अमेरिकेच्या इडाहो राज्यात आयोजित एअर शोदरम्यान रविवारी (१७ मे) अमेरिकन नौदलाची दोन लढाऊ विमाने स्टंट करताना हवेत एकमेकांवर आदळून कोसळली. मात्र या भीषण अपघातात दोन्ही विमानांतील चारही क्रू सदस्यांनी वेळेत इजेक्ट होत आपला जीव वाचवला. अधिकाऱ्यांनी दिलेल्या माहितीनुसार, सर्वांची प्रकृती स्थिर असून त्यांना वैद्यकीय निरीक्षणाखाली ठेवण्यात आले आहे. हा अपघात पश्चिम इडाहोमधील माउंटन होम एअर फोर्स बेसजवळ आयोजित ‘गनफायटर स्काईज एअर शो’च्या दुसऱ्या दिवशी घडला.
अमेरिकेच्या पॅसिफिक फ्लीट नेव्हल एअर फोर्सच्या प्रवक्त्या कमांडर अमेलिया उमायम यांनी सांगितले की, अपघातग्रस्त दोन्ही विमाने अमेरिकन नौदलाची EA-18G ग्राउलर जेट्स होती. ही विमाने वॉशिंग्टनमधील व्हिडबी आयलंड येथील इलेक्ट्रॉनिक अटॅक स्क्वाड्रन 129 (VAQ-129) शी संबंधित होती. अधिकाऱ्यांच्या माहितीनुसार, स्थानिक वेळेनुसार दुपारी सुमारे १२:१० वाजता हवाई प्रात्यक्षिकादरम्यान दोन्ही विमानांची टक्कर झाली. ही टक्कर एअर बेसपासून सुमारे दोन मैल उत्तर-पश्चिम दिशेला झाली. टक्कर होताच चारही वैमानिकांनी इजेक्ट होऊन पॅराशूटच्या मदतीने सुरक्षित लँडिंग केले.
सोशल मीडियावर व्हायरल झालेल्या व्हिडीओमध्ये दोन्ही लढाऊ विमाने हवेत धडकल्यानंतर आगीच्या ज्वाळांमध्ये वेगाने खाली कोसळताना दिसत आहेत. आकाशात काळ्या धुराचे मोठे लोटही दिसून आले. व्हिडीओमध्ये चार पॅराशूट स्पष्टपणे दिसत असल्याने सर्व वैमानिक सुरक्षित बाहेर पडल्याची पुष्टी झाली. 366 व्या फायटर विंगचे कमांडर कर्नल डेविड आर. गंटर यांनी निवेदनात म्हटले, “आजच्या घटनेत सहभागी असलेले सर्वजण सुरक्षित असल्याबद्दल आम्ही अत्यंत आभारी आहोत.” त्यांनी आपत्कालीन सेवा आणि बचाव पथकांचे कौतुक करत उपस्थित नागरिकांच्या संयम आणि सहकार्याबद्दल आभार मानले.
हे ही वाचा:
पंतप्रधान मोदी नॉर्वेमध्ये दाखल; पंतप्रधान स्टोरे यांनी केले स्वागत
बंगालमध्ये मौलांनांची भाषा बदलली… गाईचं मांस खाऊ नका, तिला राष्ट्रीय प्राणी घोषित करा!
“भारत समजून घेण्यात कमतरता” प्रेस स्वातंत्र्याच्या मुद्द्यावर भारताची भूमिका
जिहादी कारवायांआधी त्याला हेअर ट्रान्सप्लांट करावेसे वाटले!
घटनेनंतर दुपारी १२:३० वाजता एअर बेस तातडीने लॉकडाउन करण्यात आला. बचाव कार्य सुरू असताना प्रेक्षकांना काही काळ तिथेच थांबण्यास सांगण्यात आले, जेणेकरून आपत्कालीन पथकांना कोणताही अडथळा येऊ नये. त्यानंतर सुमारे दुपारी ३ वाजता लोकांना बेसमधून बाहेर जाण्याची परवानगी देण्यात आली. माउंटन होम पोलिसांनी अपघातानंतर एअर शो रद्द करण्यात आल्याची घोषणा केली आणि नागरिकांना एअर बेसकडे प्रवास टाळण्याचे आवाहन केले. दरम्यान, अमेरिकन नौदल आणि संबंधित यंत्रणांनी या अपघाताची चौकशी सुरू केली असून तांत्रिक आणि सुरक्षा तज्ज्ञांची टीम घटनास्थळी तपास करत आहे.
