तृणमूल खासदार महुआ मोईत्रा आणि बीजेडीचे खासदार पिनाकी मिश्रांची लग्नयुती

तृणमूल काँग्रेसच्या खासदार महुआ मोईत्रा यांनी ओडिशातील बीजू जनता दलाचे वरिष्ठ नेते आणि पुरी येथून चार वेळा खासदार राहिलेले पिनाकी मिश्रा यांच्यासोबत लग्न केल्याची माहिती समोर आली आहे. हे लग्न ३ मे २०२५ रोजी जर्मनीत एका अत्यंत गुप्त समारंभात पार पडल्याचे सांगितले जात आहे.

गुप्त समारंभ जर्मनीत झाला
या लग्नाची कोणतीही अधिकृत घोषणा महुआ मोईत्रा किंवा पिनाकी मिश्रा यांनी केली नाही. टीएमसी आणि बीजेडी या दोन्ही पक्षातील अनेक सदस्यांना याबद्दल माहितीच नव्हती. मात्र Telegraph India ने जर्मनीतील काही फोटो प्रकाशित केले आहेत. सोन्याचे दागिने परिधान केलेल्या महुआ मोईत्रा स्मितहास्य करताना या छायाचित्रांत दिसत आहेत. त्यामुळे विवाहाच्या शक्यतेला बळकटी मिळाली आहे.

महुआ मोईत्रा या पश्‍चिम बंगालमधील कृष्णानगर येथून दोन वेळा लोकसभेवर निवडून आलेल्या खासदार आहेत. एकेकाळच्या गुंतवणूक बँकर असलेल्या मोईत्रा या आता संसदेमध्ये आक्रमक भाषणांसाठी आणि सत्ताधाऱ्यांविरुद्ध तीव्र टीकेसाठी ओळखल्या जातात.

पिनाकी मिश्रा कोण आहेत?

पिनाकी मिश्रा हे १९९६ मध्ये तत्कालीन केंद्रीय मंत्री ब्रज किशोर त्रिपाठी यांना पराभूत करून पहिल्यांदा खासदार झाले. ते सर्वोच्च न्यायालयाचे वरिष्ठ वकील असून त्यांचे राजकीय आणि कायदेशीर करिअर तीन दशकांहून अधिक काळ चालले आहे. सध्या ते पुरी लोकसभा मतदारसंघातून खासदार असून वित्त स्थायी समिती आणि व्यवसाय सल्लागार समितीसह अनेक महत्त्वाच्या संसदीय समित्यांचे सदस्य आहेत. त्यांच्या शांत आणि समंजस वकृत्वशैलीमुळे ते संसदेत वेगळेच ठरतात. त्या तुलनेत महुआ मोईत्रा या आक्रमक शैलीच्या नेत्या म्हणून ओळखल्या जातात.

महुआ मोईत्रांचा वैयक्तिक इतिहास

हे महुआ मोईत्रांचे दुसरे लग्न आहे. त्याआधी त्यांचा विवाह डॅनिश वित्तीय व्यावसायिक लार्स ब्रॉरसन यांच्याशी झाला होता. त्यानंतर त्यांचा कायदा व्यावसायिक जय अनंत देहाद्राई यांच्यासोबतचा संबंध खूपच चर्चेत राहिला होता. हा संबंध तुटला तसेच या दोघांमध्ये आरोप-प्रत्यारोप आणि कायदेशीर लढाई सुरू झाली. २०२३ च्या अखेरीस संसदेबाहेर केलेल्या वादग्रस्त विधानांमुळे मोईत्रा यांना निलंबितही करण्यात आले होते.