हिमाचलमध्ये प्रचंड दगडाखाली टाटा सुमो चिरडली

हिमाचल प्रदेशातील चंबा जिल्ह्यात शुक्रवारी भीषण दुर्घटना घडली. डोंगरावरून अचानक कोसळलेल्या प्रचंड दगडाने प्रवाशांनी भरलेली टाटा सुमो अक्षरशः चिरडली. या भीषण अपघातात किमान १३ जणांचा जागीच मृत्यू झाला. या दुर्घटनेनंतर परिसरात एकच खळबळ उडाली असून बचाव पथकांनी तातडीने घटनास्थळी धाव घेतली.

मिळालेल्या माहितीनुसार, टाटा सुमो डोंगराळ मार्गावरून प्रवाशांना घेऊन जात असताना अचानक उंच कड्यावरून प्रचंड आकाराचा दगड वाहनावर कोसळला. दगडाचा वेग आणि वजन इतके प्रचंड होते की वाहनाचा पूर्ण चक्काचूर झाला. अपघात इतका भीषण होता की अनेक प्रवाशांना बाहेर पडण्याची संधीही मिळाली नाही.
हे ही वाचा:
आईसाठीच होतं ते सेलिब्रेशन!

वयाच्या २२व्या वर्षीच खूप काही सोसलं!

घटनेची माहिती मिळताच स्थानिक प्रशासन, पोलीस, आपत्ती व्यवस्थापन पथक आणि बचाव कर्मचारी घटनास्थळी दाखल झाले. अवजड यंत्रसामग्रीच्या मदतीने दगड हटवून वाहनातील मृतदेह बाहेर काढण्याचे काम करण्यात आले. मृतांची ओळख पटवण्याचे आणि त्यांच्या नातेवाईकांना माहिती देण्याचे काम प्रशासनाकडून सुरू आहे.

दरम्यान, हिमाचल प्रदेशात सुरू असलेल्या मुसळधार पावसामुळे भूस्खलन आणि दगड कोसळण्याच्या घटना सातत्याने वाढत आहेत. डोंगराळ भागातील रस्ते अत्यंत धोकादायक बनले असून प्रशासनाने नागरिकांना आणि पर्यटकांना अत्यावश्यक कामाशिवाय अशा मार्गांवर प्रवास टाळण्याचे आवाहन केले आहे. हवामानाचा इशारा लक्षात घेऊन संवेदनशील भागांमध्ये विशेष सतर्कता बाळगण्याच्या सूचना देण्यात आल्या आहेत.