बाप्पा येणार; मुंबई–सावंतवाडी विशेष ट्रेन धावणार

गणेशोत्सवाच्या पार्श्वभूमीवर प्रवाशांची वाढती गर्दी लक्षात घेऊन पश्चिम रेल्वेकडून मुंबई सेंट्रल ते सावंतवाडी रोडदरम्यान विशेष ट्रेन चालवण्यात येणार आहे. विशेष भाड्याने ही ट्रेन धावणार असून कोकणात जाणाऱ्या गणेशभक्तांना मोठा दिलासा मिळणार आहे.

पश्चिम रेल्वेचे मुख्य जनसंपर्क अधिकारी विनीत अभिषेक यांनी दिलेल्या माहितीनुसार, ०९०१९/०९०२० मुंबई सेंट्रल–सावंतवाडी रोड विशेष ट्रेन चालवण्यात येणार आहे.

ट्रेन क्रमांक ०९०१९ मुंबई सेंट्रल–सावंतवाडी रोड विशेष २५ आणि २६ सप्टेंबर २०२६ रोजी मुंबई सेंट्रलहून रात्री १०.४५ वाजता सुटेल. ही ट्रेन दुसऱ्या दिवशी पहाटे २.३० वाजता सावंतवाडी रोडला पोहोचेल.

तर ट्रेन क्रमांक ०९०२० सावंतवाडी रोड–मुंबई सेंट्रल विशेष २६ आणि २७ सप्टेंबर रोजी सावंतवाडी रोडहून पहाटे ४.५० वाजता सुटेल आणि त्याच दिवशी रात्री ८.१० वाजता मुंबई सेंट्रलला पोहोचेल.

या विशेष ट्रेनला दोन्ही दिशांनी बोरिवली, वसई रोड, भिवंडी रोड, पनवेल, पेण, रोहा, माणगाव, वीर, कर्णजाडी, खेड, चिपळूण, सावर्डा, अरावली रोड, संगमेश्वर रोड, रत्नागिरी, अडवली, विलवडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ आणि झाराप या स्थानकांवर थांबा असेल.

या ट्रेनमध्ये एसी ३-टियर, स्लीपर क्लास आणि जनरल सेकंड क्लासचे डबे असतील.

ट्रेन क्रमांक ०९०१९ चे आरक्षण १२ सप्टेंबर २०२६ पासून सर्व प्रवासी आरक्षण केंद्रांवर (PRS) तसेच IRCTCच्या संकेतस्थळावर सुरू होणार आहे. ट्रेनच्या थांब्यांच्या वेळा आणि डब्यांच्या रचनेची सविस्तर माहिती www.enquiry.indianrail.gov.in या संकेतस्थळावर उपलब्ध आहे.