४,००० मृत्यू अन् आर्थिक संकट; व्हेनेझुएलावर दुहेरी आघात!

व्हेनेझुएलामध्ये झालेल्या विनाशकारी दुहेरी भूकंपामुळे मृतांचा आकडा ४,००० च्या वर गेला असल्याची पुष्टी तेथील सरकारने केली आहे, तसेच मदतकार्य अद्याप सुरू आहे. २४ जून रोजी झालेल्या सलग भूकंपांमुळे ‘ला गुएरा’ (La Guaira) या किनारपट्टीवरील राज्यातील संपूर्ण जिल्हे उद्ध्वस्त झाले. यात किमान ४,११८ लोकांचा मृत्यू झाला आणि १६,७४० जण जखमी झाले, अशी माहिती व्हेनेझुएलाच्या संसदेचे प्रमुख जॉर्ज रॉड्रिग्ज यांनी ‘टेलिग्राम’वरील एका पोस्टमध्ये दिली.

मध्य काराकसमध्ये ३.० तीव्रतेचा भूकंप

त्यांनी नमूद केले की, अजूनही हजारो लोक बेपत्ता आहेत. गेल्या महिन्यात, ७.२ तीव्रतेचा धक्का बसल्यानंतर अवघ्या ३९ सेकंदांनी ७.५ तीव्रतेचा भूकंप झाला – जो गेल्या शतकाभरातील व्हेनेझुएलामधील सर्वात मोठा भूकंप होता – आणि यामुळे या भागातील उंच इमारतींचे संपूर्ण संकुल जमीनदोस्त झाले. बचाव पथकांनी जीवित वाचलेल्यांच्या शोधाचे काम थांबवले असले, तरी मृतांवर सन्मानपूर्वक अंत्यसंस्कार करता यावेत या आशेने त्यांचे कुटुंबीय ढिगाऱ्याखाली आपल्या प्रियजनांचा शोध घेत आहेत. देशाला भूकंपाच्या धक्क्यांनंतर होणाऱ्या ‘आफ्टरशॉक्स’चाही (aftershocks) सामना करावा लागत आहे. शुक्रवारी, मध्य काराकसमध्ये ३.० तीव्रतेचा भूकंप झाला, ज्यामुळे काही काळ घबराट पसरली आणि इमारती रिकाम्या कराव्या लागल्या.

आर्थिक संकट हा मोठा अडथळा

दीर्घकाळ चाललेल्या आर्थिक संकटामुळे सरकारी सेवांची स्थिती अत्यंत खालावली असतानाच, व्हेनेझुएलासमोर पुनर्बांधणीचे प्रचंड मोठे आव्हान उभे राहिले आहे. बुधवारी, संयुक्त राष्ट्रांनी (UN) या दक्षिण अमेरिकन देशातील १.३ दशलक्ष (१३ लाख) गरजू लोकांना मदत करण्यासाठी भूकंप निवारण कार्यासाठी सुमारे ३०० दशलक्ष डॉलर्सची तातडीची मागणी केली; विशेष म्हणजे, या देशात अलीकडच्या काळापर्यंत स्वयंसेवी संस्थांना सरकारी दडपशाहीचा सामना करावा लागत होता. संयुक्त राष्ट्रांच्या ‘आपत्ती जोखीम निवारण कार्यालयाने’ (UNDRR) असा अंदाज वर्तवला आहे की, भूकंपांमुळे घरे आणि पायाभूत सुविधांचे झालेले थेट भौतिक नुकसान तब्बल ३७ अब्ज डॉलर्स इतके आहे. या पार्श्वभूमीवर, व्हेनेझुएलाच्या अंतरिम राष्ट्राध्यक्ष डेल्सी रॉड्रिग्ज यांनी पुनर्बांधणीसाठी परदेशात गोठवलेली मालमत्ता (assets) मुक्त करण्याची मागणी केली आहे.

हे ही वाचा:

एकेकाळी ‘नकोशी’ असणारी वाघीण बनली गिरडच्या जंगलाची ‘राणी’

भारतीय नौदलाला नवे बळ! अत्याधुनिक ‘आयएनएस महेंद्रगिरी’ ताफ्यात

राम मंदिर गैरव्यवहार प्रकरणी २० जणांना जिल्हा सोडण्यास बंदी

“काश्मीरमध्ये आमचेच दहशतवादी लढले आणि…”, हिजबुल कमांडरच्या कबुलीने पाकची नाचक्की

बुधवारी त्यांनी सांगितले की, त्यांनी ब्रिटनचे राजे चार्ल्स तृतीय यांच्याकडे युकेच्या निर्बंधांमुळे गोठवलेले व्हेनेझुएलाचे सुमारे ३० टन सोने मुक्त करण्याची विनंती केली आहे. तसेच, त्यांनी दुहेरी भूकंपाच्या वेळी देशाने केलेल्या आपत्कालीन उपाययोजनांचे समर्थन केले आणि देशात सामाजिक अशांतता निर्माण होणार नाही, असा निर्धार व्यक्त केला.