पश्चिम बंगालमध्ये २३ एप्रिल रोजी होणाऱ्या विधानसभा निवडणुकीच्या पहिल्या टप्प्यापूर्वी केंद्रीय निवडणूक आयोगाने (ECI) कठोर पावले उचलत काही निर्बंध घातले आहेत. रात्री बाइक चालवण्यावर बंदी घातली आहे. स्वतंत्र, निष्पक्ष आणि शांततापूर्ण मतदान सुनिश्चित करण्यासाठी हा निर्णय घेण्यात आला आहे.
आदेशानुसार, निवडणूक कालावधीत संध्याकाळी ६ वाजल्यापासून सकाळी ६ वाजेपर्यंत बाइक चालवण्यास मनाई असेल. मात्र, वैद्यकीय आपत्कालीन परिस्थिती, कौटुंबिक गरजा किंवा इतर वैध कारणांसाठी सवलत देण्यात आली आहे. अशा वेळी संबंधित व्यक्तीने स्थानिक पोलीस ठाण्यातून परवानगी घेणे आणि योग्य कारण सांगणे आवश्यक असेल.
आयोगाने पिलियन रायडिंग (बाइकवर मागे बसण्यावर) देखील निर्बंध घातले आहेत. सकाळच्या वेळेतही पिलियन रायडिंगला फक्त वैद्यकीय आपत्कालीन परिस्थिती किंवा शालेय मुलांना ने-आण करण्यापुरतीच परवानगी असेल. बाइक रॅलींच्या माध्यमातून मतदारांना धमकावणे किंवा प्रभावित करण्याची शक्यता लक्षात घेऊन हा निर्णय घेण्यात आल्याचे आयोगाचे मत आहे.
पहिल्या टप्प्यात राज्यातील १९४ पैकी १५२ विधानसभा मतदारसंघांमध्ये मतदान होणार आहे. संवेदनशील भागांमध्ये विशेष लक्ष ठेवण्यात येत असून कोणत्याही प्रकारच्या गैरप्रकारांना आळा घालण्यासाठी कडक सुरक्षा व्यवस्था तैनात करण्यात आली आहे. मुख्य निवडणूक आयुक्त ज्ञानेश कुमार यांनी यापूर्वीच स्पष्ट केले होते की, निष्पक्ष निवडणूक सुनिश्चित करण्यासाठी आयोग सर्वतोपरी प्रयत्न करेल. याच अनुषंगाने मद्यविक्रीवरही कडक निर्बंध लावण्यात आले आहेत.
हे ही वाचा:
ट्रम्प यांचा यू-टर्न; इराणसोबतचा शस्त्रसंधी करार वाढवला
“भारताविरुद्धच्या कृत्यांना प्रत्युत्तर निश्चित!”
“भारत कोणत्याही प्रकारच्या दहशतीपुढे झुकणार नाही”
२०२६ ची चारधाम यात्रा सुरू: तारखा, मार्ग, नोंदणी आणि नवीन नियमांची संपूर्ण माहिती
मतदानापूर्वी ९६ तास राज्यभरातील सर्व मद्य दुकाने बंद ठेवण्याचे आदेश देण्यात आले आहेत. यामध्ये क्लब, पब आणि हॉटेल्समध्ये मद्य देण्यावरही बंदी घालण्यात आली आहे. अचानक जाहीर करण्यात आलेल्या ‘ड्राय डे’मुळे काही ठिकाणी गोंधळाची स्थिती निर्माण झाली आहे.
काही नागरिकांनी प्रश्न उपस्थित केला आहे की, ज्या काही जिल्ह्यांमध्येच मतदान होणार आहे, तिथे संपूर्ण राज्यात बंदी का लागू करण्यात आली? यावर संबंधित विभागाने सांगितले की, निवडणुकीदरम्यान मतदारांना प्रभावित करण्यासाठी मद्याचा वापर होऊ शकतो, त्यामुळे खबरदारीचा उपाय म्हणून संपूर्ण राज्यात हा व्यापक निर्बंध लागू करण्यात आला आहे.
