वांद्रेतील १०० हून अधिक अनधिकृत बांधकामे जमीनदोस्त

मुंबईतील वांद्रे पूर्व परिसरातील गरीबनगर येथे मंगळवारी पश्चिम रेल्वेकडून मोठ्या प्रमाणावर अतिक्रमण हटाव मोहीम राबवण्यात आली. अनेक वर्षांपासून रेल्वेच्या जागेवर उभी राहिलेली अनधिकृत बांधकामे हटवण्यासाठी प्रशासनाने सकाळपासूनच धडक कारवाई सुरू केली. या मोहिमेत पहिल्याच दिवशी १०० हून अधिक झोपड्या आणि बांधकामे जमीनदोस्त करण्यात आली. संपूर्ण परिसरात मोठा पोलीस बंदोबस्त तैनात करण्यात आला होता.

पश्चिम रेल्वेच्या अधिकाऱ्यांनी दिलेल्या माहितीनुसार, गरीबनगर परिसरातील अतिक्रमणांमुळे रेल्वेच्या भविष्यातील विकासकामांमध्ये मोठे अडथळे निर्माण होत होते. विशेषतः वांद्रे टर्मिनस विस्तार प्रकल्पासाठी ही जागा आवश्यक असल्याने उच्च न्यायालयाच्या आदेशानंतर कारवाईला वेग देण्यात आला. पुढील काही दिवसांत हजारो चौरस मीटर जागा अतिक्रमणमुक्त करण्याचे लक्ष्य रेल्वे प्रशासनाने ठेवले आहे.
हे ही वाचा:
फीफा वर्ल्ड कप २०२६ साठी ब्राझील संघात नेमारची पुनरागमन

‘बुलेट’ वेगाने धावणार महाराष्ट्राची अर्थव्यवस्था!

कारवाईदरम्यान जेसीबी, बुलडोझर आणि मोठ्या मनुष्यबळाचा वापर करण्यात आला. रेल्वे सुरक्षा बल, सरकारी रेल्वे पोलीस आणि मुंबई पोलिसांच्या उपस्थितीत ही मोहीम पार पडली. कोणताही अनुचित प्रकार घडू नये यासाठी संपूर्ण परिसर सील करण्यात आला होता. काही ठिकाणी स्थानिक नागरिकांनी विरोध करण्याचा प्रयत्न केला, मात्र पोलिसांनी परिस्थिती नियंत्रणात ठेवली. त्यामुळे परिसरात काही काळ तणावाचे वातावरण निर्माण झाले होते.

स्थानिक रहिवाशांचे म्हणणे आहे की, अनेक कुटुंबे गेल्या अनेक दशकांपासून येथे राहत आहेत. अचानक करण्यात आलेल्या कारवाईमुळे अनेकांच्या डोक्यावरचे छप्पर हिरावले गेले आहे. पुनर्वसनाची प्रक्रिया पूर्ण होण्यापूर्वी घरे तोडली जात असल्याचा आरोपही काही नागरिकांनी केला. महिलांसह अनेक रहिवाशांनी प्रशासनाविरोधात संताप व्यक्त केला.

दरम्यान, मुंबई उच्च न्यायालयाने पश्चिम रेल्वेला अतिक्रमण हटवण्यास परवानगी देताना पात्र झोपडधारकांच्या पुनर्वसनाबाबतही स्पष्ट निर्देश दिले आहेत. २०२१ च्या सर्वेक्षणात पात्र ठरलेल्या नागरिकांना पर्यायी निवासाची सुविधा देण्याची जबाबदारी प्रशासनावर टाकण्यात आली आहे. त्यानुसार काही रहिवाशांचे पुनर्वसन सुरू असल्याचे रेल्वे प्रशासनाने सांगितले.

पश्चिम रेल्वेच्या मते, वांद्रे टर्मिनसचा विस्तार, प्रवाशांसाठी अधिक सुविधा आणि रेल्वे वाहतुकीची क्षमता वाढवण्यासाठी ही कारवाई आवश्यक होती. मुंबईतील वाढती गर्दी लक्षात घेता भविष्यातील रेल्वे प्रकल्पांसाठी जागा उपलब्ध करणे अत्यंत महत्त्वाचे असल्याचे प्रशासनाने स्पष्ट केले. गरीबनगरमधील ही मोहीम मुंबईतील अलीकडच्या काळातील सर्वात मोठ्या अतिक्रमण हटाव कारवायांपैकी एक मानली जात आहे.