जयपूरच्या तबेल्यातील शाळेवर अखेर बुलडोझर

जयपूरच्या सांगानेर परिसरातील रामपुरा-कंवरपुरा गावातील सरकारी प्राथमिक शाळेची जर्जर इमारत अखेर जमीनदोस्त करण्यास सुरुवात झाली आहे. विद्यार्थ्यांच्या सुरक्षेच्या दृष्टीने धोकादायक ठरलेल्या या इमारतीवर प्रशासनाने बुलडोझर चालवला असून, आता याच जागेवर नवीन आणि सुरक्षित शाळेची इमारत उभारली जाणार आहे. तांत्रिक तपासणीत जुनी इमारत असुरक्षित आढळल्यानंतर विद्यार्थ्यांना यापूर्वीच दुसऱ्या ठिकाणी हलवण्यात आले होते. त्यामुळे अनेक दिवसांपासून या शाळेच्या दुरवस्थेचा प्रश्न चर्चेत होता.

या नव्या शाळेसाठी सरकारने तब्बल १८ लाख रुपयांचा निधी मंजूर केला आहे. यापैकी १२ लाख रुपये जिल्हा खनिज फाउंडेशन ट्रस्टकडून, तर ६ लाख रुपये आमदार निधीतून उपलब्ध करून देण्यात आले आहेत. एक सप्टेंबरपासून बांधकाम सुरू करण्याची घोषणा करण्यात आली होती. आता जुनी इमारत हटवण्याचे काम सुरू झाल्याने लवकरच नव्या शाळेच्या बांधकामाला सुरुवात होण्याची शक्यता आहे.
हे ही वाचा:
अल्पवयीन मुलीशी शरियानुसार निकाह केला तरी ‘पॉक्सो’ लागणार

लाल किल्ल्याजवळील स्फोटासाठी पैसे दिल्याचे भासवून ३० लाख लुबाडले

मात्र ही शाळा केवळ जर्जर इमारतीमुळे चर्चेत आली नव्हती, तर २१ ऑगस्ट रोजी सीजेपी अर्थात कॉकरोच जनता पार्टीच्या टीमच्या पाहणीदरम्यान झालेल्या वादामुळेही हे प्रकरण गाजले होते. शाळेची परिस्थिती पाहण्यासाठी आलेल्या सीजेपीच्या टीमचा काही ग्रामस्थांशी वाद झाला. टीमला गावात प्रवेश करण्यापासून रोखण्यात आल्याचा आरोप करण्यात आला. तसेच सीजेपीचे प्रवक्ते आशुतोष रांका यांच्यासह काही सदस्यांशी मारहाण झाल्याचा आणि वाहनांच्या काचा फोडल्याचा दावा करण्यात आला. या घटनेनंतर शाळेच्या दुरवस्थेचा मुद्दा आणखी ऐरणीवर आला.

सीजेपी प्रवक्ते आशुतोष रांका यांनी सोशल मीडियावर पोस्ट करत नवीन शाळेच्या बांधकामाची माहिती दिली. त्यांनी दावा केला की, हीच ती शाळा आहे जी पूर्वी म्हशींच्या तबेल्यात चालत होती. आता मात्र प्रशासनाच्या कारवाईनंतर जुनी धोकादायक इमारत हटवली जात आहे. त्यामुळे या संपूर्ण वादानंतर किमान विद्यार्थ्यांच्या वाट्याला तरी सुरक्षित आणि चांगली शाळा येण्याची आशा निर्माण झाली आहे.