीवरून सध्या देशभरात चर्चा सुरू आहे. भाजपाने तर या वक्तव्याची खिल्ली उडविली पण बीसीसीआयनेही ही टिप्पणी अस्वीकारार्ह आहे असे म्हणत संताप व्यक्त केला.
बीसीसीआयचे सचिव देवजीत सैकिया यांनी काँग्रेस प्रवक्त्या शमा मोहम्मद यांनी भारतीय कर्णधार रोहित शर्मावर केलेल्या टिप्पणीला अनुचित म्हटलं. त्यांनी सांगितलं की अशा प्रकारच्या कमेंट्स पूर्णपणे अस्वीकार्य आहेत.
खरं तर, रविवारी भारत आणि न्यूझीलंडमधील चॅम्पियन्स ट्रॉफीच्या गट अ सामन्यादरम्यान, शमा मोहम्मद यांनी सोशल मीडिया प्लॅटफॉर्म ‘एक्स’ वर रोहित शर्माला “जाडा खेळाडू” आणि “निष्प्रभ कर्णधार” असं म्हटलं. त्यांनी लिहिलं, “रोहित शर्मा स्थूल आहे! त्याने वजन कमी करण्याची गरज आहे! आणि नक्कीच, तो भारताचा सगळ्यात प्रभावहीन कर्णधार आहे.”
या विधानावर प्रतिक्रिया देताना बीसीसीआय सचिवांनी आयएएनएसला सांगितलं, “जेव्हा टीम इंडिया आयसीसी स्पर्धा खेळत आहे, तेव्हा कोणत्याही नेत्याने अशा प्रकारची टिप्पणी करणं धक्कादायक आहे.” त्यांनी सांगितलं, “हे दुर्दैवी आहे. आपल्या कर्णधारावर अशी टिप्पणी पूर्णपणे अस्वीकार्य आहे. टीम इंडिया उपांत्य फेरीत पोहोचली आहे आणि या वेळी अशा प्रकारच्या गोष्टी आश्चर्यकारक आहेत. आम्ही या प्रकरणाकडे लक्ष देणार आहोत.”
रोहितवर केलेल्या या विधानाची सोशल मीडियावर तीव्र टीका झाली आणि हा विषय वादात सापडला. वाढत्या विरोधामुळे काँग्रेस पक्षाने शमा मोहम्मद यांना त्यांचा पोस्ट हटवण्याचे निर्देश दिले.
या संदर्भात काँग्रेस नेते पवन खेड़ा यांनी सोशल मीडिया प्लॅटफॉर्म ‘एक्स’ वर एक पोस्ट लिहिली – “भारतीय राष्ट्रीय काँग्रेसच्या राष्ट्रीय प्रवक्त्या डॉ. शमा मोहम्मद यांनी क्रिकेटच्या एका दिग्गज खेळाडूवर केलेल्या टिप्पण्या पक्षाच्या भूमिकेचे प्रतिनिधित्व करत नाहीत. त्यांना ‘एक्स’ वरील संबंधित सोशल मीडिया पोस्ट हटवण्याचे निर्देश दिले गेले आहेत आणि भविष्यात अधिक जागरूक राहण्याचा सल्लादेखील दिला आहे.”
हे ही वाचा:
पंतप्रधान मोदींची गीर वन्यजीव अभयारण्यातील जंगल सफारी!
…अन हातात बेड्या घालून जितेंद्र आव्हाड पोहोचले अधिवेशनात!
दिल्लीचा अर्थसंकल्प २४ ते २६ मार्च दरम्यान सादर होणार
नजरकैदेत ठेवून जबरदस्तीने इस्लाम धर्म स्वीकारण्यास भाग पाडले
काँग्रेस नेत्याने पोस्टमध्ये पुढे लिहिलं, “भारतीय राष्ट्रीय काँग्रेस खेळ जगतातील दिग्गज खेळाडूंच्या योगदानाला सर्वोच्च सन्मान देते आणि त्यांच्या वारशाला कमी लेखणाऱ्या कोणत्याही विधानाचं समर्थन करत नाही.”
चॅम्पियन्स ट्रॉफी स्पर्धेत भारताने न्यूझीलंडला ४४ धावांनी पराभूत केलं आणि आठ संघांच्या या स्पर्धेत गट अ मध्ये अव्वल स्थान मिळवलं. आता उपांत्य फेरीत भारताचा सामना मंगळवारी दुबईत ऑस्ट्रेलियाशी होणार आहे, तर न्यूझीलंड बुधवारी लाहोरमध्ये दक्षिण आफ्रिकेविरुद्ध खेळणार आहे. भारत या स्पर्धेत अद्यापपर्यंत अपराजित आहे आणि उपांत्य फेरीत 2023 वनडे वर्ल्ड कप विजेता ऑस्ट्रेलियाशी भिडणार आहे
