पंतप्रधान नरेंद्र मोदी ३० आणि ३१ ऑक्टोबर रोजी गुजरात आणि दिल्लीच्या दौऱ्यावर असतील. दोन दिवसांच्या या कार्यक्रमांतर्गत ते गुजरातमधील केवडिया येथे ‘एकतानगर’मध्ये अनेक विकास प्रकल्पांचे शुभारंभ करतील आणि राष्ट्रीय एकता दिनाच्या समारंभात सहभागी होतील. त्यानंतर ते नवी दिल्ली येथे होणाऱ्या ‘आंतरराष्ट्रीय आर्यन शिखर संमेलन २०२५’ ला संबोधित करतील. ३० ऑक्टोबरच्या संध्याकाळी सुमारे ५.१५ वाजता पंतप्रधान मोदी ‘ग्रीन मोबिलिटी’ला प्रोत्साहन देण्यासाठी ई-बसांना हिरवा झेंडा दाखवतील. संध्याकाळी ६.३० वाजता ते १,१४० कोटी रुपयांहून अधिक किमतीच्या विविध पायाभूत आणि विकास प्रकल्पांचे उद्घाटन व भूमिपूजन करतील. या प्रकल्पांचा उद्देश पर्यटकांचा अनुभव अधिक समृद्ध करणे, परिसरातील संपर्क-सुविधा वाढवणे तसेच इको-टुरिझम आणि शाश्वत विकासाला चालना देणे हा आहे.
पंतप्रधान मोदी ज्या प्रकल्पांचे उद्घाटन करणार आहेत, त्यात राजपीपला येथील बिरसा मुंडा जनजातीय विद्यापीठ, गरुडेश्वरमधील हॉस्पिटॅलिटी डिस्ट्रिक्ट (पहिला टप्पा), वामन वृक्ष वाटिका, सतपुडा सुरक्षा भिंत, ई-बस चार्जिंग डेपो आणि २५ इलेक्ट्रिक बस, नर्मदा घाट विस्तार आणि स्मार्ट बस स्टॉप (दुसरा टप्पा) अशा अनेक प्रकल्पांचा समावेश आहे. याशिवाय पंतप्रधान ‘भारताचे शाही राज्य संग्रहालय’, ‘वीर बालक उद्यान’, ‘क्रीडा संकुल’ आणि ‘वर्षावन प्रकल्प’ अशा नव्या योजनांची पायाभरणी करतील. या प्रसंगी सरदार वल्लभभाई पटेल यांच्या १५० व्या जयंतीनिमित्त १५० रुपयांचे विशेष स्मारक नाणे आणि टपाल तिकीट देखील जारी केले जाईल.
हेही वाचा..
स्टॅच्यू ऑफ युनिटी येथे ‘एकता परेड’ची रंगीत तालीम
गॅंगस्टर अबू सालेमच्या नावाचा वापर करून वृद्धाकडून ७१ लाख लुटले
राष्ट्रपतींनी ‘राफेल’ विमानातून केले उड्डाण!
आशियाई युवा स्पर्धेत रुपेरी चमक दाखविणाऱ्या शौर्याचे मुख्यमंत्री, उपमुख्यमंत्र्यांकडून कौतुक
३१ ऑक्टोबरच्या सकाळी ८ वाजता पंतप्रधान मोदी स्टॅच्यू ऑफ युनिटी येथे सरदार पटेलांना पुष्पांजली अर्पण करतील. त्यानंतर राष्ट्रीय एकता दिन समारंभ होईल, ज्यात ते देशवासीयांना एकतेची शपथ देतील आणि परेडचे निरीक्षण करतील. या परेडमध्ये बीएसएफ, सीआरपीएफ, सीआयएसएफ, आयटीबीपी आणि एसएसबी यांसारख्या अर्धसैनिक दलांच्या तुकड्यांसह विविध राज्यांच्या पोलिस पथकांचा सहभाग असेल. रामपूर हाउंड्स आणि मुधोल हाउंड्स या भारतीय जातींच्या कुत्र्यांचा मार्चिंग दस्ताही विशेष आकर्षण ठरेल. तसेच गुजरात पोलिसांचे घोडदळ आणि आसाम पोलिसांचा मोटारसायकल स्टंट शो देखील परेडचा भाग असतील.
या प्रसंगी सुरक्षा दलांच्या वीरता पदक विजेत्यांना सन्मानित करण्यात येईल. कार्यक्रमात ‘विविधतेत एकता’ या थीमवर आधारित १० राज्ये आणि केंद्रशासित प्रदेशांच्या झांक्या सादर केल्या जातील. सुमारे ९०० कलाकार भारतीय संस्कृतीची विविधता आणि समृद्ध परंपरा दर्शविणारा सांस्कृतिक कार्यक्रम सादर करतील. यानंतर पंतप्रधान मोदी आरंभ ७.० अंतर्गत १०० व्या कॉमन फाउंडेशन कोर्सच्या ६६० अधिकारी-प्रशिक्षणार्थ्यांशी संवाद साधतील. या आवृत्तीचा विषय आहे – “शासनाची पुनर्कल्पना”.
गुजरातमधील कार्यक्रमांनंतर पंतप्रधान मोदी ३१ ऑक्टोबरच्या दुपारी सुमारे २.४५ वाजता रोहिणी (नवी दिल्ली) येथे आयोजित ‘आंतरराष्ट्रीय आर्यन शिखर संमेलन २०२५ मध्ये सहभागी होतील. हा कार्यक्रम महर्षी दयानंद सरस्वती यांच्या २०० व्या जयंती आणि आर्य समाजाच्या १५० व्या वर्षगाठ या निमित्ताने आयोजित ‘ज्ञान ज्योती महोत्सवा’चा एक भाग आहे.
या संमेलनात देश-विदेशातील प्रतिनिधी महर्षी दयानंद यांच्या सुधारवादी विचारांवर चर्चा करतील. ‘सेवा के १५० सुवर्णिम वर्ष’ या प्रदर्शनात आर्य समाजाचे शिक्षण, सामाजिक सुधारणा आणि आध्यात्मिक उन्नतीतील योगदान दर्शविले जाईल. पंतप्रधान मोदी या प्रसंगी जनतेला संबोधित करतील आणि ‘विकसित भारत २०४७ या दृष्टिकोनाशी सुसंगत वैदिक सिद्धांत आणि स्वदेशी मूल्यांच्या प्रसाराचे आवाहन करतील.
