महिला आंदोलकाला थप्पड मारणे भोवले

जंतर-मंतर येथे झालेल्या आंदोलनादरम्यान महिला आंदोलकाला थप्पड मारल्याचा व्हिडिओ सोशल मीडियावर व्हायरल झाल्यानंतर दिल्ली पोलिसांनी अतिरिक्त डीसीपी संदीप लांबा यांना तातडीने ड्युटीवरून हटवले आहे. त्यांना आंदोलनस्थळावरील कायदा-सुव्यवस्था सांभाळण्याच्या जबाबदारीतून मुक्त करून पुन्हा त्यांच्या मूळ उत्तर-पूर्व दिल्ली जिल्ह्यात परत पाठवण्यात आले आहे. या घटनेमुळे दिल्ली पोलिसांच्या वर्तनावर गंभीर प्रश्न उपस्थित झाले असून प्रकरणाची दखल दिल्ली उच्च न्यायालयानेही घेतली आहे.

२० जुलै रोजी जंतर-मंतर येथे झालेल्या आंदोलनादरम्यान आंदोलक आणि पोलिसांमध्ये जोरदार धक्काबुक्की झाली होती. त्याचवेळी एका महिला आंदोलकाला संदीप लांबा यांनी थप्पड मारल्याचा ३६ सेकंदांचा व्हिडिओ व्हायरल झाला. हा व्हिडिओ समोर आल्यानंतर सामाजिक माध्यमांवर संतापाची लाट उसळली आणि पोलिसांच्या भूमिकेवर तीव्र टीका झाली. या घटनेनंतर दिल्ली उच्च न्यायालयात याचिका दाखल झाली असून न्यायालयाने दिल्ली पोलिसांकडून स्पष्टीकरण मागितले आहे.
हे ही वाचा:
कॉक्रोच जनता पार्टीचे २४ जुलै रोजी देशव्यापी आंदोलन

पन्नूसोबत चर्चेनंतर दिपकेला भरला ताप

वाद वाढताच दिल्ली पोलिसांनी तातडीने प्रशासकीय निर्णय घेत संदीप लांबा यांना आंदोलनाच्या ड्युटीवरून हटवले. मात्र, त्यांच्याविरोधातील चौकशी सुरू असून संपूर्ण घटनेतील परिस्थिती, व्हिडिओतील दृश्ये आणि संबंधित अधिकाऱ्यांचे अहवाल तपासले जात आहेत. आंदोलनादरम्यान रॅपिड ॲक्शन फोर्स (RAF) आणि पोलिसांवर हल्ल्याच्या आरोपांचीदेखील स्वतंत्र चौकशी सुरू आहे.

या घटनेने आंदोलकांशी पोलिसांनी वागण्याची पद्धत, कायदा-सुव्यवस्था राखताना वापरला जाणारा बळाचा वापर आणि पोलिसांची जबाबदारी या मुद्द्यांवर पुन्हा एकदा व्यापक चर्चा सुरू झाली आहे. उच्च न्यायालयातील सुनावणी आणि अंतर्गत चौकशीचा अहवाल आल्यानंतर या प्रकरणात पुढील कारवाई होण्याची शक्यता आहे.