हिमाचल प्रदेशातील कुल्लू जिल्ह्यात वसलेलं जिभी हे छोटंसं गाव सध्या पर्यटकांसाठी आकर्षणाचं केंद्र बनलं आहे. सुंदर पर्वतरांगा, हिरवीगार जंगलं, स्वच्छ नदी, धबधबे आणि शांत वातावरणामुळे या गावाला आता ‘मिनी थायलंड ऑफ इंडिया’ म्हणून ओळख मिळत आहे. सोशल मीडियावर जिभीचे फोटो आणि व्हिडीओ मोठ्या प्रमाणात व्हायरल होत असल्याने देशभरातील पर्यटक येथे भेट देण्यासाठी उत्सुक आहेत.
समुद्रसपाटीपासून सुमारे सहा हजार फूट उंचीवर वसलेलं हे गाव निसर्गाच्या कुशीत असल्यामुळे इथलं वातावरण वर्षभर आल्हाददायक असतं. विशेषतः उन्हाळ्यात शहरातील उकाड्यापासून दूर शांत आणि थंड हवामान अनुभवण्यासाठी अनेक जण जिभीकडे वळत आहेत. शहरांच्या गोंगाटापासून दूर निवांत वेळ घालवण्यासाठी हे ठिकाण उत्तम मानलं जातं.
हे ही वाचा:
भायखळा गोळीबार प्रकरण उघड
मंत्र्यांच्या ताफ्यात कपात, विदेश दौऱ्यांवर निर्बंध; फडणवीस यांची काटकसरीची भूमिका
चार दिवसांच्या घसरणीनंतर बाजार हिरव्या निशाणावर
निदा खानला लपण्यास मदत करणाऱ्या नगरसेवक मतीनचे घर जमीनदोस्त
जिभीचं सर्वात मोठं वैशिष्ट्य म्हणजे येथील नैसर्गिक सौंदर्य. गावाभोवती देवदारची उंच झाडं, डोंगरातून वाहणारे ओढे आणि लाकडी पुलांमुळे संपूर्ण परिसर एखाद्या परदेशातील पर्यटनस्थळासारखा दिसतो. त्यामुळे अनेक पर्यटक या ठिकाणाची तुलना थायलंडमधील सुंदर बेटांशी करतात. सकाळच्या धुक्यात आणि संध्याकाळच्या सूर्यास्तात येथील निसर्ग आणखी मोहक दिसतो.
साहसी पर्यटनाची आवड असणाऱ्यांसाठीही जिभी खास ठरत आहे. येथे ट्रेकिंग, कॅम्पिंग आणि निसर्गभ्रमंतीचा आनंद घेता येतो. जलोरी पास, सेरोलसर लेक आणि चेहनी कोठी ही ठिकाणं पर्यटकांमध्ये विशेष लोकप्रिय आहेत. फोटोग्राफी करणाऱ्यांसाठीही हे गाव एक परफेक्ट डेस्टिनेशन मानलं जात आहे.
दिल्लीहून जिभीपर्यंतचं अंतर सुमारे पाचशे किलोमीटर असून रस्तामार्गे येथे सहज पोहोचता येतं. जवळचं मोठं शहर कुल्लू आहे, तर भुंतर विमानतळही जवळ असल्याने देशातील इतर भागांतूनही पर्यटक सहज येथे येऊ शकतात. जिभीमध्ये पर्यटकांसाठी होमस्टे, लाकडी कॉटेज आणि रिसॉर्ट्सची सुविधा उपलब्ध आहे. स्थानिक हिमाचली खाद्यपदार्थांचाही पर्यटक आनंद घेतात. कमी खर्चात सुंदर आणि शांत पर्यटनाचा अनुभव घ्यायचा असेल तर हिमाचलमधील जिभी हे ठिकाण सध्या पर्यटकांसाठी सर्वोत्तम पर्याय ठरत आहे.
