प्रधानमंत्री नरेंद्र मोदी यांनी संविधान दिनानिमित्त भारतीय नागरिकांना पत्र लिहून १९४९ मध्ये संविधान स्वीकृत झाल्याच्या ऐतिहासिक घटनेचे स्मरण केले आणि देशाच्या प्रगतीत संविधानाचे महत्त्व अधोरेखित केले. त्यांनी सांगितले की २०१५ मध्ये या पवित्र दस्तावेजाचा गौरव करण्यासाठी २६ नोव्हेंबरला संविधान दिन म्हणून घोषित करण्यात आले.
मोदी यांनी स्पष्ट केले की, संविधानाने सर्वसामान्यांना देशसेवेची संधी दिली, अगदी त्यांना देखील, जे साध्या कुटुंबातून आले. त्यांनी २०१४ मध्ये संसद भवनाच्या पायऱ्यांना नतमस्तक होणे आणि २०१९ मध्ये संविधानाला कपाळावर धरण्याचा क्षण आठवला. संविधानाने नागरिकांना मोठी स्वप्ने पाहण्याचे आणि ती पूर्ण करण्याचे सामर्थ्य दिले, असे त्यांनी नमूद केले.
संविधान निर्मात्यांना श्रद्धांजली वाहताना त्यांनी डॉ. राजेंद्र प्रसाद, डॉ. बाबासाहेब आंबेडकर आणि अनेक महिला सदस्यांचे योगदान गौरवले. त्यांनी गुजरातमध्ये झालेल्या संविधान गौरव यात्रा, तसेच संविधानाच्या ७५ वर्षांच्या निमित्ताने आयोजित संसद अधिवेशन आणि देशभरातील कार्यक्रम यांचा उल्लेख केला, ज्यांना मोठ्या प्रमाणावर लोकांचा सहभाग लाभला.
हे ही वाचा:
डॉ. दीपक शिकारपूर लिखित कृत्रिम बुद्धिमत्ता विषयक ब्रेल पुस्तक प्रकाशित
श्रीराम मंदिराच्या चित्ताकर्षक सुशोभीकरणाने लक्ष वेधले
हिंदूराष्ट्र घोषित करण्याची आता गरजच नाही…
दुबईस्थित ड्रग्ज तस्कर पवन ठाकूरला अटक; भारतात पाठवणार
या वर्षीचा संविधान दिन विशेष असल्याचे सांगून मोदी म्हणाले की, हा दिवस सरदार वल्लभभाई पटेल आणि भगवान बिरसा मुंडा यांची १५०वी जयंती, वंदे मातरमची १५० वर्षे आणि गुरु तेग बहादुर यांच्या ३५०व्या हौतात्म्य वर्षाशी संबंधित आहे. या व्यक्तिमत्त्वांनी आणि घटना कर्तव्यांच्या महत्त्वाची जाणीव करून दिली आहे, असे त्यांनी नमूद केले, तसेच महात्मा गांधींचा विश्वास अधिकार कर्तव्य पालनातून मिळतात, याची आठवण करून दिली.
भविष्यातील भारताबद्दल बोलताना मोदी म्हणाले की, या शतकातील २५ वर्षे संपली असून, पुढील दोन दशकांत भारताला स्वातंत्र्य मिळून १०० वर्षे पूर्ण होतील, तसेच २०४९ मध्ये संविधान स्वीकृतीचे शताब्दी वर्ष येईल. आज घेतले जाणारे निर्णय आगामी पिढ्यांचे भविष्य घडवतील, म्हणून कर्तव्यांना प्राधान्य द्या आणि विकसित भारताच्या संकल्पनेकडे वाटचाल करा, असे आवाहन त्यांनी नागरिकांना केले.
मतदानाच्या कर्तव्यावर विशेष भर देत मोदी म्हणाले की, मत दिल्याने लोकशाही मजबूत होते. त्यांनी सुचवले की शाळा आणि महाविद्यालयांनी १८ वर्षांचे प्रथमच मतदार झालेले तरुणांचे सन्मान करून संविधान दिन साजरा करावा. जबाबदारी आणि अभिमानाची भावना तरुणांना प्रेरणा देईल आणि लोकशाही बळकट होईल, असा त्यांना विश्वास आहे.
या पत्राच्या शेवटी, मोदींनी नागरिकांना आवाहन केले की, या महान राष्ट्राचे नागरिक म्हणून आपली कर्तव्ये पार पाडण्याची प्रतिज्ञा करा आणि विकसित भारत निर्मितीत सक्रिय योगदान द्या.
मोदींनी सोशल मीडिया प्लॅटफॉर्म ‘एक्स’ वर संविधान निर्मात्यांना श्रद्धांजली वाहत लिहिले, “संविधान दिवसानिमित्त आपण संविधान निर्मात्यांना सलाम करतो. त्यांची दूरदृष्टी आणि मूल्ये आपल्याला विकसित भारत घडविण्याच्या प्रयत्नांना प्रेरणा देतात. आपले संविधान मानवी प्रतिष्ठा, समता आणि स्वातंत्र्याला सर्वोच्च स्थान देते. ते आपल्याला अधिकार देते, तसेच कर्तव्यांची जाणीव करून देते. कर्तव्यपालन ही मजबूत लोकशाहीची आधारशिला आहे. चला, आपल्या कृतीतून संवैधानिक मूल्ये मजबूत करण्याची प्रतिज्ञा करूया.”
