वोटचोरी झालीच नाही! सोनीपतच्या अंजलीने केली राहुल गांधींची पोलखोल

लोकसभेतील विरोधी पक्षनेते आणि काँग्रेस खासदार राहुल गांधी यांनी बुधवारी दिल्लीतील पक्षाच्या मुख्यालयात मतदार पडताळणी या विषयावर पत्रकार परिषद घेतली. या दरम्यान त्यांनी २०२४ मधील हरियाणा विधानसभा निवडणुकांचा मुद्दा उपस्थित केला. पत्रकार परिषदेत राहुल गांधी यांनी हरियाणाच्या सोनीपत येथील एका महिला मतदाराचा व्हिडिओ दाखवत “मत चोरी” झाल्याचा आरोप केला.

त्या व्हिडिओमध्ये महिला स्वतःचे नाव अंजली त्यागी असे सांगते आणि ती हरियाणातील सोनीपतची रहिवासी असल्याचे नमूद करते. मात्र आता, “मत कापले” असा दावा करणाऱ्या अंजली त्यागीच्या वक्तव्यामागील खरी वस्तुस्थिती समोर आली आहे. भारतीय जनता पक्षाचे राष्ट्रीय प्रवक्ते प्रदीप भंडारी यांनी अंजली त्यागीचा एक नवीन व्हिडिओ शेअर केला आहे, ज्यात अंजलीने राहुल गांधींच्या “मत चोरी”च्या दाव्याला पूर्णतः नाकारले आहे.

हेही वाचा..

जिऱ्याचे चमत्कारी गुण बघा

ड्रग्ज तस्कर अकबर खाऊला ओडिशातून अटक

वाळवंटात ‘अखंड प्रहार’ मोहिमेचं प्रदर्शन

राहुल गांधींनी दाखवलेल्या त्या ‘ब्राझिलियन मॉडेल’चे हे आहे सत्य

व्हिडिओमध्ये अंजली त्यागी म्हणते, “माझ्या व्हिडिओचा चुकीच्या संदर्भात वापर करण्यात आला. राहुल गांधींनी माझ्या मतदार संदर्भातील बोलण्याचा अर्थ बदलून दाखवला. त्यांच्या आरोपांशी मी सहमत नाही. मी २०२४ला मतदान केले आहे. माझ्या नावापुढे चुकीचा फोटो होता पण मी आधार कार्ड दाखवल्यावर मी मतदान करू शकले. प्रदीप भंडारी यांनी हा व्हिडिओ ‘एक्स’या सोशल मीडिया प्लॅटफॉर्मवर शेअर केला आणि लिहिले, “राहुल गांधींची आणखी एक खोटी बातमी पकडली गेली. त्यांच्या पत्रकार परिषदेत दाखवलेली हरियाणातील महिला स्वतःच म्हणते की तिच्या व्हिडिओचा गैरवापर झाला आणि राहुल गांधी खोटं बोलले. मतदारांनी लोकशाहीविरोधी राहुल गांधींचा मुखवटा फाडला आहे.”

ही पहिली वेळ नाही की राहुल गांधींच्या “मत चोरी”च्या दाव्याची पोल उघड झाली आहे. यापूर्वीही बिहारमधील ‘मतदार अधिकार यात्रा’दरम्यान रोहतास जिल्ह्यातील रंजू देवी यांनीही आपले आणि आपल्या कुटुंबातील सदस्यांचे नावे मतदार यादीतून कापल्याचा राहुल गांधींचा दावा असत्य ठरवला होता. त्याच पत्रकार परिषदेत राहुल गांधींनी कथितपणे ब्राझीलच्या एका मॉडेलचा फोटो दाखवत म्हटले होते की तिच्या नावावर १० मतदान केंद्रांमध्ये २२ बनावट मते नोंदवली गेली आहेत. राहुल गांधींनी हा प्रकार हरियाणातील २५ लाख “मत चोरी”च्या उदाहरणांपैकी एक असल्याचा दावा केला होता.