स्वातंत्र्यदिनाच्या काही दिवसांनंतरच छत्तीसगडमधील कांकेर जिल्ह्यात एक हृदयद्रावक घटना समोर आली आहे. १५ ऑगस्ट रोजी नक्षल स्मारकावर राष्ट्रध्वज फडकवण्याचे धाडस केल्यामुळे बिनागुंडा गावात एका तरुण विद्यार्थ्याची हत्या करण्यात आली. मृत तरुणाचे नाव मुनेश नूरुती असे आहे.
१२वी उत्तीर्ण मुनेश नूरूती याने स्वातंत्र्यदिनी त्याच्या गावातील शाळेत मोठ्या उत्साहात आणि अभिमानाने भारतीय ध्वज फडकवला. हा ध्वजारोहण नक्षल स्मारकावर झाला, ज्याचा व्हिडिओ सोशल मीडियावर व्हायरल झाला. नक्षलवाद्यांपर्यंत हा व्हिडिओ पोहोचताच त्यांचा संताप वाढला.
दुसऱ्याच दिवशी सशस्त्र नक्षलवाद्यांचा एक गट गावात पोहोचला आणि त्यांनी गावकऱ्यांसमोर तथाकथित जनअदालत आयोजित केली. या न्यायालयात मुनेशवर पोलिसांचा खबरी असल्याचा आरोप करण्यात आला. गावकऱ्यांमध्ये त्याला देशद्रोही घोषित करून नक्षलवाद्यांनी त्याला मृत्युदंडाची शिक्षा सुनावली आणि त्याच वेळी त्याचा गळा दाबून त्याची हत्या केली.
नक्षलवाद्यांच्या भीतीमुळे घाबरलेल्या कुटुंबाने पोलिसांकडे कोणतीही तक्रार दाखल केली नाही आणि अंतिम संस्कार केले. परंतु १७ ऑगस्ट रोजी नक्षलवाद्यांनी गावाजवळ बॅनर लावून हत्येची जबाबदारी घेतली आणि मुनेश हा पोलिसांचा खबरी असल्याचे पुन्हा सांगितले. आता पोलिसांनी या प्रकरणाचा तपास सुरू केला आहे.
कांकेरचे पोलिस अधीक्षक कल्याण एलिसेला म्हणाले की, ध्वजारोहणाचा व्हिडिओ पोलिसांपर्यंत पोहोचला आहे आणि मुनेशची खरोखरच तिरंगा फडकवल्याबद्दल हत्या करण्यात आली आहे का याचा तपास केला जात आहे. छत्तीसगडचे गृहसचिव म्हणाले,”ही घटना नक्षलवाद्यांच्या अमानुषतेचं उदाहरण आहे. दोषींना कठोर शिक्षा दिली जाईल.”
हे ही वाचा :
चिकन नेक भागात बांगलादेशी प्रभाव वाढतोय, सुरक्षेसाठी मोठा धोका!
“पंतप्रधान मोदी बिहारला आले की महाआघाडीचे नेते थरथर कापतात”
“लसीकरणानंतर भटक्या कुत्र्यांना मूळ भागातच सोडा”
संसद भवनात घुसखोरीची घटना: भिंत ओलांडून गरुड गेटपर्यंत पोहोचलेला आरोपी अटकेत!
दरम्यान, या घटनेने संपूर्ण राज्यात संतापाची लाट उसळली असून, सोशल मीडियावर नक्षलवाद्यांच्या विरोधात तीव्र प्रतिक्रिया उमटत आहेत. “तिरंग्यासाठी प्राण गमावणाऱ्या तरुणाला शहीदाचा दर्जा द्यावा”, अशी मागणी नागरिक करत आहेत.
