बँक ऑफ बडोदामध्ये सायबर घुसखोरी; कर्मचाऱ्याचे ई-मेल हॅक

देशातील सार्वजनिक क्षेत्रातील बँक ऑफ बडोदाने समोर आलेल्या कथित डेटा लीक प्रकरणावर अखेर अधिकृत भूमिका स्पष्ट केली आहे. बँकेच्या एका कर्मचाऱ्याचे ई-मेल खाते हॅक झाल्यामुळे काही डेटावर अनधिकृत प्रवेश झाल्याची कबुली बँकेने दिली आहे. मात्र, या घटनेचा बँकेच्या कोअर बँकिंग प्रणालीवर किंवा ग्राहकांच्या व्यवहारांवर कोणताही परिणाम झालेला नसून ती पूर्णपणे सुरक्षित असल्याचा दावा बँकेने केला आहे. या प्रकरणाची सखोल फॉरेन्सिक चौकशी सुरू करण्यात आली असून संबंधित नियामक संस्थांशी समन्वय साधला जात असल्याचेही बँकेने स्पष्ट केले.

सोमवारी सोशल मीडिया प्लॅटफॉर्म ‘एक्स’वर प्रसिद्ध केलेल्या निवेदनात बँकेने म्हटले की, बँकेत मजबूत माहिती सुरक्षा प्रणाली कार्यरत आहे. मात्र, एका कर्मचाऱ्याचे ई-मेल खाते तडजोडीला गेल्यामुळे काही डेटावर अनधिकृत प्रवेश मिळाला. हा प्रकार समोर येताच तातडीने संबंधित खाते वेगळे करण्यात आले आणि आवश्यक सुरक्षा उपाययोजना राबवण्यात आल्या. या संपूर्ण घटनेत बँकेच्या कोअर बँकिंग प्रणालीपर्यंत कोणताही प्रवेश झालेला नसल्याचे बँकेने स्पष्ट केले.

बँकेने या घटनेची सविस्तर फॉरेन्सिक चौकशी सुरू केली असून लागू असलेल्या सर्व नियामक नियमांचे पालन करत संबंधित सरकारी यंत्रणा आणि अधिकाऱ्यांशी सहकार्य केले जात असल्याचे सांगितले. ग्राहकांची माहिती सुरक्षित ठेवणे आणि माहिती सुरक्षेचे सर्वोच्च निकष कायम राखणे ही बँकेची सर्वोच्च प्राथमिकता असल्याचेही निवेदनात नमूद करण्यात आले आहे.

दरम्यान, काही माध्यमांच्या वृत्तानुसार बँक ऑफ बडोदाचा सुमारे एक टेराबाइट संवेदनशील डेटा डार्क वेबवर उपलब्ध असल्याचा दावा करण्यात आला आहे. या डेटामध्ये वैयक्तिक आणि कॉर्पोरेट बँकिंगशी संबंधित माहिती असल्याचे सांगितले जात आहे. तसेच एका हॅकरने आपल्या ताब्यात मोठ्या प्रमाणावर संवेदनशील माहिती असल्याचा दावा केला आहे.

कथित लीक झालेल्या डेटामध्ये बचत आणि चालू खात्यांची माहिती, कर्जाशी संबंधित कागदपत्रे, नेटबँकिंग वापरकर्त्यांचा तपशील, एनआरआय आणि कॉर्पोरेट बँकिंग सेवांशी संबंधित नोंदी, ग्राहक सेवा विभागातील माहिती तसेच शाखा आणि एटीएमशी संबंधित काही अंतर्गत माहितीचा समावेश असल्याचा दावा केला जात आहे. मात्र, या माहितीची अधिकृत पुष्टी बँक ऑफ बडोदाने केलेली नाही. तसेच अद्याप कोणत्याही हॅकर किंवा सायबर गटाने या कथित डेटा लीकची सार्वजनिकपणे जबाबदारी स्वीकारलेली नाही.

हे ही वाचा:

आयटीआर फायलिंगमध्ये विक्रमी वेग; ४ कोटींहून अधिक रिटर्न दाखल

‘नीट’ विद्यार्थ्यांच्या आत्महत्या विसरून ‘कॉक्रोच’ नेत्यांची जंगी पार्टी

अभिषेक बॅनर्जींच्या ‘सेवाश्रय’ शिबिरातील डॉक्टर-विद्यार्थ्यांची होणार चौकशी

“आंदोलन झाले म्हणून लाठीमार करण्याचा अधिकार नाही”

या घटनेनंतर बँकिंग क्षेत्रातील सायबर सुरक्षेचा मुद्दा पुन्हा एकदा चर्चेत आला आहे. कृत्रिम बुद्धिमत्ता आणि अत्याधुनिक सायबर हल्ल्यांच्या वाढत्या पार्श्वभूमीवर वित्तीय संस्थांवरील धोके वाढत असल्याचे तज्ज्ञांचे मत आहे. ग्राहकांनी संशयास्पद ई-मेल, लिंक किंवा कॉलपासून सावध राहावे आणि आपल्या बँक खात्यांशी संबंधित कोणतीही संशयास्पद हालचाल आढळल्यास तातडीने बँकेशी संपर्क साधावा, असे सायबर सुरक्षा तज्ज्ञांनी सुचवले आहे.

दरम्यान, या घडामोडींचा परिणाम शेअर बाजारावरही दिसून आला. सोमवारी राष्ट्रीय शेअर बाजारात (NSE) बँक ऑफ बडोदाचा समभाग ०.९१ टक्क्यांनी घसरून २४४.२० रुपये प्रति समभागावर बंद झाला. बँकेच्या फॉरेन्सिक तपासातून नेमका कोणता डेटा प्रभावित झाला, किती ग्राहकांवर परिणाम झाला आणि डेटा प्रत्यक्षात लीक झाला का, याचे स्पष्ट चित्र पुढील अहवालानंतर समोर येण्याची शक्यता आहे.