अमेरिकेतील साल्ट लेक सिटी, यूटा राज्यात एका चर्चच्या बाहेर झालेल्या गोळीबारात दोन जणांचा मृत्यू झाला असून किमान आठ जण जखमी झाले आहेत. ही धक्कादायक घटना चर्चमध्ये सुरू असलेल्या अंत्यसंस्काराच्या वेळी घडल्याने संपूर्ण परिसरात भीतीचे वातावरण निर्माण झाले आहे.
पोलिसांनी दिलेल्या माहितीनुसार, चर्चच्या पार्किंग परिसरात काही व्यक्तींमध्ये आधी वाद झाला. हा वाद काही वेळातच वाढत गेला आणि अचानक गोळीबार सुरू झाला. त्याच वेळी चर्चच्या आत अंत्यसंस्कारासाठी प्रार्थना सुरू होती. गोळीबाराचा आवाज ऐकताच अंत्यसंस्कारासाठी उपस्थित असलेल्या नागरिकांमध्ये एकच गोंधळ उडाला आणि अनेकांनी जीव वाचवण्यासाठी सुरक्षित ठिकाणी धाव घेतली.
या घटनेत जखमी झालेल्या आठ जणांपैकी तीन जणांची प्रकृती गंभीर असल्याचे पोलिसांनी सांगितले आहे. उर्वरित जखमींवर रुग्णालयात उपचार सुरू असून त्यांची प्रकृती सध्या स्थिर असल्याची माहिती आहे. सर्व जखमींना तातडीने जवळच्या रुग्णालयात दाखल करण्यात आले आहे.
हे ही वाचा :
आय-पॅकवरील धाडीने ममता बॅनर्जी इतक्या का बिथरल्या?
ट्रम्प मोदींवर पुन्हा पिसाटले, हे आहे मोठे कारण…
डेमियन मार्टिनची प्रकृती सुधारणे म्हणजे चमत्कारच
घटनेनंतर पोलिसांनी संपूर्ण परिसर सील करून मोठ्या प्रमाणावर शोधमोहीम सुरू केली आहे. संशयितांचा शोध घेण्यासाठी अतिरिक्त पोलीस पथके तैनात करण्यात आली असून, घटनास्थळी उपस्थित असलेल्या व्यक्तींची कसून चौकशी केली जात आहे. तसेच, उपलब्ध सीसीटीव्ही फुटेज आणि इतर पुराव्यांच्या आधारे तपास सुरू आहे.
दरम्यान, पोलिस अधिकाऱ्यांनी स्पष्ट केले की हा गोळीबार कोणत्याही धर्माला किंवा धार्मिक स्थळाला लक्ष्य करून करण्यात आलेला नाही. प्राथमिक तपासात हा प्रकार वैयक्तिक वादातून घडल्याचे संकेत मिळत असल्याचे त्यांनी सांगितले. धार्मिक द्वेषातून हा हल्ला झाल्याचा कोणताही पुरावा आढळलेला नाही, असेही पोलिसांनी स्पष्ट केले.
या घटनेनंतर साल्ट लेक सिटी परिसरात तणावाचे वातावरण असून, स्थानिक प्रशासनाने सुरक्षेचे कडक उपाय लागू केले आहेत. नागरिकांनी शांतता राखावी आणि अफवांवर विश्वास ठेवू नये, असे आवाहन पोलिस प्रशासनाने केले आहे.
