छत्तीसगडमध्ये नक्षलवादविरोधी कारवाईमध्ये सुरक्षा दलाला मोठे यश मिळाले आहे. नक्षलवादी आणि सुरक्षा दलामध्ये झालेल्या चकमकीत एका नक्षलवाद्याचा खात्मा करण्यात यश मिळाले आहे. या नक्षलवाद्याच्या डोक्यावर ८ लाख रुपयांचे बक्षीस असल्याची माहिती समोर आली आहे. या वर्षी आतापर्यंत राज्यात वेगवेगळ्या चकमकींमध्ये १४५ नक्षलवादी मारले गेले आहेत.
छत्तीसगडमधील गरियाबंद जिल्ह्यात सुरक्षा दलांशी झालेल्या चकमकीत ८ लाख रुपयांचे बक्षीस असलेला नक्षलवादी ठार झाला. शनिवारी एका वरिष्ठ पोलिस अधिकाऱ्याने ही माहिती दिली. शुक्रवारी संध्याकाळी उशिरा जुगाड पोलिस ठाण्याअंतर्गत येणाऱ्या मोतीपाणी गावाजवळील जंगलात ही चकमक झाल्याचे त्यांनी सांगितले. केंद्रीय राखीव पोलिस दल (CRPF) आणि जिल्हा पोलिसांच्या E-30 युनिटची संयुक्त टीम नक्षलविरोधी कारवाईसाठी निघाली होती. त्यांना हे यश मिळाले आहे.
राजधानी रायपूरपासून १८० किमी अंतरावर असलेल्या या भागात नक्षलवादी कारवायांची माहिती मिळाल्यानंतर ही कारवाई सुरू करण्यात आल्याची माहिती सुरक्षा दलांनी दिली आहे. कारवाई दरम्यान गोळीबार थांबल्यानंतर, घटनास्थळावरून एका नक्षलवाद्याचा मृतदेह, एक सेल्फ-लोडिंग रायफल (एसएलआर) आणि मोठ्या प्रमाणात स्फोटके जप्त करण्यात आली, असे त्यांनी सांगितले. त्यांनी सांगितले की, मारल्या गेलेल्या नक्षलवाद्याची ओळख विभागीय समिती सदस्य योगेश म्हणून झाली आहे. तसेच त्याच्या डोक्यावर ८ लाख रुपयांचे बक्षीस होते.
हे ही वाचा..
भारताच्या मच्छिमारांवर श्रीलंकन चाच्यांचा हल्ला; १७ जण जखमी
आतंकवाद्यांविरुद्ध भारत निर्णायक कारवाई करणार
पाकिस्तानमधून येणाऱ्या सर्व पोस्टल, पार्सल सेवांवर भारताकडून बंदी
पावसाळ्यात उगवणारे रहस्यमय औषधी वनस्पती कोणते ? जाणून घ्या फायदे
आकडेवारीनुसार, या वर्षी आतापर्यंत राज्यात वेगवेगळ्या चकमकीत १४५ नक्षलवादी मारले गेले आहेत. यापैकी १२८ जणांचा मृत्यू बस्तर विभागात झाला, ज्यामध्ये सात जिल्हे समाविष्ट आहेत, तर १७ जणांचा मृत्यू रायपूर विभागात येणाऱ्या गरियाबंद जिल्ह्यात झाला.
