अफगाणिस्तानातील तालिबान सरकारने अमेरिकेचे राष्ट्राध्यक्ष डोनाल्ड ट्रम्प यांच्या बगराम हवाई तळाबाबतच्या वक्तव्यावर जोरदार प्रत्युत्तर दिले आहे. तालिबान सरकारचे माहिती आणि संस्कृती मंत्री मुहाजिर फराही यांनी, “डोनाल्ड ट्रम्प यांना बगराम हवाई तळ फक्त स्वप्नातच मिळू शकतो,” असा टोला लगावत अफगाणिस्तानच्या सार्वभौमत्वावर कोणताही देश गदा आणू शकणार नाही, असे स्पष्ट केले. त्याचवेळी त्यांनी पाकिस्तानलाही कठोर इशारा देत भारताशी व्यापार आणि लोकसंपर्क अधिक मजबूत करण्याची इच्छा व्यक्त केली आहे.
फराही यांनी ‘इंडिया टुडे’ला दिलेल्या विशेष मुलाखतीत सांगितले की, बगराम हवाई तळावर पुन्हा अमेरिकेचा ताबा मिळवण्याचा प्रश्नच उद्भवत नाही. “अफगाणिस्तान हा स्वतंत्र देश आहे आणि आमच्या भूमीवर परकीय नियंत्रण स्वीकारले जाणार नाही. ट्रम्प यांना बगराम तळ फक्त त्यांच्या स्वप्नातच मिळू शकतो,” असे त्यांनी ठामपणे म्हटले.
अफगाणिस्तान-पाकिस्तान सीमावादाच्या पार्श्वभूमीवर फराही यांनी इस्लामाबादवरही निशाणा साधला. “पाकिस्तानच्या लष्करी सत्ताधाऱ्यांना आम्ही ठोस उत्तर दिले आहे. आमच्या सार्वभौमत्वाचे रक्षण करण्यासाठी आम्ही कोणतीही तडजोड करणार नाही,” असे ते म्हणाले. दोन्ही देशांमध्ये सीमावाद, दहशतवाद आणि सुरक्षा प्रश्नांवरून गेल्या काही महिन्यांपासून तणाव कायम आहे.
भारताबाबत बोलताना फराही यांनी सकारात्मक भूमिका मांडली. “भारताशी आमचे ऐतिहासिक आणि सांस्कृतिक संबंध आहेत. कोणताही देश आम्हाला कोणाशी मैत्री करावी किंवा करू नये, हे सांगू शकत नाही. भारतासोबत लोकसंपर्क, व्यापार आणि आर्थिक सहकार्य अधिक वाढवण्याची आमची इच्छा आहे,” असे त्यांनी सांगितले.
फराही यांनी सांगितले की, पाकिस्तान सीमारेषेवर वारंवार उद्भवणाऱ्या अडथळ्यांमुळे अफगाणिस्तान आता पर्यायी व्यापारी मार्ग शोधत आहे. भारतासह इतर देशांशी व्यापार वाढवून आयात-निर्यात अधिक सक्षम करण्यावर तालिबान सरकार भर देत आहे. त्यांच्या मते, एका देशावर अवलंबून राहण्याऐवजी विविध देशांसोबत व्यापार वाढवणे हे अफगाणिस्तानच्या हिताचे आहे.
हे ही वाचा:
मोदींच्या उपक्रमांवर कॉपीराइट नाही हे नशीब…इंडोनेशियाच्या पंतप्रधानांनी केला विनोद
ओपेकचा मोठा निर्णय; तेलाचे दर कोसळण्याची चिन्हे!
FPIचा यू-टर्न! बँकिंग शेअर्समध्ये पैशांचा महापूर
गर्भवती असल्यामुळे टीसीएस धर्मांतरणातील मुख्य आरोपी निदा खानला जामीन
काबूलच्या उत्तरेस असलेला बगराम हवाई तळ अमेरिकेने २००१ नंतर अफगाणिस्तानातील लष्करी कारवायांसाठी प्रमुख तळ म्हणून वापरला होता. २०२१ मध्ये अमेरिकन सैन्याने माघार घेतल्यानंतर हा तळ तालिबानच्या ताब्यात गेला. त्यानंतर डोनाल्ड ट्रम्प यांनी अनेकदा या तळाचे सामरिक महत्त्व अधोरेखित करत तो पुन्हा अमेरिकेकडे असायला हवा होता, असे वक्तव्य केले आहे. मात्र तालिबानने हा दावा स्पष्ट शब्दांत फेटाळला आहे.
