भारतात २०२५ च्या तिसऱ्या तिमाहीत (जुलै ते सप्टेंबर) तंत्रज्ञान क्षेत्रात १.४८ अब्ज अमेरिकन डॉलर्स इतक्या डील्स झाल्या असून, या कालावधीत एकूण ८० व्यवहार नोंदवले गेले आहेत. ही माहिती सोमवार रोजी प्रसिद्ध झालेल्या अहवालात देण्यात आली. बिझनेस अॅडव्हायझरी फर्म ‘ग्रँट थॉर्नटन’च्या अहवालानुसार, तिमाही आधारावर डील्सच्या एकूण मूल्यात ३३ टक्क्यांची वाढ झाली आहे, ज्यावरून दिसते की गुंतवणुकीचा कल आता संख्येपेक्षा गुणवत्तेकडे (वॅल्यू ओव्हर व्हॉल्यूम) वळत आहे.
अहवालात नमूद केले आहे की, ५० दशलक्ष डॉलर्सपेक्षा अधिक मूल्याच्या हाय-वॅल्यू डील्सची संख्या चारपट वाढली आहे. हे दाखवते की गुंतवणूकदारांचा भर आता शाश्वत उद्योग मॉडेल्स आणि सीमापार विस्तारक्षमतेवर (क्रॉस-बॉर्डर स्केलेबिलिटी) आहे. या वाढीचे मुख्य कारण म्हणजे जागतिक आर्थिक परिस्थितीतील बदल आणि गुंतवणूकदारांचा एआय (AI), सास (SaaS) आणि एंटरप्राइज ऑटोमेशन या क्षेत्रांवरील वाढता विश्वास.
हेही वाचा..
बनावट मतदारांचे नावे वगळली जाणार असल्याने ममता बॅनर्जी घाबरल्या
ऑपरेशन सिंदूरमधून स्वदेशी तंत्रज्ञानाची प्रतिष्ठा वाढली
इन्फंट्री डे : भारतीय लष्करी इतिहासातील सुवर्ण अध्याय
दक्षिण कोरियात पाकिस्तानी लष्कराविरुद्ध संताप
टेक्नॉलॉजी क्षेत्रातील विलीन व अधिग्रहण (M&A) व्यवहारांची संख्या २९ होती, ज्यांची एकत्रित किंमत ७४३ दशलक्ष डॉलर्स इतकी होती. यामध्ये तिमाही आधारावर २३९ टक्क्यांची वाढ झाली असून, यामागे एआय आणि ऑटोमेशन-आधारित टेक सर्व्हिसेसमध्ये वाढत्या डील्स कारणीभूत ठरल्या. ग्रँट थॉर्नटन भारत एलएलपीचे भागीदार आणि तंत्रज्ञान उद्योगप्रमुख राजा लाहिरी यांनी सांगितले, २०२५ ची तिसरी तिमाही भारताच्या टेक इकोसिस्टममध्ये झालेल्या स्पष्ट परिवर्तनाचे प्रतीक आहे. गुंतवणूकदार आणि अधिग्रहक आता एआय, सास आणि एंटरप्राइज ऑटोमेशन क्षेत्रातील मूल्य-केंद्रित आणि इन्फ्रास्ट्रक्चरवर आधारित डील्सना प्राधान्य देत आहेत. आगामी काळातील ब्रेकथ्रू कंपन्या डीप-टेक आणि एआय-नेटिव्ह इन्फ्रास्ट्रक्चरमधून उदयास येतील.”
अहवालात पुढे सांगितले आहे की, आउटबाउंड डील्स (विदेशी गुंतवणुकीचे व्यवहार) वाढले असून, एकूण मूल्यात त्यांचा ८७ टक्क्यांचा वाटा आहे. यात १०० दशलक्ष डॉलर्सपेक्षा जास्त मूल्याच्या तीन मोठ्या व्यवहारांचा समावेश आहे. या कालावधीत टेक क्षेत्रात प्रायव्हेट इक्विटी आणि व्हेंचर कॅपिटलच्या एकूण ५० डील्स झाल्या, ज्यांचे एकत्रित मूल्य ५८४ दशलक्ष डॉलर्स इतके होते. हे आकडे तिमाही आधारावर व्हॉल्यूममध्ये ३९ टक्के आणि मूल्यात १७२ टक्क्यांची वाढ दर्शवतात. तथापि, २०२५ च्या तिसऱ्या तिमाहीत टेक क्षेत्रातील आयपीओ क्रियाकलाप मर्यादित राहिले — या कालावधीत फक्त एकच आयपीओ आला आणि कोणताही क्यूआयपी (Qualified Institutional Placement) व्यवहार नोंदवला गेला नाही.
