झारखंडमधील गुमला जिल्ह्यातील पोलिसांनी बंदी घातलेल्या पीएलएफआय (पीपल्स लिबरेशन फ्रंट ऑफ इंडिया) या संघटनेच्या तीन नक्षलवाद्यांना अटक केली आहे. अटक करण्यात तीन नक्षलवाद्यांपैकी एकाचे नाव दुर्गा सिंग उर्फ पंजरी असे आहे, ज्याच्यावर दोन लाखांचे बक्षीस होते.
झारखंड पोलिसांच्या मोस्ट वॉन्टेड नक्षलवाद्यांच्या यादीमध्ये नक्षलवादी दुर्गा सिंगचा समावेश होता. पीपल्स लिबरेशन फ्रंट ऑफ इंडिया या बंदी घालण्यात आलेल्या संघटनेच्या संस्थापक सदस्यांपैकी दुर्गा सिंग हा एक आहे. सुमारे दीड वर्षांपूर्वी पीएलएफआयचे प्रमुख दिनेश गोप यांच्या अटकेनंतर तो संघटनेचे नेतृत्व करत होता. त्याच्याविरुद्ध वेगवेगळ्या पोलिस ठाण्यांच्या क्षेत्रात १८ गुन्हे दाखल आहेत.
गुमला एसपी शंभू कुमार सिंह यांनी गुरुवारी (१३ मार्च) पत्रकार परिषदेत सांगितले की, कामदरा पोलिस स्टेशन परिसरातील मुरुमकेला तेतारटोलीजवळ या तिघांना अटक करण्यात आली. दुर्गा सिंग व्यतिरिक्त, यामध्ये कालेश्वर हजम उर्फ टेंपु हजम आणि राजकुमार सिंग यांचा समावेश आहे.
दुर्गा सिंह हा रांचीच्या लापुंग पोलीस स्टेशन परिसरातील जरीया जमकेल येथील रहिवासी आहे, तर राजकुमार सिंह हा रांचीच्या ओरमांझी पोलीस स्टेशन परिसरातील हेंडेबिली गावातील रहिवासी आहे. तिसरा नक्षलवादी कालेश्वर हजम हा खुंटी जिल्ह्यातील जरियागड पोलीस स्टेशन परिसरातील बक्सापूर येथील रहिवासी आहे.
त्यांच्याकडून एक डबल बॅरल रायफल, एक देशी बनावटीची पिस्तूल, आठ जिवंत गोळ्या, तीन पीएलएफआय पत्रके, एक मोबाईल फोन आणि एक दुचाकी जप्त करण्यात आली आहे. दुर्गा सिंगवर अनेक व्यावसायिक आणि कंत्राटदारांना धमकावून पैसे उकळल्याचा आरोप आहे.
हे ही वाचा :
आयपीएल २०२५ ईशान किशनसाठी सुवर्णसंधी!
बीएलएच्या ताब्यात अजूनही १५४ जवान? प्रत्यक्षदर्शी सैनिकाने पाक सेनेचा दावा केला उघड!
कोल्हापुरातील ‘शिवाजी विद्यापीठा’च्या नामांतरासाठी पुन्हा एकदा जनआंदोलन!
डी गुकेशने घेतले तिरुपतीचे दर्शन; केस देवाला अर्पण करत केले मुंडण
एसपींनी पुढे सांगितले की, पीएलएफआय संघटनेचे नक्षली कामदरा पोलिस स्टेशन परिसरात मोठी घटना घडवण्याच्या तयारीत असल्याची गुप्त माहिती मिळाली होती. माहितीच्या आधारे नक्षलवाद्यांवर कारवाई करण्यासाठी बसिया एसडीपीओ नझीर अख्तर यांच्या नेतृत्वाखाली एक विशेष पथक तयार केले. कारवाई दरम्यान बुधवारी (१२ मार्च) रात्री साडेदहा वाजता मुरुमकेला तेतारटोलीजवळ काही संशयास्पद लोक दोन दुचाकींवर येताना दिसले. पोलिसांनी थांबण्याचा इशारा करताच सर्वजण जंगलाकडे पळू लागले. अंधाराचा फायदा घेत दुचाकीवरून प्रवास करणारे लोक पळून जाण्यात यशस्वी झाले. त्याच वेळी दुसऱ्या दुचाकीवरून प्रवास करणाऱ्या तिघांना पकडण्यात आले.
