दिवसातून फक्त तीन तास दिसतो ‘हा’ फ्रान्समधील रस्ता; काय आहे कारण?

विज्ञानाची दुनिया जितकी रोचक आहे तितकीच ती रहस्यांनी भरलेली आहे. फ्रान्समधील अशीच एक आश्चर्यकारक गोष्ट म्हणजे ‘पॅसेज दु गोइस’ नावाचा अनोखा रस्ता. हा रस्ता दिवसातून फक्त सुमारे दोन ते तीन तासांसाठीच पाण्याबाहेर दिसतो.

फ्रान्सच्या पश्चिम किनाऱ्यावर असलेल्या नोइरमुतिये आयलंड या बेटाची सर्वात मोठी खासियत म्हणजे हा रस्ता. हा एक नैसर्गिक रस्ता असून तो मुख्य भूमीला बेटाशी जोडतो, पण दिवसातील मर्यादित वेळेतच तो दिसतो आणि पार करता येतो. या अनोख्या रस्त्याचा संबंध चंद्राशी आहे. हा रस्ता भरतीच्या वेळी पूर्णपणे पाण्याखाली जातो, तर ओहोटीच्या वेळी पुन्हा दिसू लागतो. नोइरमुतिये हे एक छोटे बेट असून त्याची लांबी साधारण २० किलोमीटर आहे.

अमेरिकेची अवकाश संस्था NASA च्या माहितीनुसार, International Space Station (ISS) मधील अंतराळवीरांनी या बेटाच्या उत्तर- पश्चिम भागाचा फोटो काढला होता. १२ जून २०२१ रोजी घेतलेल्या या छायाचित्रात ओहोटीच्या वेळी उघडलेले चिखलाचे मैदाने, खाऱ्या पाण्याचे दलदलीचे प्रदेश, वाळूचे ढिगारे आणि शेती स्पष्ट दिसतात.

पॅसेज दु गोइस हा रस्ता सुमारे ४.१२५ किलोमीटर लांब आहे. बेटावर पोहोचण्यासाठी हा महत्त्वाचा मार्ग मानला जातो, त्यामुळे तो योग्य वेळेतच पार करणे आवश्यक असते. १९७१ मध्ये एक पूल बांधण्यात आला, ज्यामुळे भरतीच्या वेळीही बेटावर जाणे शक्य झाले. तरीसुद्धा पॅसेज दु गोइस आजही पाण्याखाली जातो आणि पुन्हा उघडतो. ओहोटीच्या काळात हा रस्ता कार, सायकल किंवा पायी पार करता येतो.

हे ही वाचा:

मुंबई विमानतळावर १२.६८ कोटींचा हायड्रोपोनिक गांजा जप्त

सलमानच्या “बॅटल ऑफ गलवान”चे नाव बदलून “मातृभूमी: मे वॉर रेस्ट इन पीस”

निवडणूक आयोगाने पश्चिम बंगालच्या डीजीपी आणि मुख्य सचिवांना हटवले

युद्धादरम्यान दिशाभूल करणारी सामग्री शेअर केल्याबद्दल युएईमध्ये १९ भारतीयांना अटक

सामान्यतः हा रस्ता लो टाइडच्या दीड तास आधी आणि दीड तासानंतर म्हणजे जवळपास तीन तासांसाठी सुरक्षित असतो. हे सर्व चंद्राच्या गुरुत्वाकर्षण शक्तीवर अवलंबून असते. भरतीच्या वेळी पाणी १.५ ते ४ मीटरपर्यंत वाढते. या बेटाभोवतीच्या चिखलयुक्त मैदानांमध्ये शिंपले आणि इतर समुद्री जीव मोठ्या प्रमाणावर आढळतात, त्यामुळे येथे शिंपले पालन मोठ्या प्रमाणावर केले जाते. किनाऱ्यावरील लोक मासेमारीसोबतच दलदलीतून ‘पांढरे सोने’ म्हणजेच मीठही गोळा करतात. उन्हाळ्यात पाणी आटल्यावर लहान कालवे आणि तलावांमधून मीठ काढले जाते. पॅसेज दु गोइस ही निसर्गाची एक अद्भुत निर्मिती आहे, जी थेट चंद्राच्या गुरुत्वाकर्षण शक्तीशी जोडलेली आहे. त्यामुळे जगभरातील पर्यटक हा अनोखा रस्ता पाहण्यासाठी येथे भेट देतात.