दिल्लीतील जंतर-मंतर आंदोलनाच्या पार्श्वभूमीवर दिल्ली पोलिसांचे उपायुक्त (डीसीपी) सुमित झा यांनी राजीनामा दिल्याचा दावा करणारा कृत्रिम बुद्धिमत्ता (AI) वापरून तयार करण्यात आलेला कथित बनावट व्हिडिओ सोशल मीडियावर शेअर केल्याप्रकरणी काँग्रेस नेते भाई जगताप यांच्याविरोधात महाराष्ट्र सायबर पोलिसांनी गुन्हा दाखल केला आहे. प्राथमिक तपासात संबंधित व्हिडिओ एआयच्या साहाय्याने तयार करण्यात आल्याचे निष्पन्न झाल्यानंतर ही कारवाई करण्यात आली.
महाराष्ट्र सायबर पोलिसांनी नोडल सायबर पोलीस ठाण्यात एफआयआर क्रमांक ००६३/२०२६ नोंदवला आहे. हा गुन्हा भारतीय न्याय संहिता (BNS) कलम ३५३(२) तसेच माहिती तंत्रज्ञान कायद्यातील संबंधित तरतुदींनुसार दाखल करण्यात आला आहे. भाजपचे सोशल मीडिया सह-समन्वयक निखिल भामरे यांनी दिलेल्या तक्रारीनंतर ही कारवाई करण्यात आली.
तक्रारीनुसार, एक्स हँडलवरून संबंधित व्हिडिओ शेअर करण्यात आला होता. या व्हिडिओमध्ये दिल्ली पोलीस उपायुक्त सुमित झा राजीनामा देत असल्याचे दाखवण्यात आले होते. त्यामध्ये ते, “मी भारतीय पोलीस सेवेतून तात्काळ प्रभावाने राजीनामा देत आहे. सरकारला विद्यार्थ्यांविरोधात खोटे बोलण्याची अपेक्षा होती, मात्र मी निरपराध विद्यार्थ्यांना गुन्हेगार ठरवू शकत नाही,” असे कथितपणे बोलताना दाखवण्यात आले होते.
हे ही वाचा:
काँग्रेसची दुटप्पी भूमिका…कर्नाटकात राहुल गांधींवर टिप्पणी करणाऱ्यांविरोधात गुन्हे
ॲपलला ५०० अब्ज डॉलरचा जबरदस्त फटका
जुलैत सरकारच्या तिजोरीत ₹२.११ लाख कोटींची भर
मात्र, दिल्ली पोलिसांनी आणि पीआयबी फॅक्ट चेक विभागाने हा व्हिडिओ पूर्णपणे बनावट असून तो एआयच्या साहाय्याने तयार करण्यात आल्याचे स्पष्ट केले. महाराष्ट्र सायबर पोलिसांकडून आता हा व्हिडिओ नेमका कुठे तयार करण्यात आला, तो कोणी तयार केला, सोशल मीडियावर कसा प्रसारित करण्यात आला आणि त्यामागे आणखी कोणाचा सहभाग आहे का, याचा तपास सुरू आहे. डिजिटल फॉरेन्सिकच्या माध्यमातून या प्रकरणातील सर्व तांत्रिक पुरावे गोळा केले जात आहेत.
