बिहार : भाजपचे केशव प्रसाद मौर्य पर्यवेक्षकपदी निवड

बिहार विधानसभा निवडणुकीत एनडीएने प्रचंड बहुमतासह विजय मिळवला आहे. एनडीएला एकूण २०२ जागा मिळाल्या असून भाजप सर्वात मोठा पक्ष ठरला आहे. भाजपला ८९ आणि जदयूला ८५ जागा मिळाल्या आहेत. आता भाजपने उत्तर प्रदेशचे उपमुख्यमंत्री केशव प्रसाद मौर्य यांची बिहारमध्ये केंद्रीय पर्यवेक्षक म्हणून नियुक्ती केली आहे. भाजपचे राष्ट्रीय महासचिव अरुण सिंह यांनी जारी केलेल्या एका प्रसिद्धीपत्रकात म्हटले आहे की, बिहारमध्ये भाजपाच्या विधिमंडळ पक्षनेत्यांच्या निवडीसाठी भाजप संसदीय मंडळाने यूपीचे उपमुख्यमंत्री केशव प्रसाद मौर्य यांना केंद्रीय पर्यवेक्षक म्हणून नियुक्त केले आहे. तसेच केंद्रीय कायदा आणि न्याय मंत्री अर्जुन राम मेघवाल आणि माजी केंद्रीय मंत्री साध्वी निरंजन ज्योति यांची केंद्रीय सह-पर्यवेक्षक म्हणून नियुक्ती करण्यात आली आहे.

बिहार विधानसभा निवडणुकीच्या निकालांमध्ये विरोधकांना करारी पराभवाला सामोरे जावे लागले असून एनडीएला मोठा विजय मिळाला आहे. आता विधिमंडळ पक्षनेत्याची निवड होणार आहे. यासाठी भाजपने केंद्रीय पर्यवेक्षक म्हणून यूपीचे उपमुख्यमंत्री आणि भाजपचे वरिष्ठ नेते केशव प्रसाद मौर्य यांची नियुक्ती केली आहे. बिहार निवडणुकीत भाजपला ८९, जदयूला ८५, राजदला २५ , लोक जनशक्ती पार्टी (रामविलास) ला १९ , काँग्रेसला ६, एआयएमआयएमला ५ आणि हिंदुस्तान आवाम मोर्चाला ५ जागा मिळाल्या आहेत.

हेही वाचा..

मॅकॉलेने भारतीय शिक्षणावर लादलेली गुलामी १० वर्षांत फेकून देऊया!

एस.एस. राजामौली यांच्याविरोधात तक्रार

“हिंदूंच्या श्रद्धांशी खेळण्याचा प्रयत्न करू नका!”

मुंबईसह उपनगरांमध्ये परवडणारी घरे मिळणार! राज्य मंत्रिमंडळात घेतला ‘हा’ निर्णय

बिहारमध्ये एनडीए सरकार स्थापनेची प्रक्रिया सुरू झाली आहे. पटना येथील गांधी मैदानात नवीन मुख्यमंत्री शपथ घेणार असून त्यासाठीची तयारी वेगाने सुरू आहे. बिहार भाजपाध्यक्ष दिलीप जायसवाल यांच्या मते, २० नोव्हेंबरला शपथविधी होणार आहे. १९ नोव्हेंबरला विधिमंडळ पक्षाची बैठक होईल. या कार्यक्रमाला दोन ते तीन लाख लोक उपस्थित राहतील, ज्यामध्ये पंतप्रधान नरेंद्र मोदी, विविध राज्यांचे मुख्यमंत्री आणि अनेक मान्यवरांचा समावेश असेल.